1 Yohane 4
4
Bgihur Utux Baro ma Kmpais Kiristo
1Kana sgaalu mu, iya snhii kana ka bgihur. Asi ta ka daun smeung kenu ka pneyah Utux Baro. Ado hbaro ba uxe bale mpgeela kari nii meyah bobo dxeral nii da. 2Kana pgkela Yesu Kiristo we kiya ka Bgihur pneeyah heyi de, kiya ka pneeyah Utux Baro. So kiya de, maha namu klaun kenu ka Bgihur Utux Baro. 3Kana ini pgkela Bgihur Yesu we, uxe pneyah Utux Baro. Bgihur nii we kiya ka kmpais Kiristo. Bnhangan namu meeyah ka heya, saya de ga meniq bobo dxeral da.
4Lqlaqi biciq, nuUtux Baro ka yamu, wada namu ini baka ka uxe bale ba mpgeela kari. Ado mgkala knparu na meeniq qnlangan ka ga meeniq ckceka namu. 5Nbobo dxeral ka dheya, kiya de rmengo oda knlangan. Mpqbahang dheya ka seediq bobo dxeral. 6NuUtux Baro ta ka ita. Mkela Utux Baro we mpqbahang ita. Uxe nuUtux Baro we uxe mpqbahang ita. Peeyah so nii de, maha ta klaun bgihur kari bale ba ma bgihur mpqberiq.
Gnaalu ka Utux Baro
7Kana sgaalu mu, pggaalu ta ka ita. Ado pneeyah Utux Baro ka gnaalu. Kana niqan gnaalu we pneeyah Utux Baro kana ma mkela Utux Baro uri. 8Uka gnaalu we kiya ka ini kela Utux Baro. Ado gnaalu ka Utux Baro. 9Smnkagul 1 ba laqi na meyah bobo dxeral ka Utux Baro. So ta spooda heya maangal ta knuudus. So nii de, truura ka gnaalu na ita. 10Uxe ita ka wada gmaalu Utux Baro, heya ka wada gmaalu ita. Betaq smkagul laqi na ririh qnquwan noda ta wada ngalan snapuh psruwa qnquwan noda di. So nii we kiya ka kesun gnaalu. 11Kana sgaalu mu, so nii gmaalu na ita ka Utux Baro we, ita de asi ta ka mggaalu. 12Uka ka qmnita Utux Baro. Nasi ta pggaalu we, meeniq ita ka Utux Baro. Gnaalu na we maha mttuku bale meniq ita di.
13Ado Utux Baro we wada na sbege ita ka Bgihur Utux na. Mooda so nii, klaun ta gisu ta meniq heya ka ita. Heya uri we ga meeniq duita uri. 14Tama Baro we smkagul laqi na mpbukung mdoi baga kana seediq bobo dxeral. Nii ka ntaan nami ma gisu nami spgkeela yamu. 15Kana pkela Yesu we kiya ka laqi Utux Baro we, ga meeniq heya ka Utux Baro. Heya uri we ga meeniq Utux Baro uri. 16Klaun ta bale ma snhiyun ta bale, Utux Baro we gmaalu ita.
Gnaalu ka Utux Baro. Meniq ckceka gnaalu we ga meniq Utux Baro uri. Utux Baro we ga meniq dheya uri. 17So nii de, mttuku riyung meniq ita ka gnaalu. Maha ta uka kniicu meeniq ali psgeegan ciida. Ado hmuwa mesa ka Kiristo de, maha ta so kiya meniq bobo dxeral nii uri. 18Uka kniicu ka meeniq gnaalu. Mttuku bale ka gnaalu we qmada kniicu nganguc. Ado ckceka kniicu we niqan pkdira. Seediq niqan kniicu we ini knttuku niqan na gnaalu. 19Gmalu ta we, ririh wada plaale gmaalu ita ka Utux Baro. 20Nasi rmengo. “Gmaalu ku Utux Baro” mesa ka seediq, kiya de gisu tmraqil mtswai na de, kiya ka mberiq. Ini gaalu mtswai qtaan na de, uxe mpgaalu Utux Baro ini na qtai. 21Gmaalu Utux Baro we, asi ka gmalu mtswai na uri. Nii we kari pnosa na ita ka Utux Baro.
Currently Selected:
1 Yohane 4: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
