Nahum 1
1
Kunjɗang lo Bɨraɓe kɨ takɨgang dɔ Ninibt
1Ta'n tee ta Bɨraɓe dɔ ɓebo Ninibt. Maktub koonyakamndilt lo Nahum, de kɨ Elkos.
Bɨraɓe i Luwah kɨkootɓool ho i ngeɗamaj ho
2Bɨraɓe i Luwah kɨ Ngejang kɨ Ngendangɨrra,
Bɨraɓe i Ngendangɨrra kɨ ɓakot kɨ wong kɨtɔlsɔkɨr,
Bɨraɓe nda ngɨra dɔ madngétant
na ngom wong lon kɨta ngéndoorɨn.
3Bɨraɓe i ngendɨ bá dɔ wongt,
tɔg loa i ngãi,
na a ɔrr ta dɔ ngeɗamajalt al bat.
Bɨraɓe ndia kam nélmalt kɨ nélbarwãi,
kilndii i bu kɨ njaat.
4Bɨraɓe ndáng bahbo ad yii ndã,
ad bahg tube tutɨn.
Dɔning kɨ Basan kɨ Karmel tutɨn kãrɨm,
hutkam kɨ Libãt ndulo mbaw.
5Mbalbog yeen yɨkɨtyɨkɨt nõat,
doorg dudɨn kɨber,
dɔning ɓai ɓirɓir nõat,
dɔning kɨ ngendɨt tube.
6Nõ asɨ taaɗɔ wongt loa a?
Nõ asɨ ɗa loɗant nõ wongt loa kɨtɔlsɔkɨr a?
Ũ wong lon kɨtɨngabil tit horr be,
na riya mbalg kɨ ningt.
7Bɨraɓe i ngeɗamaj,
i loyaro lo de ndɔ kamkɔlt,
ndɨ nda kumɨn go degt'n ndɨ ɓan kulɨn.
8Kɨtakul mankõ kɨ ta lo pilpil a nujɨn ɓebo,
a tuɓa go madngétan mbã, kɨ kam lo kɨdiwt.
Ta'n Bɨraɓe elta deg kɨ Juda kɨ ngendɨ ɓebot kɨ Ninib
9Ɗi ɔjɨn kamsɨt kɨ i ndoorɨn ne Bɨraɓe a?
I ĩ la a nuj madngétang,
na madngétag a nujsɨn nja joo al.
10A titɨn kɨ kõng kɨ lan na wur,
ke titɨn kɨ deg kɨ ngékasɨɗag,
a õ horr mugɨj kɨtaagbe tit mũ kɨtut be.
11I kokɨroit ĩ Ninib la
de'n ɔj ta ɗa majal
ndoorɨn Bɨraɓe teet ye, ɔj ta kɨkari pãbe.
Bɨraɓe a nuj ɓe Ninib kɔ
12Bɨraɓe el deg kɨ Judat an:
Ke neni madngétasɨg tɔgd i tɔg ngãi,
ke koosɨn ngãi kaa ne,
a gangɨnd kɔ ad goton.
Ke neni m'ɗa sesɨ nyakɨto kaa,
m'a m'ɗa sesɨ nyakɨto gog al ta.
13Tajigla m'a m'tet jug lo madngétai kɔit kɔ,
m'a m'gang jinjir'n dɔin ne na m'a m'taa M'nyai dõ.
Bɨraɓe elta ngar kɨ Ninibt
14Oo nya'n hã Bɨraɓe nda mbera kɨtɔi, laten:
A i ngah de mad ku ngakait kad un tɔi dɔnt al,
m'a m'tɔrr ɓakumta yog kɨ kɨtɔsɨ kɨ ɗa kɨ hand nyẽ
kɨ i ndan kam kujt ndubgt m'tɨlad kɔ,
m'a m'ɗago dɔɓad kɨta ĩ nya kɨ kari pãbe.
Kɨta tɔga goto.
Currently Selected:
Nahum 1: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
