1 Qbsuran Paru 3
3
Dnurun Selomoh
(2 No 1:3-12)
1Selomoh we msterung mangal weewa Paroh qbsuran paru Micrayim. Desun na alang Dawid, betaq na qhdeun smalu ka sapah qbsuran paru ma sapah thmkuwan Utux Tmninun ma pnharac qnalang alang Yerusalem. 2Ali ciida, ida smapuh dgiyaq biciq ka dheya, ado ini smlei ka sapah thmkuwan tnngayan Utux Tmninun nana.
3Selomoh ge, smkuxul Utux Tmninun ma muyu gaya bnege Dawid tama na ka heya we, ida smapuh ma pskenux psqama dgiyaq biciq ka heya uri. 4Selomoh we mosa smapuh Gibon hiya. Ado niqan ba ngayan dgiyaq biciq ka hiya han. Selomoh we mege snapuh psqmaun 10'00 tnbugan ka heya. 5Meeniq Gibon keeman ciida, Utux Tmninun we spooda na sepi mtqita heya ma, rmengo Selomoh: “Maanu ka bbege mu sunan we, tduwa su mesa kenan.” 6Cmiyuk ka Selomoh: “Gnhuwe su bale mege gnaalu Dawid tama mu tnqliyan su ka isu. Ado heya we stmaun bale, msderux noda ma, mnugbale ba ka lhebun na meepah berah su. Dungal we rngiyan su paru ba gnhuwe, sbege su heya ka 1 laqi mptleung tluungan qbsuran paru mntena ali saya. 7Saya, Utux Tmninun, Utux Baro mu! Isu ka pnlutuc tnqliyan su mqbsuran paru rmirih Dawid tama mu. Kiya de, laqi ku ba, ini ku ba kela ka ooda. 8Yaku tnqliyan su we meeniq ku seediq gneegan su. Seediq nii we hbaro bale ma ini snqlingi smepu. 9Maanu so kiya de ani su ba rabang. Biqi tnqliyan su ka kkela lmngelung, so mu klaun psgao ka seediq su ma, ppsaanak qmita malu ma naqah. Nasi uxe so kiya de huwa mu kesun psgao ka dseediq su nii di?”
10Ado dmnurun so oda nii ka Selomoh, kiya ka kuxul riyung Utux Baro. 11Rmengo heya ka Utux Baro: “Ado mesa su oda nii, ini su pesa qqbsiyaq su muudus, qqbleyaq su ma, uxe uri we pphuqil pais su. Wano ba kkela su psgao, tduwa psaanak mbahang ka pnesa su. 12Qtai! Mpuyu ku so kari su moda. Qtai! Mbege ku knkela ma lhebun mkela psaanak, uka ani ima mntena isu tgberah su. Bobo su uri we uka ani ima maha mtutuy mntena isu uri. 13Uxe su pnesa we biqun su mu hiya uri. Qnbleyaq, knledax kana kndesan su we uka ani kingal ka qbsuran paru mpgkala sunan. 14Nasi su thei moda elu mu, muyu su qmeepah kari pndakar ma gaya pndakar mu, mntena so qneepah Dawid tama su de, pqbsyaqun misu pkuudus.”
15Mtutuy ka Selomoh, tai! Sepi ka nii. Kiya de meyah Yerusalem ka heya ma mheyu berah kulu pnsdhegan Utux Tmninun, mege snapuh psqama ma snapuh ptbale. Dungal we pure uqan mqaras qnaras smbleyaq qdiyal kana dqbsuran mdayo ma dtnqliyan na.
Psgao Mqriqu Ooda ka Selomoh
16Ciida, meyah mheyu berah qbsuran paru ka 2 mqedil kbrexun. 17Rmengo ka 1 mqedil: “Pusu tnsapah mu! Yaku ma mqedil nii we gaga miyan msuupu meeniq 1 sapah. Tnlaqi ku 1 laqi ciida we, mneniq sapah ka heya. 18Bobo na mk3 ali de mntuting laqi ka mqedil nii uri. Msuupu miyan sapah hiya we uka ba ani ima, wano 2 miyan ba nanak. 19Wada 1 rabi, mtaqi ka heya nii ciida we rikan na ka laqi na ma wada mhuqil. 20Kiya de ceka rabi, mtaqi ku ciida we mtutuy ka heya ma ngalun na ka laqi mu ptqiun na berah na. Laqi mnhuqil we psaun na berah mu. 21Mtutuy ku ma satang ku mpnunuh laqi ciida, qtai! Kela su hiya nii mhuqil ka laqi. Kruyun mu ba qmita mgrebu ka laqi, qtai! Uxe laqi tnlaqi mu ka nii.” 22Rmengo ka 1 mqedil: “Uxe! Laqi mu ka nii muudus nii. Ga mhuqil gaga ka laqi su!” Rmengo ka mqedil pnlaale: “Uxe! Nii mhuqil nii ka laqi su. Gaga muudus ka laqi mu.” Kiya de pkeekan kari berah qbsuran paru ka dheya. 23Rmengo ka qbsuran paru: “Rmengo ka mqedil nii: ‘Laqi mu ka nii muudus nii. Ga mhuqil gaga ka laqi su.’ Rmengo ka mqedil gaga: ‘Uxe! Nii mhuqil nii ka laqi su. Gaga muudus ka laqi mu.’” 24Rmengo ka qbsuran paru: “Saani ku mangal hlmadac!” Desun daha berah qbsuran paru ka hlmadac. 25Rmengo ka qbsuran paru: “Tgdahai ka laqi gaga muudus, icil we biqi mqedil nii, icil na dungal we biqi mqedil gaga.” 26Bubu dlaqi gaga muudus de pslhebun riyung laqi na de rmengo qbsuran paru: “Pusu tnsapah mu, braho su bale bqani mqedil kiya ka laqi muudus nii, iya bale phqili ka laqi!” Rmengo ka mqedil kiya: “Uxe nnaku ka laqi nii ma, uxe nnisu ka laqi nii uri, kiya de asi tgdahai!” 27Cmiyuk rmengo ka qbsuran paru: “Bqani mqedil nii ka laqi muudus nii, iya bale phqili, ado bale ba bubu na ka mqedil nii.” 28Mbahang pnsgao qbsuran paru nii ka kana seediq Israel we smparu bale heya kana. Ado qtaan daha gaga niqan knkela Utux Baro ka lhebun na ma, mtduwa psgao pprngagun.
Currently Selected:
1 Qbsuran Paru 3: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
