2 Nooda 2
2
Psramal Smmalu Mrtaso Sapah Thmkuwan
(1 Qbs 5:1-18)
1Selomoh we posa kari mpooda ngayan Utux Tmninun mpsmalu sapah thmkuwan, dungal we mpsmalu sapah qbsuran paru. 2Selomoh we mlawa mhaqul qhuni we 7 mang heyi, mceyax btunux we 8 mang heyi, 36'00 heyi ka mpqlahang na. 3Selomoh we smkagul seediq mosa rmengo Xuram qbsuran paru Cor: “Hnaqul su qulic bale wada su sbege Dawid tama mu ssmalu na sapah qbsuran paru, braho su so kiya dmayo kenan uri. 4Qtai! Mpooda ku ngayan Utux Tmninun, Utux Baro mu mpsmalu ku sapah thmkuwan, prtaso mu psaanak mege heya. Meniq berah na mbege ku snapuh malu sknexan ma pang klaai. Mbege ku snapuh psqama mgrebu ma gbbiyan, ali sngayan, prading idas ma, smseman pnheyu Utux Baro. Gaya seediq Israel betaq ani knuwan ka nii. 5Sapah thmkuwan ssmalu mu we maha paru, ado mgkala paru riyung kana utux ka Utux Baro miyan. 6Ini na tuuku nniqun ka karac ma karac gaga karac baro we, ima ka mtduwa smalu sapah thmkuwan na ho? Wano ba psqmaan skenux meeniq berah na! 7Saya de ani su ba rabang, skguli 1 seediq mkela ba smmalu, kiya ka mkela ba smquri, smalu qyqeya king, ging, limuk, ma xiluy. Mkela tminun pala mgqliyang, mtgdiyuc ma mtanah. Seediq nii we gneegan tama mu Dawid mnsuupu qmeepah Yehudah ma Yerusalem. 8Dungal we braho su desi yaku hini ka qulic bale, tqilung ma tqilung bhege peeyah Lebanon. Ado klaun mu mkela ba rmqeraq qhuni Lebanon ka tnqliyan su. Qtai! Maha dmayo tnqliyan su ka tnqliyan mu uri. 9Klaun mu psramal egu ba qhuni, ado mpsalu ku paru ba sapah thmkuwan. 10Qtai! Mpskagul ku tnqliyan, kiya ka mosa ptakur qhuni, 2 mang koru mugi biciq, 2 mang koru mugi paru, 2 mang bati sino ma 2 mang bati abura.”
11Cmiyuk mege patis Selomoh ka Xuram qbsuran paru Cor: “Ado Utux Tmninun we gmaalu seediq na, kiya ka pheyu sunan mqbsuran paru daha. 12Rmengo dungal ka Xuram: Bale ba tndhuun ka Utux Tmninun, Utux Baro nuIsrael smnalu karac ma dxeral! Dawid qbsuran paru we biqan na laqi niqan ba knkela, mkela ba tunux ma tgkeela ba tduwa smalu sapah thmkuwan Utux Tmninun ma, smalu sapah qbsuran paru na uri.
13Saya ka yaku we mskagul ku 1 ani kana knkela ma tgkeela ba smalu, heya we Xuram mptgesa kenan. 14Heya we laqi mqedil pneeyah pnswayan rudan Dan, tama na we seediq Cor. Heya we mkela ba smmalu king, ging, limuk, xiluy, btunux ma qhuni smlean na qyqeya ddooyun. Mkela ba tminun galiq mtlawa, mgtdiyuc, mtanah ma tminun pala uri. Mkela qmrequr ani maanu qyqeya ma muyu pntasan qmrequr uri. Ptheyaq mpqeepah sunan ma pspui mpqeepah tama su Dawid ka heya. 15Snruwa su menan ka mugi biciq, mugi paru, sino, ma abura curung we adis tnqliyan su hini. 16Mpuyu ku so ngngalun su, mpheyu ku qhuni pneeyah Lebanon, pntunun miyan mekuy, pqlliun miyan rcilung pdehuk Yapo. Peeyah hiya ka isu de haqul dehuk Yerusalem da.”
17Selomoh we muyu tama na Dawid, daan na smepu ka seediq icil gaga tnooda meniq dxeral Israel, kana daha we 15 mang 36'00 heyi. 18Skgulun na mhaqul ka 7 mang heyi, 8 mang ka gmebing btunux dgiyaq ma, 36'00 heyi ka mpqlahang seediq meepah.
Currently Selected:
2 Nooda 2: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
