1 Samuel 16

Phyegan Qbsuran Paru Hnrigan Abura ka Dawid

1Rmengo Samuel ka Utux Tmninun: “Betaq ku qmada Soro mpqbsuran paru Israel we, maha betaq knuwan ka sqnaqah su kuxul heya ho? Stngai abura ka urung. Aguh, skgulun su mosa Yisay seediq Betlexem hiya. Ado wada ku gmao 1 laqi na rseno mpqbsuran paru.” 2Rmengo ka Samuel: “Mphuwa ku mesa mooda ka so nii. Nasi mbahang ka Soro de, phqilun ku na di.” Rmengo ka Utux Tmninun: “Tduwa su madis 1 wawa bubu dapa ka baga su ma, rengo: ‘Gisu ku meyah mege bbege snapuh Utux Tmninun ka yaku.’ 3Plaani ka Yisay ttuumal theyaq smapuh hiya. Mptgesa ku sunan ka ddaun su. Seediq rnengo mu sunan we, asi su ka hrigan abura.” 4Muyu kari Utux Tmninun mooda ka Samuel ma dehuk Betlexem. Miicu smterung heya ka kana ddrudan alang hiya ma, niqan ka seediq rmengo: “Ya mpsbleyaq ka seeyah su ho?” 5Cmiyuk ka heya: “Un, mpsbleyaq ka seeyah mu. Meyah ku mege ssapuh Utux Tmninun. Yamu we prtaso psaanak ma, theyaq kenan mege snapuh.” Samuel we, prtaso na psaanak ka Yisay ma lqlaqi na, plaanun na meyah theyaq mege snapuh.

6Dehuk ka dheya de qmita Eliyab ka Samuel ma, rmengo ka lhebun na, ida ba gaga berah Utux Tmninun ka hriqun abura Utux Tmninun di. 7Kiya de rmengo Samuel ka Utux Tmninun: “Iya qita hnyegan ma knpruwan na. Ini ku gao heya. Ado Utux Tmninun we, ini pntena qnita seediq ka qnita na seediq heya. Seediq we qmita nganguc, Utux Tmninun we qmita lhebun seediq.” 8Yisay we mlawa Abinadab mooda berah Samuel. Rmengo ka Samuel: “Ini gao heya uri ka Utux Tmninun.” 9Yisay we mlawa Samah mooda berah, rmengo ka Samuel: “Ini gao heya uri ka Utux Tmninun.” 10Yisay we mlawa 7 laqi na mooda berah Samuel kana. Kiya de rmengo Yisay ka Samuel: “Uxe gnao Utux Tmninun kana ka dheya.” 11Kiya de smiling Yisay ka Samuel: “Gaga hini kana ka laqi su da peni?” Rmengo ka heya: “Niqan 1 ka tgswai ba. Qtai! Gisu tmabu miric ka heya.” Rmengo Yisay ka Samuel: “Skguli seediq mosa mlawa heya. Nasi ini eyah ka heya de, uxe ta mprading mekan uqun.” 12Kiya de Yisay we smkagul seediq mosa mlawa heya. Heya ge, mtanah ka dqeras na, lmedax ka doriq na ma, knseediq ba qtaan ka hnyegan na. Rmengo ka Utux Tmninun: “Tutui! Hrigi abura ka heya! Ado kiya ka heya di.” 13Samuel we mangal abura gaga urung hrigan na abura berah kana dqbsuran na ka heya. Peeyah ali ciida, Bgihur Utux Tmninun we asi telung Dawid. Mbrinah mosa Ramah ka Samuel.

Meniq Sapah Qbsuran Paru NSoro ka Dawid

14Mlatac peeyah Soro ka Bgihur Utux Tmninun de, meyah prrudu heya ka bgihur naqah pneyah Utux Tmninun. 15Rmengo Soro ka dqbsuran mdayo: “Qtai! Meyah prrudu sunan ka bgihur naqah pneeyah Utux Baro. 16Pusu tnsapah mu we, ini huwa smkagul su tnqliyan gaga berah su. Mosa migin 1 mkela ba tmubu tubu. Meyah heyi su ciida ka bgihur naqah pneyah Utux Baro de, mptubu tubu ka baga na. Kiya de maha malu kuxul su ka isu.” 17Rmengo tnqliyan ka Soro: “Sai ku hiya migin mkela ba tmubu tubu ma, adis yaku hini.” 18Rmengo Soro ka 1 tnqliyan hiya: “Qtai! Qmnita ku 1 laqi Yisay seediq Betlexem mkela ba tmubu tubu. Heya we mkrkere ba heyi, mkela ba rmengo ma, mseediq ba hnyegan na. Kiya we mtheyaq heya ka Utux Tmninun uri.” 19Kiya de smkagul snkgulan mosa Yisay hiya ka Soro ma, rmengo: “Adis yaku hini ka Dawid laqi su gaga tmabu miric.” 20Yisay de psramal duma pang ma 1 lubuy sino ma, 1 ka wawa miric. Spadis na bobo dapa roba. Spoda na baga Dawid laqi na mege Soro. 21Dehuk Soro hiya ka Dawid de, mheyu berah Soro. Kuxul bale Soro ka heya ma, ngalan na mdoi qyqeya mccebu ssiyo Soro ka heya. 22Soro we smkagul seediq mosa Yisay hiya, rmengo: “Peeniq berah mu mdayo kenan ka Dawid. Ado kuxul mu mpeeniq berah doriq mu ka heya.” 23Pneeyah Utux Baro hiya meyah ka bgihur naqah de, mangal tubu ka Dawid ma tmubu tubu ka baga na. Kiya de malu kuxul ma mqaras lnglungan na ka Soro. Kiya de mlatac peeyah heyi na ka bgihur naqah.

Currently Selected:

1 Samuel 16: Stgdaya

Highlight

Copy