Dakɔr deg 18
18
Kɨla lo Lebiag
1Bɨraɓe el Aarõ an: Ĩ kɨ ngani kɨdɨngã kɨ ngé kɨ girrkoojt lo bɔwi nat sei, a i ton ɗagootal lo deg'n ɗan kam lot kɨjaɓat, na ĩ kɨ ngani a i ton ɗagootal'n ɗan lon ndɨ i ɗan ne kɨla janyamosɨ. 2Ad ngankõi, girr Lebi kɨ girr bɔwi, ndan rod nat sei ɗan kɨlaɓer adɨn lon ĩ kɨ ngani a in ne nõ kujkub najkɨmat. 3A ɗan kɨlaɓer kɨ nyag kɨ kam kujkub tube, na a ndɔt'n kɨ ro nyagt kɨndah kɔtkokɨɗa al, ke dɨngɨr, na ɓeta ĩn kɨ ing tu a oin. 4A ndan rod nat sei kad oon go kujkub ndɔdna a ɗan kɨlaɓer tube kam kujkubt, na de mad kɨɗang a ɗe nderbe rosɨt al. 5A in ngéɗakɨlaɓer kam lot kɨjaɓat kɨ dɨngɨr al na ɓeta wong lon ɗe dɔ Israelagt gog. 6Oon, m'ɔi ngankõsɨ Lebiag ku Israelagt, ĩn kadkari losɨ'n adɨn Bɨraɓe kad ɗan kɨlaɓer kam kujkub ndɔdnat, 7na ĩ kɨ ngani kɨdɨngã a i ɗan kɨlaɓer janyamosɨ kɨ nyag tube kɨ ɔj dɔ dɨngɨr kɨ lot kɨjaɓat, a i kɨlaɓer'n a i ɗan. M'adsɨ kɨlaɓer janyamosɨ kadkari, na de kɨɗang'n a ndɔt nderbe kɨ tit a ne, a tɔlɨna kɔ.
Nyasa lo ngéjanyamosɨ
8Bɨraɓe el Aarõ an: Oo, m'adi nyag tube'n ngomɨn kam kadkarigt'n admɨn, ad i nyag kɨ ndah kɔtkokɨɗa tube lo Israelag. M'adi nyag'n non kad i gaj loi, ĩ kɨ ngani kɨdɨngã mbãkɨnõt. 9Oo, nyag'n a i gaj loi ku nyagt kɨjaɓat'n a lan horro al laten: Kadkarig lod tube, kadkari ndujg lod tube, kadkarig tube kɨtɔ majal kɨ ɗa lod, kadkari kutdɔ majalg lod tube'n admɨn. A in nyag kɨjaɓat kɨtɔitɔi kɨtatɔi kɨ ngani kɨdɨngã. 10A i san nyag 'nten kam lot mad kɨjaɓat kɨtɔitɔi, dekɨdɨngã kɨɗen asɨ sa, ĩn nyag kɨja ɓat kɨtatɔsɨ. 11Oo, nyag'n in loi ɓaitɔ laten: Kadkarig kɨkun kɨ dõ tube lo Israelag kɨ kadkarig kɨ bii. M'adi ĩ kɨ ngani kɨdɨngãg kɨ kɨdẽg kɨtakul mberkɨnda kɨ tokɨnõt. Dekɨɗen kɨkar kam kujt loi a sa. 12M'adi kand kɨdasa lo nyako lod'n adɨn Bɨraɓe, yib kɨmajtɔi, kɨ man nduu kɨmajtɔi, kɨ nyako kɨmajtɔi. 13Kand kɨdasa kɨ tee dɔningt lod'n a ɗen ne adɨn Bɨraɓe a i loi. Dekɨɗen kɨkar nyang kam kujt loi a sa. 14Nya kɨɗen kɨnda tadang kam Israelt a i loi. 15Nya kɨɗen kɨ tee kamkõnt dasa, de ke dã'n Israelag a adɨn Bɨraɓe, a i loi, nya kɨɗabe, a i badɔ ngonderr de, a i badɔ ngonderr dã kɨyerr tɔ ho. 16A i badɔd lon ɗa nah kɨɗa, na nar badɔd a i nar arjã mi kɨgo nart kɨ kam lot kɨjaɓat, ad i gram dɔjoo. 17A i badɔ ngonderr mang ke ngonderr bat, ke ngonderr bĩã al kɨta ĩn nyag kɨjaɓat. A i tud mosɨd dɔ dɨngɨrt na a i lahor mboold i kadkari kɨlahorr, i sé kɨkootmbĩ kɨta Bɨraɓe. 18Dãd a i loi tit'n gua kɨ bii kɨ bɨnga kɨ kõt in ne loi. 19Kadkarig kɨjaɓat tube'n Israelag adɨn Bɨraɓe ye, m'adi, ĩ kɨ ngani kɨdɨngã kɨ kɨdẽ kɨta mberkɨnda kɨto kɨnõt. I kunkɔ kɨ dum mbel gida kɨ tokɨnõ nõ Bɨraɓet kɨtatɔi, kɨ kɨta koih tɔ ho. 20Bɨraɓe el Aarõ an: A i ngah nyanduba kam dɔningt lod al bat na gaj loi goto kudt. Mĩ la mĩ gaj loi kɨ nyanduba loi ku Israelagt ye.
Gaj kɨɗa ku kɨkɨlaht kɨta Lebiag
21Mad ngan Lebi gaj kɨɗa ku kɨkɨlaht kam Israelt nyanduba kɨta kɨlaɓer lod, i kɨlaɓer kam kujkub ndɔdnat. 22Israelag a ndɔt'n nderbe kɨ kujkub ndɔdna al, na ɓeta ta majal kɨ ɗa so dɔdt ad oin. 23Lebiag la a ɗan kɨlaɓer kam kujkub ndɔdnat, in to la a ton ɗagootal lod ye. I mberkɨnda kɨ tokɨnõ kɨ ngakat kɨ ngaka. A ngahn nyanduba ku Israelagt al bat. 24Mad Lebiag gaj kɨɗa ku kɨkɨlaht'n Israelag adɨn Bɨraɓe kadkarit kɨkun kɨ dõ. Kɨtɔ 'nten la m'eldɨn m'an: A ngahn nyanduba ku Israelagt al bat.
Lebiag adɨn gaj kɨɗa ku kɨkɨlaht
25Bɨraɓe el Moij an: 26A el Lebiag an: Lon a i tan gaj kɨɗa ku kɨkɨlaht lo Israelag, gajɨn m'adsɨ nyandubat, a unɨn gaj kɨɗa ku kɨkɨlaht kam kadkarit kɨkun kɨ dõ kad Bɨraɓe. 27Bɨraɓe a oo kadkari losɨ tit kɨ nya kɨ kɔi dɔ gart, tit man nduu kɨ kij kɨ kɔd lo ɓaat, i kadkari kand kɨdasa losɨ. 28Titbe a i lan kadkari kad Bɨraɓe ko kam gajgt kɨkɨɗa ku kɨkɨlahgt tube'n a i taan ji Israelagt na a adɨn Aarõ ngejanyamosɨ kadkari. 29Kam kadkarigt tube'n deg a adsɨn a ɔrrɨn kamt kɨta Bɨraɓe, kam nyagt kɨmajtɔi a ɔrrɨn gaj lo Bɨraɓe tit. 30A eld an: Lon a ɔrrɨn gaj kɨɗa ku kɨkɨlaht kam nyagt kɨmajtɔi ye, ndega a i lo Lebiag, tit nyako kɨdɔ gart, kɨ man nduu kɨ lo ɓaat. 31A i san kam lot kɨɗen, ĩ kɨ ngékɨɓe kɨta i nyabajisɨ lo kɨlaɓert'n i ɗan kam kujkub ndɔdnat. 32Lon a unɨn gaj kɨmajtɔi kam nyagt'n non a ne, majal kɨ ɗa goto dɔsɨt. A i yerrɨn kɨ kadkarig kɨjaɓat lo Israelag al, na ɓeta oin.
Currently Selected:
Dakɔr deg 18: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
