1 Qbsuran Paru 2
2
Kari Hniti Dawid Selomoh
1Smdaling hnqilan na ciida ka Dawid de, htiyan na rmengo ka Selomoh laqi na: 2“Mpkkesa ku elu daun seediq bobo dxeral da. Isu we kremun ma krseno bale. 3Ndwai bale muyu ka elu Utux Tmninun pnatis gaya Moseh. Thei moda ka kari pndakar, gaya pndakar, gaya bneku ma, gaya ddaun. Tai so ani maanu ka oda su, ani su mosa ani inu we, ida msleelu bale ka kana noda su. 4Utux Tmninun we, ida mpbale rnengo na quri kenan, rmnengo: ‘Nasi tqqlahang noda daha ka lqlaqi laqi su ma, spoda bale lhebun daha smtama bale ba meepah berah mu we, ida uxe mpsetuq tleung tluungan qbsuran paru Israel ka dheya.’ 5Ida su klaun ka Yoab laqi Ceruyah noda na kenan. Wada phuqil 2 qbsuran supi Israel, kiya ka Abner laqi Ner ma Amasa laqi Yeter. Ani ya ali mtbale ka heya we, ngalan na so niqan mccebu psdara phuqil 2 seediq nii. Dara mccebu nii we wada sricuh habik hwinuk na ma ramil papak na. 6Maanu so kiya de pooda so kkela su lmngelung ooda ma, iya pgbleqi betaq bhege tunux na posa tuxan mnkuung ka heya. 7Asi su ka sblequn qmita ka lqlaqi Barjilay seediq Gilad, pspui mekan hnpure uqan su. Ado qduriq ku peeyah Absalom qbsuran su ciida, dheya ka dmayo kenan. 8Qtai! Gaga sunan hiya ka seediq Binyamin pneeyah Baxurim ma, Simiy laqi Gera. Ali mnosa ku Maxanayim ciida, wada sgcuqi ba smngayan kenan. Bobo na de meyah yayung Yarden smterung kenan ka heya. Kiya de wada ku smdehu Utux Tmninun heya: ‘Uxe misu phqilun hlmadac ka isu.’ 9Kiya de, saya de, iya kesi uka qnquwan noda ka heya. Niqan su knkela ka isu. Ida su mpkela mphuwa su smterung heya ma, so maha mbhege snuunux na ma sdara mremux tuxan mnkuung ka heya.”
Hnqilan Dawid
10Mtheyaq mtaqi pusu rudan na ka Dawid ma, saan daha smeku habung alang Dawid. 11Qbsranun na Israel ka Dawid we 40 knkawas: 7 knkawas ka qnlhangan na meniq Xebron, 33 knkawas ka qnlhangan na meniq Yerusalem. 12Selomoh we tleung tluungan qbsuran paru Dawid tama na ma, mkkere riyung ka qlhangan na.
Hnqilan Adoniya
13Adoniyah laqi Xagit we mosa Batseba bubu Selomoh hiya. Smiling heya ka Batseba: “Ye pssbleyaq ka seeyah su hini ho?” Cmiyuk rmengo ka heya: “Pssbleyaq ka seeyah mu!” 14Rmengo dungal ka heya: “Niqan kari rengo mu sunan.” Rmengo ka Batseba: “Rengo wa!” 15Rmengo ka Adoniya: “Ida su klaun, naka ba nnaku ka qlhangan nii. Tmnara qqbsuran mu paru ka kana seediq Israel uri. Kiya de wada ngalun mtswai mu ka qlhangan nii. Ado nnheya ka qlhangan nii we, pnooda Utux Tmninun kiya. 16Saya, niqan ka ppesa mu sunan. Braho su iya ku hiya hteri.” Rmengo heya ka Batseba: “Rengo peni!” 17Rmengo ka heya: “Rngagi ka Selomoh qbsuran paru, biqi kenan mpmuqedil mu ka Abisag laqi mqedil seediq Sunem. Ado uxe mphetur sunan ka heya.” 18Cmiyuk ka Batseba: “Malu ma, rnngane su mu qbsuran paru.”
19Kiya de, meyah Selomoh hiya ka Batseba meyah dmayo rmengo Adoniyah. Mheyu smterung bubu na ka qbsuran paru ma, tmbqelic thmuku berah na. Mbrinah tleung tluungan na ka heya ma spsnama na tluungan ka bubu na uri. Kiya de tleung narac qbsuran paru ka bubu na. 20Rmengo ka Batseba: “Niqan 1 biciq ba pesa mu sunan. Iya ku hiya hteri.” Rmengo heya ka qbsuran paru: “Bubu, pgsaun su we rngagi ku. Pnesa su we uxe ku mhetur.” 21Rmengo ka Batseba: “Abisag laqi mqedil seediq Sunem we biqi Adoniyah qbsuran su maha mpmuqedil na.” 22Cmiyuk bubu na ka Selomoh: “Ma su spesa Abisag laqi mqedil seediq Sunem ka Adoniyah ho? Tduwa su mesa qnlhangan! Qbsuran mu ka heya. Uxe wano heya, pgsaani ka Ebyatar msapuh ma Yoab laqi Ceruyah uri!” 23Kiya de smdehu Utux Tmninun ka Selomoh: “So nii pnesa na ka Adoniyah we, gisu migin hnqilan. Nasi uxe we, tai so pkdira kenan ka Utux Tmninun. 24Pnheyu kenan ka Utux Tmninun ma, ptluungun ku na tluungan qbsuran paru Dawid ma, pnuyu ku sntangan na pheyu ku tnsapah. Saya mpsdehu ku quri Utux Tmninun muudus ani betaq knuwan, asi ka mhuqil ali saya ka Adoniyah.” 25Kiya de smkagul Benayahu laqi Yehoyada mosa phuqil Adoniya ka Selomoh, kiya de mhuqil ka heya.
Lixan ka Ebyatar ma Hnqilan Yoab
26Rmengo msapuh Ebyatar ka qbsuran paru: “Osa Anatot dxeral su nanak ka isu! Naka misu phqilun, ado mnheal su kulu pnsdhegan Utux Tmninun Bukung berah Dawid tama mu ka isu. Dungal we mnsuupu su mqraqil tama mu ka isu, kiya ka uxe ku pphuqil isu saya.” 27Kiya de wada plaxun Selomoh ka Ebyatar ma, ini na pqpahi msapuh Utux Tmninun ka heya. Kiya ka wada ma bale quri tnsapah Eriy rnengo Utux Tmninun mneeniq Siylo ciida.
28Ani yaa ini dayo Absalom ka Yoab we, dmnayo bale Adoniyah ka heya. Wada quri Yoab hiya ka kari nii de, asi qduriq kobu Utux Tmninun hiya ma mosa tmelung urung spuhan ka heya. 29Rmengo Selomoh ka duma seediq: “Wada qduriq kobu Utux Tmninun ka Yoab, qtai! Gaga ssiyo spuhan.” Kiya de smkagul Benayahu laqi Yehoyada ka Selomoh, rmengo: “Osa, sai phuqil ka heya.” 30Mosa kobu Utux Tmninun ka Benayahu ma rmengo Yoab: “So nii ka rnengo qbsuran paru: ‘Latac nganguc!’” Rmengo ka heya: “Uxe ku. Mphuqil ku hini.” Kiya de mbrinah mosa rmengo qbsuran paru ka Benayahu, rmengo: “So nii ka kari Yoab.” 31Rmengo heya ka qbsuran paru: “Tduwa su muyu kari na, phqili ka heya ma rusi. So uxe mquri yaku ma tnsapah tama mu ka dara seediq knhmetan pnhuqil Yoab. 32Utux Tmninun ge, so na pqriun heya nanak ka cniyuk dara knhmetan na phuqil. Ado wada na phqilun ka 2 heyi mgkala heya knsderux ma knmalu. Kiya ka Abner laqi Ner qbsuran supi Israel ma Amasa laqi Yeter qbsuran supi Yehudah. Ini kela ka Dawid. 33Dara 2 seediq nii we so mciyuk nanak quri Yoab ma lqlaqi mslutuc na betaq ani knuwan. Wano ba Dawid ma lqlaqi mslutuc na, sapah na ma tluungan qbsuran paru na we, tai so sblequn Utux Tmninun ani betaq knuwan.” 34Kiya de Benayahu laqi Yehoyada we mosa phuqil Yoab ma saan na smeku sapah na tadus brenux hiya ka bqerus na. 35Qbsuran paru we Benayahu laqi Yehoyada ka prihan na maangal qbsuran supi ma Cadoq msapuh ka spririh na Ebyatar.
Hnqilan Simiy
36Smkagul seediq ka qbsuran paru mlawa ma rngagan na ka Simiy: “Osa smalu sapah su Yerusalem hiya ka isu ma eniq hiya. Kiya de iya ba latac peeyah hiya. 37Klai bale, mlatac su mtaril yayung Qidron de, ida su mphuqil! Dara pnhuqil su we mciyuk nanak sunan.” 38Rmengo qbsuran paru ka Simiy: “Malu bale ka kari nii. Mpuyu ku so nkari qbsuran paru mu.” Kiya de wada bsiyaq ba ka nniqun na Yerusalem hiya ka Simiy.
39Kiya de hmrinas 3 knkawas, mosa qduriq Akis qbsuran paru Gat laqi Maakah qbsuran paru hiya ka 2 tnqliyan na. Ciida, niqan ka mosa mneeru Simiy: “Qtai! Gaga Gat hiya saya ka dtnqliyan su.” 40Asi tutui ka Simiy ma, psramal dapa roba mosa migin tnqliyan na mquri Akis Gat hiya. Speeyah na Gat desun na sapah ka 2 tnqliyan na. 41Meyah smneeru Selomoh ka duma seediq: “Kndalax peeyah Yerusalem mnosa Gat ka Simiy we gaga dehuk sapah da.” 42Kiya de smkagul seediq ka qbsuran paru mlawa Simiy ma rngagan na: “Wada ku smndehu Utux Tmninun pqlahang rmengo sunan: ‘Qlahang! Nasi su mlatac mosa ani inu de mphuqil su ali ciida’ knesa misu peni? Ciida ka isu we rmengo su kenan: ‘Malu bale ka kari nii. Mpthei ku.’ 43Ma su wada ini dehuk muyu sndhegan su Utux Tmninun ma pndakar mu rmengo sunan ho?” 44Rmengo dungal Simiy ka qbsuran paru: “Ida su klaun kana ka qnnaqah noda su quri Dawid tama mu. Utux Tmninun we spquri na tunux su nanak ka qnquwan noda su nii. 45Kiya de sblequn ka Selomoh qbsuran paru ma, pgdhegun Utux Tmninun ani betaq knuwan ka qbsranan qlhangan Dawid.” 46Kiya de qbsuran paru we posa kari Benayahu laqi Yehoyada de mosa phuqil Simiy ka heya. So nii, pgdehu baga Selomoh ka qlhangan.
Currently Selected:
1 Qbsuran Paru 2: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
