Dakɔr deg 16
16
Kore taaɗɔ nat kɨ deg mɨta
1Kore ngon Jisehar, ngon Kehat, ngon Lebi, taan ɗɔɔ nat kɨ Datan kɨ Abiram ngan Eliab kɨ Oon ngon Pelet, tu mɨta ĩn ngan Ruben. 2Deg'n non ɓain ndoorɨn Moij nat kɨ deg ɓujoo kɨ dɔmi ku Israelagt. Ĩn kɨbog lo ngékawna ku degt'n a kunɨnd lo kawnat, deg kɨ tɔd kɔ. 3Kawɨn na ndoorɨn Moij kɨ Aarõ, elɨnd anan: Asɨj ta kɨta ngékawna tube, tube'n ĩn kɨjaɓat, na Bɨraɓe i kudt. Kɨtɔɗi i tɔin dɔsɨ kɨ dõ dɔ ngékawnat lo Bɨraɓe a? 4Lon Moij oo dɔ ta'n non ye so ningt kɨ takumɨn, 5kamla elta kɨ Kore kɨ ɓut deg loa tube an: Loti a ne, Bɨraɓe a ɔj de'n i lon, de'n i kɨjaɓat. A ad de'n non ɗe nderbe kɨ ront, de'n kɔta a ne, ĩla a ada ndɔt kɨront ye. 6I ɗan nya 'nten. Ĩ Kore kɨ ɓut deg loi tube, ɔin ngan jo ndah horr. 7Loti a ne, i lan horrt na i lan nõkag kɨkootmbĩ dɔt nõ Bɨraɓet, na j'a j'oo de'n Bɨraɓe a kɔta i de'n non la a i kɨjaɓat ye. Asɨmsesɨ be ĩn ngan Lebi. 8Moij el Kore an: Ĩn ngan Lebi oon dɔ tajigla.
9I nya kɨtẽbe rosɨt kad Luwah lo Israel ɔrr ndasɨ tadang ku ngékawnat lo Israel ad i ndɔt'n kɨ roat i ɗan kɨlaɓer kam kujkub londɨt lo Bɨraɓe'n i ɗàn nõ ngékawnat, i ɗan kɨlaɓer adɨnd a. 10Ɗe sesɨ nderbe kɨ ront ĩn kɨ ngan kõ, i tube, ngan Lebi, na i ndig ɗan kɨla janyamosɨ ɓaitɔ ɔ? 11I kɨta 'nten la ĩ kɨ ɓut deg loi, i kawɨn na i ndoorɨn Bɨraɓe. Aarõ i nõ i ndɨ nyurɨn ta kɨdɔat a? 12Moij la kun Datan kɨ Abiram ngan Eliab na turɨn anan: J'a j'aw al. 13I nya kɨtẽbe roit kad i tee sed kɔ dɔningt'n mba kɨ tej nunt kad j'oi kam dɨlalot, na i ndig kɔn, ke dɔjt ɓaitɔ ɔ? 14Rota, i dɔning'n mba kɨ tej nũt al la i ɗe sej tit ye, i ndɔɔ, ke dĩ nduu hã adj nyandubat al. I ndig tɔɔ kum deg'n ɗan e? J'a j'aw al. 15Moij ɓawong kɨtɔlsɔkɨr, na el Bɨraɓe an: Ot taa kadkari lod. M'taa korro lod kɨɗa al bat, m'ɗa nya kɨmajal kɨ de mad kudt al tɔ.
16Moij el Kore an: Loti ĩ kɨ ɓut deg loi, i ɗen nõ Bɨraɓet, ĩ kɨ deg loi kɨ Aarõ. 17Kɨ dekɨɗen un jo lon na ũ nõkag kɨkootmbĩ tit nda'n nõ Bɨraɓet, dekɨɗen kɨ jo lon, jɔg ɓujoo kɨ dɔmi, ĩ ho Aarõ ho, dekɨɗen un ngon jo lon. 18Dekɨɗen un ngon jo lon, ũ horrt na ũ nõkag kɨkootmbĩ dɔt ɗan ne tabit kujkub ndɔdnat, nat kɨ Moij kɨ Aarõ. 19Kamla Kore kun ngékawna tube ndoorɨn Moij kɨ Aarõ tabit kujkub ndɔdnat, na kunj Bɨraɓe kɨɗangeɗeng tee nõ ngékawnat tube. 20Bɨraɓe elta kɨ Moij kɨ Aarõ an: 21Ɔrrɨn rosɨ kɔ ku ngékawnat'n ɗan kɨta m'a m'nujd tajigne. 22Son ber kɨ takumd anan: A Luwah, Luwah lo ndilg lo dãro kɨɗen, de kɨ kɨɗabe ɗa majal a ne, kɨ wong ɗain dɔ ngékawnat tube e?
23Bɨraɓe el Moij an: 24El ngékawna an: Ɔrrɨn rosɨ kɔ ta kujkubt lo Kore kɨ Datan kɨ Abiram. 25Moij ɓai aw ro Datant kɨ Abiram na kɨbog lo Israel ndulon goa. 26Elta kɨ ngékawna an: Ɔrrɨn rosɨ ta kujkubgt lo deg kɨ majal'n ɗan, ot kɔdɨn nyag lod, na ɓeta ne, i nujɨn nat sed tit'n a nujɨn ne kɨtɔ majal lod ye be. 27Deg ɔrrɨn rod kad kujkubgt lo Kore, Datan kɨ Abiram na Datan kɨ Abiram teen duba ɗan ta kujkubgt lod nat kɨ nẽdg kɨ ngandg kɨdɨngã kɨ ngandg kɨdu, 28Moij el an: Kɨta nya 'nten la a i gerɨn ne i Bɨraɓe la lam kad m'ɗa nyag tube na m'un nya mad kɨdɔm al. 29Ĩla koi deg'n ɗan i tit koi deg tube, ke nya'n a tee dɔdt i tit nya kɨ tee dɔ degt tube a ne, Bɨraɓe lam al. 30Na ĩla Bɨraɓe mbagɨr ɗa nya kɨya mad kɨkij ad dɔning tee tan urdɨn tube nat kɨ nyag lod na kɨ awɨn Koo kumkajir, kamla a i gerɨn ta kad deg'n ɗan kidin Bɨraɓe. 31Lon eltag 'nten tɨga ye, dɔning tee tan girrdt. 32Dɔning tee tan, urd, ĩn kɨ ngékɨɓe lod nat kɨ ɓut deg lo Kore tube kɨ nyamajg lod tube. 33Udɨn kam lot kɨ Koo kumkajir, ĩn kɨ nyag lod tube. Dɔning ut dɔd ad goton kɔ ku ngékawnat. 34Israelag tubeg'n ɗan gugɨn dɔd ãin nõ sundt lon oon dɔ ko lod kɨta elɨn anan: Ad j'ãin na, na ɓeta ne, dɔning urj tɔ.
35Horr tee ko ro Bɨraɓet õ deg kɨɓujoo kɨ dɔmig'n lan horr nõkagt kɨkootmbĩ.
Currently Selected:
Dakɔr deg 16: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
