1 Yohane 3
3
1Yamu we, tai, teyal ba gnaalu Tama bnege na ita, ita de tduwa ta kesun laqi Utux Baro. Bale ba laqi Utux Baro ka ita. Ini kela ita ka seediq bobo dxeral we, ado uxe mnkela Tama ka dheya. 2Kana sgaalu mu, ita saya we laqi ta Utux Baro. Mpmaanu ta ka nexal de ini truura kiya na. Wano nii ka klaun ta, ptruura pqita ciida ka Kiristo de: Maha ta so mntena heya. Ado bale ba mqita ta hnyegan na. 3Kana smatang heya na we, kiya ka ga psbgurah heya nanak, mntena so Kiristo bgurah.
4Kana niqan qnquwan noda we, kiya ka smeeliq gaya. Smeeliq gaya de kiya ka qnquwan noda. 5Ida namu klaun, ptuura ka Kiristo we pkuuka qnquwan noda. Uka qnquwan noda ka heya. 6Kana ka ga meniq Kiristo we ini oda qnquwan noda. Kana niqan qnquwan noda we, uxe mnita heya ma ini kela heya uri.
7Lqlaqi biciq, iya dai pkridil seediq ka yamu. Meepah msderux noda we kiya ka seediq msderux noda. Mntena so Kiristo we msderux noda. 8Pneeyah Qbsuran Bgihur Naqah ka niqan qnquwan noda. Ado Qbsuran Bgihur Naqah nii we ida mooda qnquwan noda pnrdingan ka heya. Ptuura ka laqi Utux Baro de, pusu na we mpseelaq noda Qbsuran Bgihur Naqah. 9Kana pneyah Utux Baro we ini ooda qnquwan noda. Ado ga meniq lhebun daha hiya ka kari Utux Baro. Ini tduwa moda qnquwan noda uri, ado pneeyah Utux Baro ka heya. 10Nii de kiya ka ptuura ima ka laqi Utux Baro, ima ka laqi Qbsuran Bgihur Naqah. Kana meepah ini ksderux noda we, uxe pneeyah Utux Baro. Ini gaalu mtswai na we, so kiya uri.
Pggaalu
11Asi ta ka pggaalu ka ita. Nii we kiya ka bnhangan namu peeyah pnrdingan. 12Iya pntena Qayin, heya we nbgihur naqah, pnhuqil mtswai na. Hmuwa, ma na wada phuqil ka heya ho? Ado naqah ka qneepah na, mtswai na we msderux ka kiya.
13Kana mtswai, nasi qmnaqah yamu ka seediq qnlangan nii we iya skluwi. 14Klaun namu, gisu ta mlatac hnqilan mremux knuudus ka ita da. Ado gmaalu ta mtswai ta. Uka gnaalu we ga meniq hnqilan kiya na. 15Kana tmraqil mtswai we, kiya ka gisu phuqil seediq. Klaun namu uri, kana pnhuqil seediq we uka knuudus ani knuwan ka ckceka daha. 16Ririh ita wada qmada knuudus na ka Kiristo. Peeyah so nii kiya ka klaun ta maanu kesun ka gnaalu. Ita uri we ririh mtswai ta qmada ta knuudus ta uri. 17Kana niqan dnoi bobo dxeral ge, mita ini knttuku ka mtswai na betaq meluk ggaalu lnglungan na we, maha hmuwa meniq ckceka na ka gnaalu Utux Baro da ho? 18Lqlaqi biciq, pggaalu ta we, iya wano kari ma hema nanak. Asi ta ka ptrwaun ka noda ta ma lnglungan ta peeyah lhebun.
Uka Kniicu Berah Utux Baro
19Peeyah so nii de, maha ta klaun, ita we pneeyah ta kari bale ba. Kiya uri we mpdungus ta meniq berah Utux Baro. 20Ani ga mseang ida ka lhebun ta we, mgkala knparu lhebun ta ka Utux Baro. Ani maanu ida na klaun kana. 21Kana sgaalu mu, nasi ini pseru ita ka lhebun ta we, mptduwa ta uka kniicu meeniq berah Utux Baro da. 22So kiya de kana ppesa ta de, maha ta peeyah heya mangal. Ado muyu ta kari pnosa na, meepah ta ooda qqrasun na.
23So nii ka kari pnosa Utux Baro, asi ta ka snhii ngayan Yesu Kiristo laqi na. Kiya uri we muyu ta kari pnosa na pggaalu ta. 24Muyu kari pnosa Utux Baro we, meeniq Utux Baro. Utux Baro uri we meeniq heya uri. Peeyah ta so nii de, maha ta klaun Utux Baro ga meniq ita hini uri. Nii we ririh Mrtaso Bgihur bnege na ita.
Currently Selected:
1 Yohane 3: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
