2 Nooda 1
1
Mesa Knkela ka Selomoh
(1 Qbs 3:1-15)
1Selomoh laqi Dawid pgdhegun na ba qmlahang ka qlhangan na. Utux Tmninun, Utux Baro na we theyaq heya ma sbyaxun na.
2Selomoh we posa kari kana Israel, kiya ka dqbsuran supi mdudul 10'00 heyi ma mdudul 1'00 heyi, dqbsuran psgao, kana qbsuran mdudul ma, pnswayan pusu rudan sapah. 3Selomoh we desun na mquri Gibon spuhan hiya ka kana seediq, spuhan kiya we kiya ka snmalu Moseh tnqliyan Utux Tmninun mneniq tadus brenux ciida. 4Kiya we kulu pnsdhegan Utux Baro ge, wada desun Dawid psaun na Qiryat Yearim pnsramal na hiya. Ado snmalu kobu kulu pnsdhegan meeniq Yerusalem hiya ka heya. 5Spuhan snmalu limuk, kiya ka snmalu Becalel laqi Uriy, lqlaqi laqi Xur we psaun na Gibon tgberah kobu Utux Tmninun. Kiya de dmurun Utux Tmninun ka Selomoh ma kana seediq. 6Selomoh we mnkala mosa spuhan snmalu limuk berah kobu Utux Tmninun hiya, mege snapuh psqama 10'00 tnbegan bobo spuhan.
7Keeman na ciida, Utux Baro we mtqita Selomoh ma rmengo heya: “Maanu ka bbege mu sunan we, tduwa su mesa kenan.” 8Rmengo Utux Baro ka Selomoh: “Bnege su paru ba gnhuwe Dawid tama mu, betaq ku lmutuc mqbsuran paru. 9Utux Baro Tmninun! Braho misu, dai ka kari sndhegan su Dawid tama mu. Ngalan saku qbsuran paru seediq nii, dheya we mntena qbulic dxeral knuegu ka dheya. 10Saya, braho su bale biqi ku knkela ma gnkela, klaun mu huwa mesa moda berah seediq nii. Nasi uxe so kiya de, huwa mu kesun psgao ka seediq su hbaro nii ho?” 11Rmengo Selomoh ka Utux Baro: “So nii ka lnglungan su, ini su pesa qnbleqan, egu dnoi ma, paru ngayan, dungal we ini su pesa ppqhedu pais tmnraqil sunan ma, ini su pesa qqbsiyaq su muudus. Pnhyegan misu mqbsuran paru seediq mu, wano mesa su knkela ma gnkela ddaun su psgao seediq mu. 12Maanu so kiya de bege mu sunan ka knkela ma gnkela, kiya uri we bege mu sunan ka qnbleqan, egu dnoi ma, paru ngayan. Dqbsuran paru tgberah su we uka bale ndaan, tgbukuy su we uxe mpniqan uri.” 13Kiya de Selomoh we peeyah Gibon spuhan hiya mbrinah mosa Yerusalem qmlahang seediq Israel.
Supi ma Pusu Dnoi Selomoh
(1 Qbs 10:26-29)
14Selomoh ge, psseli rulu mccebu ma supi paapa dmay. Niqan 14'00 rulu mccebu ma 1 mang 20'00 supi paapa dapa dmay ka heya ma, pniqun na Yerusalem qbsuran paru hiya. 15Meeniq Yerusalem hiya ka qbsuran paru we, mntena btunux kneegu ka king ma ging, mgkala tdiyuc Sipira kneegu ka qulic bale. 16Dapa dmay Selomoh we pneeyah Micrayim ma Krikiya kiya, bnaruy dmpsbaruy qbsuran paru pneeyah Krikiya kiya. 17Knkingal rulu mccebu pneyah Micrayim we bnaruy 600 skere ging. Knkingal dapa dmay we bnaruy daha 1'50 skere ging. Rulu mccebu ma dapa dmay dqbsuran paru seediq Xet ma Aram we, ida pnoda baga daha posa kana.
Currently Selected:
2 Nooda 1: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
