Jeremi 31
31
Ronel gagoit kamkɔl lo Israel
1Kaglot'n non,
Titbe la i takel Bɨraɓe ye.
M'a mĩ Luwah lo girrkooj Israelag tube, na a ĩn deg lom. 2Titbe la i takel Bɨraɓe ye:
Deg'n teen ta nyakat't a ngahn majkurr kam dɨlalot,
Israel ndɨ aw lotaakòt lon.
3Bɨraɓe tee hɔi kɨroat ko sãi nu, an:
M'tari kɨ tar kɨ to mbãkɨnõt,
kɨta 'nten m'ndɨ m'ɔji kamkẽ.
4M'a m'ndai dõ gog na a i ɗa dõ.
Ah ngomand Israel,
a i un kod loi jiit gog,
a i tee aw lo ndamt nat kɨ ngeɗaronel.
5A i tel hɔ nduu
dɔ mbalbogt kɨ Samari,
ngehɔnyag kam ndɔɔt a hɔn
na san kanda,
6kɨta ndɔ a ɗe nõ,
lon ngéngomlog a kon kɨ ndid
kam dɔning mbalt kɨ Epraim, anan:
I ɓai, ad j'awɨn ɓebo Siõ ro
Bɨraɓe Luwaht loj.
7I ɔsɨn pa kɨ ronel dɔ Jakobt,
i ɗan kamnda dɔ kɨdasat
lo girrdeg kɨ dang dang,
unɨn ndisɨ kɨ dõ, ɔsɨn pa ndub anan:
Bɨraɓe aj deg lon, ndeg Israel kɨ nãi.
Titbe la i takel Bɨraɓe ye.
8Oon, m'a m'ɗe sed
ko dɔningt kɨ jigel,
ko dɔngoi dɔning
m'a m'kawd kɨnat,
kudt nõ mundog
kɨ motg kɨ kokemg
kɨ dekɨdẽ'n tokooj toa.
Ĩn deg koosɨg
ĩgɨn ndɨ ɗen nẽbe.
9A ɗen kɨ non kumdt
na m'a m'ɔrrd ta ɗob
kam kogt lod kɨ rotĩ.
M'a m'ɔrrd ta ɗob kɨ lon man ɓat
kɨ ɗob mad kɨkad gan njad gigt al,
kɨta mĩ Bɔw Israelag
na Epraim i ngonderɨm.
10Ah girrdeg kɨ dang dang,
oon dɔ ta lo Bɨraɓe,
i lan mbera kɨ doorlog kɨsãi, anan:
Luwah, ngetɨnda Israel tĩ a kawd kɨnat,
a ngomd ɗa ngékulbatg
a oon go nyakulg lon ye be.
11Kɨtɔ Bɨraɓe badɔ Jakob
na aja ji det'n tɔia kɨ tɔg.
12A ɗen kɨ pa kɨkɔsɨ tadt kɨ ronel
dɔ door lot kɨ Siõ.
A ãin ngɔd kɨta ta majkurr lo Bɨraɓe;
nyako, man nduu kɨkij,
yib batg kɨ mangg.
Rod a to tit ndɔɔ kɨ la man dɔt be,
kamkɔl a ɗad gog al ta.
13Kamla ngamandg a ɗan ronel,
a ndam, basag kɨ bɨgag a ɗan ronel tɔ.
M'a m'mbel ndɔ lod kɨhɔ
mad tel kamnda m'a m'sɔl kamd,
m'a m'ad'd ronel gan goot kamkil.
14M'a mad kam ngejanyamosɨ
ndan kɨ mboolnya,
deg lom a ndamɨn kɨ nyamajg lom.
Titbe la i takel Bɨraɓe ye.
15Titbe takel Bɨraɓe:
Oon dɔ ndi wi kɨkud kam ɓet kɨ Rama,
ad i ɓi kɨ non kɨnambin kɨdumbit.
Rasel ndɨ non nganɨn; mbet sɔl
kam kɨta goton tube.
16Titbe takel Bɨraɓe:
Ot non, ad man ɗe kumit al,
kɨta a i ngah nyabaji kɨta kɨla loi,
titbe la i takelɨm mĩ Bɨraɓe.
A ɗen ko kam dɔningt lo madngétai.
17Kam kɨndahdɔt loi i kɨta kaglo'n ndɨ ɗe,
Titbe takel Bɨraɓe.
Ngani a telɨn kɨ dɔningt lod gog.
18M'oo dɔ ndi Epraim'n non an:
I nda ɔjɨm ad mĩ kɨ ndakɔj tit
ngon mang kɨ ger jug al be.
I tel sem a ne, m'a mĩ'n kɨ tel kɨtɔi
ĩ Bɨraɓe Luwah lom.
19Goot'n m'so mut ye m'to tam dɔt
na lon m'ger majal lom
ye m'nda bɨngɨm.
Mĩ kɨ rosɔl kɨ takum kɨla ber
kɨta m'ndɨ m'to rosɔl kɨ basamt nu.
20Epraim i ngon ngetar lom a?
I ngon ngekadɨm ronel a?
Kɨtɔ ndɔ kɨɗen lon m'elta,
m'ndooran ye
kamm gah dɔat ngãi ɓaitɔ.
Kɨtɔ 'nten mĩ kɨ kõkam kɨtaa;
Rota, m'a m'oo kumtondo loa,
Titbe la i takel Bɨraɓe.
21I ndah nyakɔj ɗob,
i ndah nyambɔj ɗob
oo go ɗob loi maj,
ɗob kɨ i ndiat maɗi.
Ngon kɨmand Israel,
i tel gog kam ɓebogt loi.
22Ɗɨngãt a nya ta ndia kɨ log papa
ĩ ngon kɨdẽ kɨ ngetaaɗɔɔ, a?
Kɨtɔ Bɨraɓe ndah
nya mad kɨkij dɔningt,
ad i dekɨdẽ. Ia a sah go ngaw ye.
23Titbe takel Bɨraɓe Ngekoosɨg,
Luwah lo Israel: Deg a elɨn ta 'nten
kam dɔning Judat kɨ ɓebog loa ɓaitɔ
lon m'a m'ɔrrd beɓert, anan:
Kɨ Bɨraɓe njang dɔi
ĩn londɨ nyaɗa kɨdenesew,
mbalbo kɨjaɓat.
24Juda a ndit kɨ ɓebog loa tube nat kɨ ngendɔɔg kɨ ngekaw kɨ ɓut nyakulg lod, 25kɨta de'n ɔr rɔkɨ,
m'a mad roa ngang,
na de'n i kɨtõ, m'a m'ada tɔg.
26Dɔ tat'n non m'ndool,
na m'oo ɓi lom i kɨmaj.
27Oon ndɔg ndɨ ɗen nõ.
Titbe la i takel Bɨraɓe ye.
Lon m'a m'duw koh ngékɨɓe lo Israel kɨ koh ngékɨɓe lo Juda, koh deg kɨ dãg. 28Na tit'n m'oo god kɨta netd ko kɨ tɔd kɔsɨkɔsɨ kɨ nujd kɨ ɗad takõ ye. Titbe tɔ la m'a m'oon rod kɨta ɗad kɨ dõ kɨ hɔ njad ber.
Titbe la i takel Bɨraɓe ye.
29Ndɔt'n non deg a elɨn anan gog al:
Bɔwg san kand nduu kɨmbuj al,
na ngang ngang oi njurur.
30Na dekɨɗen a oi kɨta ɗagootal loa, dekɨɗen in a sa kand nduu kɨmbuj al ɓaitɔ a ne, ngang de'n non a oi njurur.
Kunkɔ kɨkij
31Oon, ndɔg ndɨ ɗen nõ
Titbe la i takel Bɨraɓe ye.
Ĩn m'a m'un kom kɨkij mad to kɨ ɗubagt kɨ ngékɨɓe lo Israel kɨ ngékɨɓe lo Juda. 32M'un kɔm mad bɔwdg kam ndɔt'n m'hɔ jid m'teen sed kam dɔning Ejipt't kɨtɨga, na kunkɔ kɨkij kɨ m'a m'un m'ad'd a i tit kunkɔ'n non al; ke neni mĩ nged kaa, tɔin dɔ kunkɔ'n non.
Titbe la i takel Bɨraɓe ye.
33'Nten la i kunkɔ kɨ m'a m'un mad ngékɨɓe lo Israel go ndɔgt'n non ye.
Titbe la i takel Bɨraɓe ye:
M'a mad mberkɨndag lom i kamdt, m'a m'ndang mberkɨndag lom dɔ ngarkamdt tɔ, m'a mĩ Luwah lod, ĩn tɔ a ĩn deg lom. 34De'n non a ndoo madɓen gog goto, ke de kɨkad ndoo ngonkõn an: Maj kad i gerɨn Bɨraɓe. Kɨtɔ deg tube a germɨn, dɔ kɨdut mbã kɨdɔ kɨbot kudt.
Titbe la i takel Bɨraɓe ye.
M'a m'oo kumtondo lod do ɗagootalt lod, m'a m'ga kamm dɔ majalt lod gog al kɨnõt. 35Titbe la i takel Bɨraɓe'n:
ndah kàd kɨtakad unj lo kɨ kada
ndamber nah kɨ kɨmẽg kad unjɨn lo kɨndɔ.
Ĩla bur bahbo ad hula ɓai huhu,
ĩla tɔa i Bɨraɓe Ngekoosɨg ye.
36Bɨraɓe el an:
Ĩla mberkɨnda 'nten tɨga nomt a ne,
girrdeg Israel to a tɨga mbãkɨnõt,
a i girrdeg kɨnomt al tɔ ho.
37Titbe takel Bɨraɓe:
Ĩla de asɨ mbɔj ngal dɔrã kɨ dõ,
ĩla asɨ koj ko dɔning kɨɓing kɨ ber,
kamla mĩ tɔ, m'a m'la girr Israel
tube kɔ kɨta nyag tube'n ɗad.
Titbe la i takel Bɨraɓe ye.
38Oon, ndog ndɨ ɗen nõ.
Titbe la i takel Bɨraɓe ye.
Lon a tel ɗan ɓebo gog kɨta kɔsɨ'n gon Bɨraɓe. A lan gira kujngomdɔɓe kɨ ngal lo Hananel mbã kɨ tabit kɨ dɔkumlot. 39Kɨla kɔjnya a aw kɨ mbã kɨ door lot kɨ Gareb kamla a tel aw Goat. 40Hollo Nin kɨ Bu horr tube kɨ ndɔɔg tube mbã man Kedron mbã dokumlot kɨ tabit Sɨndag ko loɓakàd a i kɨgang tadang kɨ tɔ Bɨraɓe. A ɔsɨna lana kɔ al, a nujɨna kɔ al tɔ mbãkɨnõt.
Currently Selected:
Jeremi 31: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
