Mika 2
2
Beto lo ngeɗa ta kõ kɨ ngendog
1Beto lo deg kɨ ngekɔjta ɗagootal
kɨ ngeɗa majal ndɔ dɔ tɨra todt.
Lon loti a ne, a tɔlɨn kon na kɨta tɔg ɗa i jidt.
2Deg'n non ɗan kumndà ndɔɔg,
na taan kɨ lo ngetɔgt, ɗan kumndà kujg,
na taan kɨta rod, ɗan ta kõ kɨ deg kɨ ngékɨɓe lod tu,
ɗan titbe kɨ de kɨ nyakagɓe loa tɔ.
3Kɨtɔ 'nten kel Bɨraɓe el an:
Oon m'ndɨ m'ɔj ta kad tuj so dɔ degt'n ɗan:
a asɨn kɔrr kɔsɨ girrt kɔ al,
a i ndian kɨ tasɨ kɨ ɓa kɨ dõ al
kɨta a i kaglo kɨmajal.
4Kam ndɔt'n non a gangɨn ta dɔsɨt
deg a udɨn wi, a nõn mbiting,
anan: Jĩ kɨ nuj kɔ kɨtaagbe.
Bɨraɓe ta dɔning lo deg losɨ jid
ad deg kɨɗang, ãã taa jisɨt.
Keg ndɔɔg losɨ ad madngétasɨg.
5Kɨtɔ 'nten a i ngah
de kɨkad mbɔj dɔning kɨ kɨla
kɨgo yukt kɨ ya ku ngékawnagt lo Bɨraɓe al.
Ta kɨgang dɔ ngékelta kɨ balt
6Deg ndɨ elɨn anan:
Ot kelɨn ta kɨ ta Luwaht. Ot kelɨn tag titbe.
Rosɔl a tee dɔjt al.
7Ĩn ngékɨɓe lo Jakob,
tag kɨtitbe ĩn tag kɨ sumba kel a?
Ndɨ dɔt lo Ndil Bɨraɓe goto oo?
Kɨlaɗaa i titbe ale?
Tag lom a ɗan maj
kɨ de kɨ ngenda goɗobat ale?
8Na ĩn, i ɓai i ndoorɨn deg lom,
i ndɨ i ngĩn kub ro degt
ngenda ɗobo kɨ lapia,
ĩgɨn gan kamd dɔ ɗɔɔt al.
9I ndɨ i tuɓan dekɨdẽg lo deg lom
kam kujgt lod kɨmaj koo,
i ndɨ ɔrrɨn tɔko lom kɔ
dɔ ngandgt kɨdu kɔ mbãkɨnõt.
10I ɓai awɨn,
kɨta nẽbe i lo taakò al,
kɨta nya kɨyerr ndɨ tuj deg
kɨ tuj kɨbobe.
11Ĩla de a lago log,
a el takɨbal tit nél kɨ a tɔi be, an:
n'a nelsɨ ta dɔ kasɨnduut kɨ kasɨ kɨngang a ne,
de'n non a i ngekelta kɨ sumba deg'n ɗan.
12In ngaka Jakob, rota m'a m'kawsɨ kɨnat tube,
m'a m'kaw ndeg Israelag kɨ nãin
m'a m'ɔid kɨnat tit batg kam kɨngat,
tit ɓut batg lokuldt be,
Koosɨdeg ɗa kɨsen yekɨtyekɨt.
13De'n ɔsɨ ndogbɔrr tet a ne,
a aw nõdt; a mbutɨn lo,
a tɔin tabit't, a teen kɨtɨga,
ngar lod a ndia nõdt,
na Bɨraɓe a i bɨradɔd.
Currently Selected:
Mika 2: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
