1 Samuel 17

Dawid ma Golyat

1Psseli supi na meyah mccebu ka Seediq Peliset. Msseli Sokoh dxeral Yehudah ma pkobu Epes Damim cenga Sokoh ma Ajeqah. 2Gaga msseli ka Soro ma Israel uri ma, pkobu ayu Ila psramal mccebu daha seediq Peliset. 3Mheyu dgiyaq hini ka seediq Peliset ma, mheyu sipo dgiyaq ka seediq Israel. Cenga daha we niqan ayu. 4Meyah pstalang ka taxa seediq pneeyah kobu Peliset. Golyat ka ngayan na ma, seediq Gat. Hnyegan na we yaa ba 6 sese ma 1 quwaq. 5Knbunuh bunuh qeerung limuk ka tunux na ma mlukus yaa ba 50'00 skere chndilan snmalu kuruk xiluy limuk ka lukus mccebu. 6Papak na we, niqan qnqetic snmalu limuk ma, mheal smbrangan qqada snmalu limuk. 7Riduy smbrangan na we mntena so ulan uril tinun ma, xiluy puting smbrangan we 6'00 skere knchdilan. Plaale berah na ka 1 seediq gaga dmoi qeerung heyi na. 8Mheyu ka Golyat ma, mdiras mlawa quri supi Israel, rmengo dheya: “Maanu ka seeyah namu mtbeku mccebu? Uxe ku seediq Peliset peni? Uxe namu tnqliyan na Soro peni? Geegi 1 seediq peeyah hmeruc hini. 9Nasi tduwa eyah tgdiyal kenan ka heya ma, phuqil kenan de, mptnqliyan miyan yamu ka dyami. Netun ku mbeyax ka yaku de, phuqil ka heya, kiya ka mptnqliyan namu menan ka yamu.” 10Rmengo dungal ka seediq Peliset kiya: “Ali saya mtaus ku mseang dsupi Israel. Peeyah taxa namu ma mptburux miyan mkeekan.” 11Mbahang kari seediq Peliset so nii ka Soro ma kana seediq Israel we, pkrkerang ma miicu riyung.

12Dawid we laqi Yisay seediq Eprat alang Betlexem dxeral Yehudah. Yisay ge, 8 ka laqi na rseno. Meniq Soro ciida, rudan ka seediq nii de, spruun ba qmita kana seediq. 133 dqbsuran lqlaqi rseno Yisay we smnegul Soro mosa mccebu. 3 lqlaqi mnosa mccebu nii we: Eliyab we tgqbsuran paru, Abinadab we tgswai hari ma, Samah ka tg3 laqi na rseno. 14Dawid we tgswai ba laqi ka heya ma, wada theya Soro ka 3 dqbsuran na ciida. 15Ncugil smwaye Soro duma na ka Dawid, mbrinah mosa Betlexem tmabu miric tama na. 16Seediq Peliset kiya we, mk40 ali ani mgrebu ma keeman ida meyah mheyu ka heya.

17Rmengo Dawid laqi na ka Yisay: “Desi 1 igipa nuduh mugi ma 10 pang. Tmalang mosa kobu biqi qbsuran su. 18Dungal we adis 10 pang snmalu nunuh biqi qbsuran 10'00 supi. Kiya uri we qtai teta malu ka qbsuran su ma, so maha niqan ka pnskraya daha mbrinah su.”

19Soro ma 3 qbsuran paru Dawid ma, kana seediq Israel we, gisu mccebu seediq Peliset ayu Ila hiya kana. 20Mtutuy mgrebu ba ka Dawid ma, htiyan na pqlahang 1 seediq ka rahul miric. Kiya de muyu rnengo Yisay madis uqun mosa ka heya. Dehuk kobu supi hiya de, gisu hani mosa nniqan mccebu ka supi ma, mpplawa hiya. 21Mhedu psramal ma mheyu ssipo kana ka seediq Israel ma seediq Peliset. 22Dawid we htiyan na peeniq mpqlahang qyqeya hiya ka qyqeya na ma, tmalang mosa nniqan mccebu hiya ma, mosa qmita yaa ga malu ka qbsuran na. 23Gisu mpprengo dheya ciida, qtai! Seediq meyah psseung kiya, kiya ka Golyat seediq Peliset pneeyah Gat meyah ckceka supi Peliset. Mntena ka kari rnengo na ma, mbahang ka Dawid.

24Qmita seediq kiya ka seediq Israel de, miicu riyung ka dheya ma, qduriq peeyah berah na. 25Rmengo ka seediq Israel: “Ga su qtaan ka seediq nii meyah baro nii ho? Meyah mseang seediq Israel ka heya. Nasi niqan seediq dehuk phuqil heya de, mbege egu qyqeya dnoi ka qbsuran paru. Dungal we pstrengun na heya ka weewa na uri. Kiya uri we meniq ckceka seediq Israel we, maha srwaun uxe mbege uqun ma mqeepah ka tnsapah daha uri.” 26Rmengo seediq ssiyo na ka Dawid: “Nasi niqan ka seediq phuqil seediq Peliset nii ma, pkaangal qnsiqa seediq Israel de, mphuwa ka heya? Ima ba ka seediq Peliset ini oda ptgaya psalak nii ma, betaq so nii pahung na mseang supi Utux Baro mudus ani knuwan!” 27Ida cmiyuk kari mntena rnengo daha heya ka dheya: “Nasi niqan seediq phuqil seediq kiya de, maha so nii ka mpquri heya.”

28Eliyab tgqbsuran mtswai Dawid we, mbahang kari mpprengo dheya ka Dawid de, mseang heya ma, rmengo: “Meyah su hmuwa hini? Miric gaga tadus brenux hiya we, wada su pqlhangan ima di? Klaun mu ka pnsparu su ma, qnnaqah lnglungan su, wano ba meyah su qmita mccebu ka seeyah su hini!” 29Rmengo ka Dawid: “So ba maanu ka qnquwan mu? Ani smiling 1 kari de, ini tduwa peni?” 30Mlatac heya mquri seediq icil ka heya, ida smiling mntena ooda ka heya. Ida mntena so kari rnengo pnlaale cmiyuk heya.

31Mnbahang kari rnengo Dawid ka duma seediq de, meyah rmengo berah Soro. Kiya de smkagul seediq mlawa heya. 32Rmengo Soro ka Dawid: “Iya kuuwic peyah seediq Peliset kiya ka yamu. Tnqliyan su we, asi ka mosa tgdiyal heya.” 33Rmengo Dawid ka Soro: “Ini su tduwa mosa tmgdiyal seediq Peliset kiya ka isu. Ado laqi ba ka isu ma, ida seediq mccebu peeyah laqi ka heya.” 34Rmengo Soro ka Dawid: “Tmabu miric tama na ka tnqliyan su. Mncugil meyah qmerac wawa miric ka rkelic rudu ma sume. 35Bhragi mu ka heya ma paqun mu ma ngalun peeyah quwaq daha ka wawa miric. Meyah mekan kenan ka dheya we, wada mu asi qrii ka ngudus na ma wada mu phqilun. 36Tnqliyan su we, pnhuqil ku rkelic rudu ma sume. Mntena rkelic rudu ma sume ka seediq Peliset ini oda ptgaya psalak nii. Ado gisu mseang quri supi Utux Baro ka heya.” 37Rmengo ka Dawid: “Dmnoi baga mu peeyah rkelic rudu ma sume ka Utux Tmninun. Heya we ida mdoi baga mu peeyah baga seediq Peliset nii uri.” Rmengo Dawid ka Soro: “Un, Osa! Mptheyaq sunan ka Utux Tmninun.” 38Soro we ngali na ka lukus na mccebu ma splukus na Dawid. Spkbunuh na heya ka bunuh qeerung limuk ma splukus na ka lukus mccebu. 39Dawid we smiru hlmadac lukus mccebu ka heya ma, so smeung mkkesa. Ado ini tgluhe mlukus ka Dawid, kiya de rmengo Soro ka heya: “Ini ku tduwa mkkesa ka mlukus ku nii. Ado ini ku tgluhe mlukus.” Kiya de, laxun na ka lukus mccebu nii. 40Dmoi hukuc ka baga na ma, mosa gmao mangal 5 quru btunux mdheriq ba peeyah ayu ruru ma psaun na lubuy. Kiya ka lubuy ddesun seediq mtabu miric. Maadis snuyuk urac qqada na btunux ma, mosa smterung seediq Peliset kiya ka heya.

41Mkkesa mosa smdaling Dawid ka seediq Peliset kiya. Gaga berah na ka ga dmoi qqeerung heyi. 42Qmita ka seediq Peliset. Taan na ka Dawid de snbiciq qmita heya. Ado laqi ba taan, mtanah dqeras ma, mseediq ba qtaan ka heya. 43Rmengo Dawid ka seediq Peliset: “Madis su hukuc meyah yaku hini, ya ku huling ka yaku peni?” Kiya de tmiyu utux daha nanak cmiyus Dawid ka seediq Peliset. 44Rmengo Dawid dungal ka seediq Peliset: “Aguh wa! Bbege mu qbheni ga karac ma camac ga mkkesa ka heyi su.” 45Rmengo seediq Peliset ka Dawid: “Meyah su murung kenan we, smtama su hlmadac ma smbrangan. Kiya de murung ku sunan we, smtama ku ngayan Utux Tmninun Mdoi Kana Supi, kiya ka Utux Baro ga su ksengun ma dmnudul supi Israel. 46Ali saya, Utux Tmninun we maha na sbege baga mu ka isu ma, asi su mu ka phqilun ka isu ma, slapun mu ka tunux su. Ali saya, bege mu qbheni ga karac ma camac ga mkkesa ka heyi supi Peliset su. So maha mkela kana ka seediq bobo dxeral, niqan Utux Baro ka Israel. 47Dungal we so maha mkela ka kana seediq hini, Utux Tmninun ka pkbeyax seediq. Uxe mdoi hlmadac ma smbrangan, ado kana pusu mccebu we Utux Tmninun. Maha na sbege baga nami ka yamu.”

48Mtutuy ma tmalang smdaling mquri Dawid ka seediq Peliset. Tguaguh mquri nniqan pcbuwan ka Dawid ma tmalang mosa smterung seediq Peliset. 49Dawid we tmremux lubuy ka baga na ma mangal 1 quru btunux. Sdoi na snuyuk urac dmoi btunux cebu ma cmebu heya. Cmebu kduruk seediq Peliset ma, wada asi osa toma kduruk na ka btunux. Kiya de mtakur tgtemaq dxeral ka dqeras na.

50So kiya de, Dawid we dmnoi snuyuk urac dmoi btunux cmebu de, ini baka ka seediq Peliset kiya di. Asi na nteni cmebu ma wada na phqilun. Baga Dawid we uka hlmadac. 51Tmalang mosa mheyu ssiyo seediq Peliset hiya ka Dawid. Hmgeluq hlmadac peeyah rudu hlmadac seediq kiya. Phqilun na ma, smalak tunux na. Qmita wada mhuqil ka mkrkere ba heyi daha ka seediq Peliset de, wada qduriq kana ka dheya di. 52Kiya de mtutuy mdiras ka seediq Israel ma Yehudah de, mosa smdurak seediq Peliset betaq rhengun alang Gay ma Eqron. Pnhuqil ka seediq Peliset we mksaro peeyah mkleelu Saarayim betaq Gat ma Eqron. 53Bobo mpbrinah smdurak seediq Peliset ka seediq Israel de, mosa gmeeluk maangal kobu daha. 54Dawid we madis tunux seediq Peliset kiya dehuk Yerusalem. Kiya de we, lukus mccebu seediq Peliset kiya we, psaun na kobu na nanak.

Mtqita Soro ka Dawid

55Soro we qmnita mnosa mccebu seediq Peliset ka Dawid de, smiling Abner qbsuran supi: “Abner, laqi nima ka riso gaga?” Rmengo ka Abner: “Qbsuran paru! Psdehu ku berah su, ini ku ba kela.” 56Rmengo ka qbsuran paru: “Sai smiling, nima kesa laqi gaga.” 57Mbrinah meyah mnosa phuqil seediq Peliset ka Dawid de, Abner we desun na berah Soro ka heya. Baga Dawid we dmoi tunux seediq Peliset kiya. 58Smiling heya ka Soro: “Riso! Laqi su ima ho?” Cmiyuk ka Dawid: “Yaku we laqi tnqliyan su Yisay seediq Betlexem.”

Currently Selected:

1 Samuel 17: Stgdaya

Highlight

Copy