2 Nooda 6
6
Tnugesa Seediq ka Selomoh
(1 Qbs 8:12-21)
1Ciida, rmengo ka Selomoh:
“Rmnengo meeniq ku mnkuung mesa ka Utux Tmninun.
2Kiya de ririh isu snmalu ku 1 uka smhetan sapah thmkuwan,
ngalun nniqun su ani betaq knuwan.”
3Mquri kana seediq Israel ka dqeras qbsuran paru ma, smbleyaq dheya. Mheyu hiya kana ka seediq Israel. 4Rmengo ka Selomoh: “Utux Tmninun, Utux Baro nuIsrael we tndhuun! Ado pnoda ba quwaq na mege sntangan Dawid tama mu ma, ida daun ba baga na nanak. Rmnengo ka heya: 5‘Bobo dnudul mu pnlatac peeyah dxeral Micrayim ali ciida, ini ku ba gao ani inu alang peeyah pnswayan rudan Israel, ririh ngayan mu ssmalu mu sapah thmkuwan ka hiya. Ini ku gao ani ima mqbsuran paru Israel seediq mu uri. 6Kiya de, gmao ku Yerusalem, meeniq hiya ka ngayan mu. Gmao ku Dawid mpqlahang Israel seediq mu.’ 7Lnglungan Dawid tama mu we, ririh ngayan Utux Tmninun, Utux Baro nuIsrael, kmsalu sapah thmkuwan ka heya. 8Kiya de Utux Tmninun we rmengo Dawid tama mu: ‘Ririh ngayan mu kmsmalu su sapah thmkuwan ka lnglungan su we, malu ka kiya. 9Kiya de iya salu ka isu. Wano laqi mntuting ba sunan ka mtduwa smalu sapah thmkuwan ngayan mu.’ 10Saya ka Utux Tmninun we tena na wada daan ka sntangan na kari nii. Wada ku lmutuc Dawid tama mu maangal tluungan qbsranan paru Israel. Mntena so rnengo Utux Tmninun spoda mu ngayan Utux Tmninun, Utux Baro nuIsrael smnalu ku sapah thmkuwan nii. 11Psaun mu hiya ka kulu pnsdhegan, gaga niqan pnsdhegan Utux Tmninun ka toma kulu hiya, kiya ka pnsdhegan na seediq Israel.”
Dnurun Selomoh
(1 Qbs 8:22-53. Uyas 132:8-9)
12Selomoh we mheyu berah kana seediq Israel, spuhan Utux Tmninun ma, pheyu baga na. 13Selomoh we snmalu 1 cpangan limuk pspawan na ckceka nganguc hiya, qndisan na we 5 sese, knuglahang na we 5 sese ma, 3 sese ka tnugkadan na. Mheyu bobo hiya ka heya ma, meeniq berah kana seediq Israel we tmbqelic papak ma pheyu baro mquri karac ka heya, 14dmurun: “Utux Tmninun, Utux Baro nuIsrael! Karac baro ma bobo dxeral we uka ka utux mptena so isu! Isu we psdehu su ba pnsdhegan su ma mege su gnaalu dtnqliyan bale ba qmeepah meniq berah su. 15Sndhegan nii we pnsdehu su quri Dawid tnqliyan su ka nii ma, pnstangan su heya ka nii. Pneeyah ba quwaq su ka sntangan, spooda su baga su qmhedu mntena so ali saya. 16Utux Tmninun, Utux Baro nuIsrael! Sntangan su rmengo Dawid tnqliyan su ma tama mu: ‘Nasi qlahang oda daha, bale ba thei gaya mu mntena so noda su meniq berah mu ka lqlaqi laqi su we, uxe mpsetuq maha niqan seediq mptleung tluungan qbsuran paru Israel berah mu’ saya, braho su pdai ba ka kari su nii. 17Utux Tmninun, Utux Baro nuIsrael! Saya, braho misu, dai ka kana sntangan su Dawid tnqliyan su.
18Bale ba mtheyaq seediq bobo dxeral ka Utux Baro ho? Qtai! Bale ba ini ptuku nniqun su ka karac ma karac baro, huwa kesun ka sapah thmkuwan snmalu mu nii ho? 19Braho su ba Utux Tmninun, Utux Baro mu glaani ka dnurun tnqliyan su, bhangi ka dnurun mu meeniq berah su. 20Tai so ani diyan ma ani keeman we, mqita sapah thmkuwan nii ka doriq su. Kiya ka sntangan su sapah pnheyu pnooda ngayan su. Braho su bhangi ka dnurun, dnurun tnqliyan su meniq hini. 21Dmurun mquri hini ka tnqliyan su ma seediq su Israel ciida we, braho su bhangi peeyah nniqan su karac baro ma, bhangi ma srwai bale.
22Nasi niqan ka qnquwan su seediq ssiyo ma, pkyexun su daha mosa smdehu. Kiya de meyah sapah thmkuwan nii ma, smdehu berah spuhan su nii ka heya de, 23braho su, bhangi ma dai peeyah karac baro, pooda psgao ma biqi niqan qnquwan noda ka seediq naqah. Puyu so ndaan daha cmiyuk tunux daha. Biqi msderux ka seediq msderux, puyu so knsderux na smbleyaq su cmiyuk heya.
24Nasi niqan qnquwan noda daha isu ka seediq Israel su, betaq ini baka berah pais, kiya we meyah mbrinah quri sunan, ptuura ngayan su, mlawa dmurun quri sunan meeniq sapah thmkuwan nii we, 25braho su bhangi peeyah karac baro, srwai ka qnquwan noda Israel seediq su. So maha mbrinah dxeral bnege su ma dpusu rdrudan daha ka dheya.
26Nasi niqan qnquwan noda daha sunan ka seediq su, betaq su wada gmemuk karac ini su pqyexi ka quyux. Nasi meyah dmurun hini, ptuura ngayan su ma, ptuura qnquwan noda daha peeyah pnkdira su, 27braho su bhangi peeyah karac baro, srwai ka qnquwan noda tnqliyan su Israel seediq su. Tgsai dheya ka elu malu kari su ma, pqyexi ka dxeral su, kiya ka dxeral bnege su seediq su.
28Nasi niqan krayan, mnarux punu, sbgihur bgihur mtilux, skwiyan, trilan utun ma mduku, uxe uri we meyah tmlibu mccebu rhengun alang nii ka pais, ani yaa smterung ani manu mqraqil ma mnarux naqah, 29Israel seediq su, duma daha ma ani 1 ba seediq, betaq mkela pnqraqil daha, pheyu baga mquri sapah thmkuwan nii, ani maanu ka pnesa daha ma, ani maanu ka dnurun daha, 30braho su bhangi ma srwai peeyah nniqan su karac baro. Ado mkela su lhebun seediq ka isu. Wano isu ka mkela lhebun seediq. Braho su puyu so ndaan daha cmiyuk dheya. 31So maha betaq ani knuwan miicu sunan ma muyu kari su meeniq dxeral bnege su pusu rdrudan daha ka dheya.
32Quri so dseediq icil uxe seediq Israel we, nasi ririh knparu ngayan su, knparu beyax baga su ma, hiqur baga pnyahan su, betaq peeyah theya riyung meeyah dmurun sapah thmkuwan nii we, 33braho su bhangi peeyah nniqan su karac baro, puyu so dnurun daha dai ka dnurun daha sunan. So maha mkela sunan, miicu sunan mntena so Israel seediq su ka kana seediq bobo dxeral. Dungal we so daha klaun sapah thmkuwan snmalu mu ririh ngayan su nii ka dheya uri.
34Nasi muyu snkgulan su mosa nganguc ka seediq su, ani mosa mccebu ani inu, nasi dmurun mquri alang gnao su nii ma, dmurun mquri sapah thmkuwan ririh ngayan su nii ka dheya we, 35braho su bhangi peeyah karac baro ka pnlawa dnurun daha ma, ptuura msderux noda dheya.
36Nasi niqan qnquwan noda daha sunan ka seediq su, ado uka ba ka uka qnquwan noda, kiya de mseang su dheya ma, sbege su pais daha ma qrapun daha madis betaq dxeral pais ani theya ma ani daling ciida ka dheya we. 37Nasi psbrinah lmngelung ma, priyux lnglungan meniq dxeral qnrapan hiya ka dheya ma, mquri sunan dmurun: ‘Wada miyan niqan qnquwan noda di, tbrinah miyan ma, mnoda miyan qnnaqah da.’ 38Nasi peeyah kana lhebun ma lnglungan daha kmpriyux quri sunan dxeral pais qmnerac hiya ma, mqquri dxeral daha nanak, kiya ka alang bnege su rdrudan daha ma gneegan su ma, sapah thmkuwan pnheyu mu ngayan su we, 39braho su bhangi peeyah nniqan su karac baro ka pnlawa dnurun daha, ptuura ka msderux noda su, srwai ka qnquwan noda daha sunan ka seediq su. 40Utux Baro mu! Qtai miyan doriq su saya, tgleus mbahang ka dnurun miyan hini saya.
41Utux Baro Tmninun! Braho su tutuy saya,
suupu kulu pnsdhegan, mteme nniqan msange ka beyax su.
Utux Baro Tmninun! Tai so mlukus mdoi baga ka msapuh su,
tai so mangal qnaras ka seediq mrtaso su.
42Utux Baro Tmninun! Iya qdaani ka cnwiqan su abura,
klai ba ka gnhuwe su Dawid tnqliyan su.”
Currently Selected:
2 Nooda 6: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
