2 Nooda 8
8
Bnqresan Selomoh
(1 Qbs 9:10-28)
1Wada 20 knkawas pnhyegan na sapah thmkuwan Utux Tmninun ma sapah qbsuran paru ka Selomoh. 2Selomoh we smalu lualang bnege Xuram, pniqun na hiya ka seediq Israel. 3Selomoh we mosa mccebu Xamat Cobah, ngalun na ka dxeral kiya. 4Selomoh we smalu alang Tadmor gaga ckceka tadus brenux. Smalu kana repun gaga alang Xamat. 5Dungal we smalu tgdaya Bet Xoron ma tgtruma Bic Hurung, pniqun na qnabil alang, rhengun alang ma, ma alang niqan ruhu qbrangan. 6Selomoh we smalu alang Baalat, kana alang gtuwan qyqeya, alang pniqan rulu mccebu ma, dapa dmay mccebu. Snluwan na smalu ka alang Yerusalem, Lebanon ma, kana alang ddxeral qlhangan na we wada na qhdeun smalu kana. 7Quri so msngari seediq uxe seediq Israel ka seediq Xet, Amori, Perijiy, Xiwiy ma Yebus we, 8kiya ka dseediq ini phqili seediq Israel we, splawa Selomoh ma tnqliyan mqeepah ka lqlaqi laqi daha betaq ali saya. 9Wano ba seediq Israel, Selomoh we ini na ngali tnqliyan mqeepah, ngalun na supi mccebu, mdudul supi, qbsuran rulu mccebu ma, qbsuran supi paapa dmay. 10Ngalan mpqlahang qpahun Selomoh qbsuran paru we 2'50 heyi ma qmlahang dseediq qmeepah.
11Selomoh we hrigun na peeyah alang Dawid peeniq bgurah sapah qbsuran paru snmalu na ka mqedil nangal na weewa qbsuran paru Paroh. Ado rmnengo ka Selomoh: “Dxeral ndaan kulu pnsdhegan Utux Tmninun we ida mrtaso kana. Kiya ka ini tduwa meniq sapah qbsuran Dawid qbsuran paru Israel ka mqedil mu.”
12Ciida, Selomoh we mege snapuh psqama meniq spuhan Utux Tmninun snmalu na gaga berah sbesuk. 13Dungal we muyu tnugesa Moseh mege snapuh bbege daha klaali meniq ali sngayan, 1 ali smseman bgurah idas ma, dungal we 3 smseman quri ssmiyan pang ini psai tgeda, ssmiyan nngalan uqun ma, ssmiyan pkobu. 14Selomoh we muyu bnkegan tama na Dawid. Smkagul qqpahun dmsapuh. Dungal we smkagul qqpahun seediq Lewiy, moda muuyas ma ooda daha klaali berah msapuh ma, pssugun na ptqpuruh ka pqlahang sapah thmkuwan, pqpahun na qmlahang knkingal rhengun alang. Ado rmnengo so nii ka Dawid seediq Utux. 15Rnengo na dmsapuh ma seediq Lewiy ka qbsuran paru we, wada daha dhekun ba moda kana ka dmqlahang repun ma duma qpahun.
16So nii Selomoh we mhedu psramal kana ooda na, peeyah pheyu pusu sapah thmkuwan betaq mnhedu qmeepah kana. Wada dehuk bale mhedu kana ka sapah thmkuwan Utux Tmninun.
17Ciida, Selomoh we mosa Ecyon Geber dxeral ga ssiyo rcilung Edom ma Eylot. 18Xuram we smkagul tnqliyan na, biqan na asu ma dseediq mkela paasu hadun na Selomoh hiya. Msuupu tnqliyan Selomoh mosa Opir ka dheya, mangal 4'50 tarantu king peeyah hiya, desun daha Selomoh qbsuran paru hiya.
Currently Selected:
2 Nooda 8: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
