1 Qbsuran Paru 4
4
Dqbsuran Mdayo Selomoh
1Selomoh we mqbsuran paru kana Israel. 2Dqbsuran mdayo heya we so nii: Paru msapuh: Ajaryahu laqi Cadoq. 3Mpatis: Elixorep ma Axiyah 2 laqi Siysa. Mpatis ndaan: Yehosapat laqi Axilud. 4Qbsuran supi: Benayahu laqi Yehoyada. Msapuh: Cadoq ma Ebyatar. 5Mpqlahang dqbsuran: Ajaryahu laqi Natan. Slingan qbsuran paru: Jabur msapuh. 6Axisar mpqlahang tnqliyan qbsuran paru. Mpqlahang mqeepah: Adoniram laqi Abda.
7Selomoh we pniqan na 12 heyi mpqlahang nyusan dxeral ka kana qlhangan Israel. Mbege uqun qbsuran paru ma tnsapah na peeyah qlhangan daha ka dheya ma pn1 idas knkingal knkawas. 8Dmpqlahang ma nyusan dxeral we so nii: Ben Xur gaga dgiyaq Eprayim 9Ben Deqer gaga Makac, Saping, Bet Semes ma Eylon Bet Xanan 10Ben Xesed gaga Yalubo, Sokoh ma kana dxeral Xeper. 11Ben Abinadab gaga kana dgiyaq Dor. Tapat weewa Selomoh ka mqedil na. 12Baana laqi Axilud gaga Tanak, Mgidu, kana dxeral Bet Sean gaga ssiyo Cartan tgtruma Yijreel, peeyah Bic San mooda Abel Mexolah betaq thngali Yaqmeam. 13Ben Geber gaga Ramot gaga Gilad lualang Yair laqi Menaseh, 60 lualang paru pntqiri mharac ruhu limuk rhengun gaga Argob dxeral Basan. 14Axinadab laqi Ido gaga dxeral Maxanayim 15Aximaac gaga dxeral Naptaliy. Basmat weewa Selomoh uri ka ma mqedil na. 16Baana laqi Xusay gaga dxeral Aser ma Bealot. 17Yehosapat laqi Paruax gaga dxeral Yisaskar. 18Simiy laqi Ela gaga dxeral Binyamin. 19Meeniq dxeral Gilad, kiya ka dxeral Sixon qbsuran paru Amori ma Og qbsuran paru Basan. Niqan ka Geber laqi Uriy. Wano heya nanak ka qmlahang dxeral nii.
Knrana Qnlhangan Selomoh
20Mntena bnaquy rcilung knhbragan ma, tqqaras mekan ma mimah ka seediq Yehudah ma Israel. 21Selomoh we qmlahang kana qlhangan peeyah yayung Paru ma dxeral seediq Peliset betaq ayus qlhangan Micrayim. Muudus ka Selomoh han we mege qyqeya qbsuran ddooyun ka qqlhangan ma thei heya.
22Ddooyun Selomoh knkingal ali: Tgmalu ba nemu mugi biciq we 30 koru ma 60 koru nemu mugi paru. 23Mtbeno ba 10 dapa, 20 dapa tnbugan nganguc, 1'00 miric, dungal we rqenux, rqenux rabang, wawa rqenux ma mtbeno ba qbheni. 24Selomoh ge, qmlahang kana dxeral quri pryaxan hido yayung Paru peeyah Tipsax betaq Ajah ma, kana dqbsuran paru pryaxan hido yayung Paru. Qtaan na kana ka ssiyo alang we mmsbleyaq bale kana. 25Muudus ciida ka Selomoh ge, peeyah Dan betaq Beerseba ka seediq Yehudah ma Israel we bale meeniq toma lipas, toma nunuh malu bale kndesan daha. 26Truma sapah dapa dmay Selomoh we niqan 4 mang dapa dmay psaun rulu mccebu ma, dmoi 1 mang 20'00 supi mpaapa dapa dmay ka heya. 27Dmpqlahang nyusan dxeral ge, knkingal idas kana uqun Selomoh qbsuran ma dseediq na we ini daha psteqi mege. 28Dheya we muyu so pnsseegan daha, saan daha posa mugi paru ma knesa ka psaan, nii we uqun dapa dmay mccebu ma dapa dmay maapa.
Knkela Selomoh
29Utux Baro ge, biqan na egu bale knkela, gnkela ma, knuglahang lhebun mntena bnaquy ssiyo rcilung ka Selomoh. 30Knkela Selomoh we hmrinas knkela ani ima seediq quri nklaan hido ma, knkela ani ima seediq Micrayim. 31Mgkala knkela ani ima seediq ka heya, mgkala Eytan seediq Ejrax, Heyman laqi Maxol, Kalkol, Darda. Klaun bale mtqiri kana qlhangan ka ngayan na. 32Rnengo na ka kari tgpusu we betaq 30'00 ma, 15'00 ka uyas na. 33Smnetur quri qhuni ma speriq peeyah na qulic bale Lebanon betaq waso dapa gaga hmeru harac. Dungal we srengo na ba ka klegan quri qbheni, camac, kuyi ma qcurux. 34Skgulan dqbsuran kana qnlangan mnbahang knkela Selomoh ka seediq kana qlhangan. Mosa mbahang knkela Selomoh ka kana seediq.
Currently Selected:
1 Qbsuran Paru 4: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
