Dakɔr deg 17
17
Bɨraɓe tɔl deg kɨ yokoosɨ
1Kamla Bɨraɓe el Moij an: 2El Eleajar ngon Aarõ ngejanyamosɨ ad ɔi ngan jog dan horrt, na kɨ ũ horr kɔ sãi kɨta ngan jog'n non ĩn kɨndah kɔtkokɨɗa kɨta Bɨraɓe 3Ngan jog lo deg'n non ɗan majal kɨ tee koi ye, a ndan mbujmbuj ɗan bewin, ta dɨngɨr kɨta kutɨn taa kɨta ĩn nyag'n lan kɨnõ Bɨraɓet, ĩn kɨnda kɔt kɔkɨɗa, a ten nyagakamdɔt kɨta Israelag. 4Eleajar ngejanyamosɨ ɔi ngan jo ningakasɨg lo deg kɨ horr õd ɗan bewin ta dɨngɨr kɨta kutɨn taa. 5I nyagakamdɔt kɨta Israelag kad de kɨ ngejanyamosɨ al, ke kɨ girrnooj Aarõ al a ndɔt kad lahor nõkag kɨkootmbĩ, nõ Bɨraɓet al, na ɓeta i tit Kore be kɨ ɓut deg loa, tit'n, Bɨraɓe elɨn Eleajar kɨtakul Moij ye be. 6Loti got ngékawna lo Israel tube nyurɨn ta dɔ Moijt kɨ Aarõ anan: I tɔlɨn deg lo Bɨraɓe. 7Lon ngékawna kawɨn na kɨnat ndoorɨn Moij kɨ Aarõ, na unɨn kumd kɨdɔ kujkub ndɔdnat a ne, oon kilndii un dɔa, na kunj Bɨraɓe kɨɗangeɗeng teet. 8Moij kɨ Aarõ aw ɗan ta kujkub ndɔdnat, 9na Bɨraɓe el Moij an: 10Ɔrrɨn rosɨ kɔ ku ngékawnat'n ɗan na m'a m'nujd tajigne, na son ber kɨ takumd. 11Moij el Aarõ an: Un jo ndah horr loi na ɔi horr kɨdɔ dɨngɨrt kamt, ũ nõkag kɨkootmbĩ, tit, aw kanangbe ro ngékawnat utɨn dɔ majal lod kɨta Bɨraɓe ɓawong, na yokoosɨ la girrɨn. 12Aarõ un jo tit'n, Moij ela'n, ãin ngɔd kɨ ro ngékawnat na oo, yokoosɨ la girr ɗa kɨla ku degt. Kamla Aarõ la nõkag kɨkootmbĩ kɨta kutɨn dɔ majal lo deg. 13Duba ɗa mbɨna ngékoit kɨ ngékumkajɨr na yokoosɨ nya tan. 14Yokoosɨ tɔl deg 14 700 kanj tɨda deg'n oin kɨta Kore. 15Aarõ tel kɨ ro Moijt kɨ tabit kujkub ndɔdnat lon yokoosɨ nya tan.
Kagtɔsɨ lo Aarõ ɓa hut
16Bɨraɓe el Moij an: 17El Israelag na i ta kagtɔsɨ kɨɗa ji girrkoojt kɨɗan, ad i kagtɔsɨ kɨlah gidaijoo lo bɨradɔgt. 18A i ndang tɔ dekɨɗen dɔ kagtɔsɨt loa, na a i ndang tɔ Aarõ dɔ kagtɔsɨt lo Lebi. Kagtɔsɨ kɨɗa sumba dɔ bɨradɔ kɨɗen lo girrkoojd. 19A ũd kam kujkub ndɔdnat nõ najkɨmat lot'n m'a m'ndɔdɨnat sesɨ. 20A i titbe, de'n m'a m'kɔta a ne, i ĩ la kagtɔsɨ loa a ɓa hut ye, na m'a mad nyur lo Israelag'n nyurɨn dɔsɨt goto. 21Moij elta kɨ Israelag kɨ bɨradɔg lod tube, dekɨɗen ad kagtɔsɨ lon kɨgo girrkoojdt, ad i kagtɔsɨ kɨlah gidaijoo. Kagtɔsɨ lo Aarõ i dan kɨlodt. 22Moij ũ kagtɔsɨg'n non nõ Bɨraɓet kam kujkub najkɨmat. 23Loti Moij and kam kujkub najkɨmat na oo kagtɔsɨ lo Aarõ kɨ girrkooj Lebi, hut, na and kand kag amand kɨmbuj. 24Kamla Moij ɔi kagtɔsɨg tube nõ Bɨraɓet teen ad Israelag tube oon na dekɨɗen un kagtɔsɨ lon. 25Bɨraɓe el Moij an: I tel kɨ kagtɔsɨ lo Aarõ i laa nõ najkɨmat kɨtakad tel nyakɔj kɨta ngétaaɗɔɔ kad nyur lod goto nomt, na ɓeta oin. 26Moij tel ron go tat ɗa tit'n, Bɨraɓe ndan mbera. 27Israelag elɨn Moij anan: Oo, tamj ndɨ tĩ, kɨ ndɨ kɨ tuj, kɨ ndɨ kɨ tujɨn tube. 28Dekɨɗen'n ndɔt nderbe in ndɔt nderbe, kujkub londɨt lo Bɨraɓe a oi. Tamj a tĩ tube ale?
Currently Selected:
Dakɔr deg 17: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
