1 Samuel 18
18
Dawid ma Yehonatan
1Mnhedu mpprengo ka Dawid ma rmengo Soro ka Dawid de, mlengu bale sqapah ka lhebun Yehonatan dhaka Dawid. Gmaalu Dawid mntena so knuudus na ka Yehonatan. 2Ali ciida, hridun Soro ka Dawid ma, ini na pbrnahi posa sapah tama na. 3Yehonatan ge, gmaalu Dawid mntena na so gmaalu knuudus na nanak. Kiya de ppsdehu heya. 4Lmhelah lukus na mgbaro peeyah heyi na ka Yehonatan ma, sbege na Dawid. Dungal we sbege na heya ka lukus mccebu, hlmadac, budi ma, habik uri. 5Ani smkagul Dawid mosa ani inu ka Soro we, ida malu ba ka ndaan na. Kiya de Soro we, phyegun na qbsuran supi ka Dawid. Malu kesun daha qmita ka kana seediq ma dqbsuran mdayo Soro.
Snhuur Dawid ka Soro.
6Pnhuqil seediq Peliset ka Dawid ma, mtheyaq hbaro seediq mbrinah ciida, asi pncriyu peeyah knkingal alang ka dmqedil. Mqqaras riyung, tmatuk tatuk hmuril ma, kmeeki muuyas smterung Soro qbsuran paru. 7Tmlibu msriyux muuyas ka mqedil, rmengo:
“Soro we phuqil 10'00 heyi,
Dawid we phuqil 1 mang heyi.”
8Sqama seang na ka Soro, ini skuxul kari so nii. Rmengo ka heya: “Gaga biqan mang ka Dawid, 10'00 ka naku. Kiya de, wano ba qlhangan ka ini biqi heya!” 9Peeyah ali ciida, qmnriqu Dawid ka Soro.
10So kusun, meyah qmerac Soro ka bgihur naqah pneeyah Utux Baro. Kiya de mddiras mkuni truma sapah ka Soro. Dawid we, ida so klaali tmubu tubu ka heya ma, dmoi smbrangan ka baga Soro. 11Soro ge txalun na qmada ka smbrangan we, lmngelung ka lhebun na: “Sndlane mu qnabil metaq ka Dawid.” Kiya de wada mn2 qduriq ka Dawid.
12Miicu Dawid ka Soro. Ado wada smwaye peeyah Soro ka Utux Tmninun ma, mosa msuupu Dawid ka heya. 13Kiya de mlawa Dawid platac peeyah heya ka Soro ma, ngalan na qbsuran 10'00 supi. Kiya de dmoi supi mosa mccebu ka heya 14Dawid we, malu ba kana ka noda na ma, Utux Tmninun we gaga theyaq heya uri. 15Soro ge, qmita Dawid so nii malu noda na de, krinah miicu heya. 16Kiya de, gmaalu Dawid kana ka seediq Israel ma Yehudah. Ado dmnudul dheya mosa ma mbrinah meyah ka heya.
Msterung Weewa Soro ka Dawid
17Rmengo Dawid ka Soro: “Qtai! Pstrengun mu sunan ka Merab qbsuran weewa mu. Asi su ka mpseediq supi mbeyax mu, ririh Utux Tmninun ka pccbuwan su.” Lmngelung ka lhebun na Soro: “Naqah ka asi mu phqili baga mu. Asi ka spooda mu baga seediq Peliset phuqil heya.” 18Rmengo Soro ka Dawid: “Ima ku ka yaku? Pneeyah ku inu ka yaku ma, maanu bale ka tnsapah tama mu meniq ckceka Israel? Kiya ka mpbetaq ku so nii lmngelung mpaama ku na qbsuran paru peni?” 19Dehuk ka ali pstreengan Dawid dhaka Merab weewa Soro ciida, kiya we Soro we wada na pstrengun Adriel seediq Mexolat ka heya.
20Mikal weewa Soro we smkuxul ba Dawid. Niqan ka seediq rmengo Soro ma, maha mndungus bale ooda nii mesa ka Soro. 21Lmngelung lhebun na ka Soro: “Biqun mu weewa mu ka Dawid, kiya ka mptraki heya. Kiya de pdaane ta baga seediq Peliset phuqil heya.” Kiya de mnpusal rmengo Dawid ka Soro: “Ali saya, maha su mu ama ka isu di.” 22Rmengo dmdayo heya ka Soro: “Gruusi rmengo ka Dawid: ‘Qtai! Smkuxul sunan ka qbsuran paru ma gmaalu ba sunan kana ka dqbsuran mdayo heya uri. Kiya saya de asi puama qbsuran paru ka isu di!’” 23Dqbsuran mdayo Soro we muyu so kari nii rmengo Dawid. Rmengo ka Dawid: “Msleexan qntaan namu ka mpuama qbsuran paru ho? Qrinuc ku ba ma tgbiciq ku ba seediq uri.” 24Meyah cmiyuk rmengo ka mdayo Soro, so nii ka kari na ka Dawid. 25Rmengo ka Soro: “So nii ka kari rrengo namu Dawid: ‘Uxe mangal pila psdehu pnstrengan ka qbsuran paru. Wano ba 1'00 qraqil qyqeya nrseno seediq Peliset. Kiya ka kmpciyuk pais qbsuran paru nanak.’” Lnglungan Soro we, so maha meniq baga seediq Peliset ka Dawid, mesa ka heya. 26Dqbsuran mdayo Soro we srengo daha Dawid ka so nii kari. Kiya de mqaras mpaama qbsuran paru ka Dawid. Ini dehuk ka ali na. 27Mtutuy ka Dawid ma dseediq smnegul heya. Mosa phuqil 2'00 heyi seediq Peliset ma, desun na ka qraqil eyu kmpaama qbsuran paru. Kiya de Soro we, pstrengun na Dawid ka Mikal weewa na. 28Soro we, qmita gaga theyaq Dawid ka Utux Tmninun ma, Mikal weewa na we gmaalu Dawid uri de, 29krinah miicu Dawid ka Soro ma, kmpais Dawid klaali ka heya di.
30Pkelu meyah mccebu ka dqbsuran supi Peliset ciida, mgkala malu noda kana mdayo Soro ka noda Dawid. Kiya de spruun riyung ka ngayan na.
Currently Selected:
1 Samuel 18: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
