2 Nooda 7
7
Ptgaya Mege Sapah Thmkuwan
(1 Qbs 8:62-66)
1Mnhedu dmurun ka Selomoh de peeyah baro ka puniq meyah ptbau psqama snapuh bnege ma, stenge knledax Utux Tmninun ka sapah thmkuwan. 2Ado stenge ledax Utux Tmninun ka sapah thmkuwan Utux Tmninun, kiya de ini tduwa mremux ka dmsapuh. 3Mtuting ka puniq ma stenge ledax Utux Tmninun ka sapah thmkuwan ciida, qmita ka seediq Israel de, asi tgtemaq btunux snpagan daha thmuku Utux Tmninun:
“Pusu ba malu ka Utux Tmninun,
gnhuwe na we betaq ani knuwan!”
4Mege snapuh berah Utux Tmninun ka qbsuran paru ma kana seediq. 52 mang 20'00 dapa ka bnege Selomoh qbsuran paru, 12 mang ka snapuh na miric. So kiya, mhedu ptgaya mege pnheyu sapah thmkuwan Utux Baro ka qbsuran paru ma kana seediq. 6Qmeepah qpahun daha ka msapuh, mangal tubu Utux Tmninun, kiya ka snmalu Dawid qbsuran paru stndahu na Utux Tmninun ka seediq Lewiy. Ado betaq ani knuwan ka huwe na. Spuun daha tubu ka uyas pnatis Dawid. Mheyu berah seediq miyuk iyuk urung ka msapuh, kiya de asi heyu kana ka seediq Israel.
7Ini tuku psaan snapuh psqama, snapuh pnhgalang ma, daruk siyang ka spuhan limuk snmalu Selomoh de, prtaso na ckceka nganguc berah sapah thmkuwan Utux Tmninun ma, mege snapuh psqama, snapuh ptbale ma, siyang hiya ka dheya.
8Ciida, mk7 moda smseman ka Selomoh, msuupu heya ka kana seediq Israel peeyah Xamat betaq ayu Micrayim uri, paru riyung ka pnssliyan daha. 9Tg8 ali moda psaanak psseli ka dheya, moda mk7 mege snapuh ma mk7 ali moda smseman. 10Kiya de 23 ali 7 idas, qbsuran paru we smkagul seediq mbrinah kobu daha nanak. Ado Utux Tmninun we mege gnhuwe quri Dawid ma Selomoh ma, Israel seediq na, kiya ka mqaras riyung ka lhebun daha.
Mtqita Selomoh Dungal ka Utux Baro
(1 Qbs 9:1-9)
11Mhedu smalu sapah thmkuwan Utux Tmninun ma sapah qbsuran paru ka Selomoh. Meeniq sapah thmkuwan Utux Tmninun ma sapah qbsuran paru, kana so kmddaun lhebun na we, wada na daun qmeepah kana. 12Keeman ciida, mtqita Selomoh ka Utux Tmninun, rmengo heya: “Wada mu qbhangun ka dnurun pnesa su. Ngalun mu ma spuhan kenan ka sapah thmkuwan nii. 13Nasi ku meluk karac baro ini pquyux, uxe uri we pqhedu mekan pnhuma ka utun, uxe uri we peeyah mnarux punu seediq mu ciida, 14kana kesun seediq gaga toma ngayan mu we, nasi psbiciq heya nanak, dmurun ma migin dqeras mu ma, malix qnnaqah noda daha we, mpqbahang ku ma mpsruwa ku qnquwan noda daha ma, mpkmalu ku dxeral daha peeyah karac baro. 15Mqita ka doriq mu, mpqbahang ku dnurun namu meniq hini ka birac mu. 16Saya, gnao mu ka sapah thmkuwan nii, pnrtaso mu psaanak, so maha betaq ani knuwan meeniq ckceka hiya ka ngayan mu. Doriq mu ma lhebun mu meeniq hiya klaali uri. 17Nasi su meniq berah mu, muyu su Dawid tama su, mdrumuc qmeepah kana tnugsaan mu sunan, thei kari pndakar mu ma gaya bneku mu de, 18mpskere ku tluungan qbsuran paru qlhangan su, mntena pnsdehu mu Dawid tama su, rmnengo ku: ‘Uxe mpqsetuq ani knuwan qmlahang Israel ka lqlaqi laqi su.’
19Nasi namu tbrinah, malix kari pndakar mu ma gaya pndakar mu gaga meeniq berah namu, mosa namu qmeepah utux icil ma, thmuku dheya de, 20gbilun mu pusu peeyah dxeral bnege mu dheya ka seediq Israel. Dungal we lixun mu peeyah berah mu ka sapah thmkuwan pnrtaso pnsaanak pnoda ngayan mu uri. Kiya de tgruun mhulis kana seediq ani inu ka nii. 21Ani spruun riyung ka sapah thmkuwan nii, bobo na de mpsklui rmengo ka kana mnoda hiya: ‘Utux Tmninun we, mmaha na kesun hiya ka dxeral nii ma sapah thmkuwan nii ho?’ 22Mprengo ka seediq: ‘Ado seediq mneeniq hini we, wada malix Utux Tmninun, Utux Baro daha dmnudul pusu rdrudan daha mnlatac pneeyah Micrayim, mosa smdaling utux icil ma, thmuku ma qmeepah dheya. Kiya ka Utux Tmninun we pstrengun na kana mqraqil nii ka dheya.’”
Currently Selected:
2 Nooda 7: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
