Mika 1
1
Pa hɔndo kɨta tujɨn a tee dɔ ɓebot kɨ Samari kɨ ɓebo kɨ Jerusalem
1Bɨraɓe elta Mika ngekelta kɨ Luwaht i de kɨ ɓe loa i Moreset; kaglo'n Jotam kɨ Akaj kɨ Ejekias, ĩn ne kɨ ngarg kɨ Juda. I nya'n Bɨraɓe tee dɔ ad Mika oo, ɔjɨn dɔ ɓebo kɨ Samarit kɨ ɓebo Jerusalem,
2Ĩn girrdeg tube, oon dɔ.
Ĩ dɔning kɨ nyag kɨ kamt tube, i nelɨn mbisɨ.
Ad Bɨraɓe Luwah, ndɨ la ta dɔsɨt
Londɨnt ngendɨ kam kujt lon kɨjaɓat
3Kɨtɔ oon. Bɨraɓe tee kam londɨnt,
a ɗisɨ, a ndia dɔ logt kɨdɔ dɔningt.
4Mbalbog a nyẽn girrat,
hollog a teen tad
tit'n hã tiw tej a nyẽn kad horrt,
tit'n hã man a ãin dɔ door lot be.
5Nyag 'nten tube ɗan nya
kɨta tɔidɔta lo ngakaa Jakob,
kɨtɔ majal lo Israel,
Tɔidɔta lo ngakaa Jakob i ɗi a?
I kɨlaɗa deg kɨ ɓebo Samarit ale?
Majal lo ngékɨɓe lo Juda i ɗi a?
I kɨlaɗa deg kɨ ɓebo Jerusalem ale?
6Kɨtɔ 'nten m'a mad ɓebo
Samari tel duw mbal kam mut,
kad tel lo hɔ nduu.
M'a m'tɔsɨ mbalg loa
m'tɨlad kam hollot,
m'a m'tɔ kujg loa kɔ mbã kɨ girrt ber.
7Ɓakumta nyag loa tube, a tɔɔnd kɔsɨkɔsɨ;
nyag'n ndugo kɨ nar kaya a land horro.
M'a m'nuj yog loa kɔ tube,
kɨta kawd kɨnat kɨ nyabaji kaya dekɨdẽ
na a telɨn nyabaji kaya dekɨdẽ ho.
Tuj a so dɔ ɓebot kɨ Jerusalem
8Kɨtɔ 'nten m'a m'non, m'a m'ũd
m'a m'ndia kanj sanja kɨ rom kari
m'a m'nõ tit talbisɨ, m'a m'tõ ɗusɨɗusɨ tit bulum be.
9Kɨtɔ do lo Samari a ed al
aw mbã kɨ Juda
aw mbã ood tabit lo deg lom,
mbã kɨ ɓebo Jerusalemt,
10Ot lan mbera kam ɓebot kɨ Gat.
Ot nõn kam ɓet kɨ Ako.
M'nduwɨr rom kam but
kam ɓet kɨ Bet Leapra.
11Ĩn ngendɨ kam ɓet kɨ Sapir,
i tɔin ɗobo kɨ ro kɨ kari kɨ rosɔl.
Ĩn ngendɨ kam ɓet kɨ Saanan,
ot teen kɨtɨga. Ndo kɨhɔ lo ngendɨ kam ɓet kɨ Bet Haesel
ɔgsɨ ngah nya'n i ndan kamsɨ dɔt.
12Ngéndɨ kam ɓet kɨ Marot ngoon kaj kɨ rondad,
kɨta tuj tee kokɨro Bɨraɓet
mbã ɔd tabit kɨ ɓebo Jerusalemt,
13In ngendɨ Lakis,
i dɔn sɨndag ngékãi ngɔd ngãi ta pusɨɗɔɔgt.
Kɨtɔ ĩn la i lan girr majal lo ɓebo Siõ,
na ngahn tɔidɔtag lo Israelag kamsɨt tɔ ho.
14Kɨtɔ 'nten a i tɔn rosɨ kad
ngendɨ Moreset nderbe kɨ Gat,
na ɓebo Akjib a ɗa kɨ ngarg lo deg kɨ Israelt al.
15Ĩn ngendɨ Maresa, m'a mad ngetaɓe ɗe roit,
ngetɔko, ad i mbaiɓeg lo Israel,
a andɨn kam bulombalt kɨ tɔa i Adullam.
16I jan bisɨdɔsɨ, i ndan ɔrrɨn dɔsɨ bai.
I hɔn ne ndɔ ngansɨg ngetar losɨ.
Adɨn dɔsɨ ngɔ tit dɔ mal be.
Kɨta a awɨn sed ɓert sãi rosɨt.
Currently Selected:
Mika 1: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
