Jeremi 32
32
Jeremi ndugo ndɔɔ
1Ta'n ɗe ro Jeremit kokɨro Bɨraɓet kam ɓalt kɨ kõ kɨlah lo kõɓe lo Sedekias, ngar kɨ Juda, ĩn i ɓal kõɓe kɨ kõkɨlah gidaijijoo lo Nebukadnesar.
2Kam ɓalt'n non la ngéɗɔɔ lo ngar kɨ Babilon lan na gugɨn dɔ Jerusalem gej na Jeremi ngekelta kɨta Luwaht i kɨkut kam nat lot kɨ ta kuj dangait kɨ kam kujt lo ngar kɨ Juda. 3Sedekias ngar kɨ Juda la Jeremi dangait na ela an: Kɨtɔɗi i elɨn ta an: Titbe takel Bɨraɓe; Oo, m'a m'la ɓebo'n ɗan ji ngart kɨ Babilon kad taa. 4Sedekias ngar kɨ Juda a tee ji Kaldeagt al na a lana ji ngart kɨ Babilon kad elɨna ta kum kɨ kum, a oon na kum kɨ kum. 5Ngar kɨ Babilon a un Sedekias, aw sia Babilon, a ndɨt nu mbã kad m'ga kamm dɔat.
Titbe la i takel Bɨraɓe ye.
Ke i ɗɔɔn kɨ Kaldeag kaa, a i tetɨn al.
6Jeremi el an: Ta lo Bɨraɓe'n elɨmt an: 7Oo, Hanameel, ngon bɔwi Salum a ɗe roit eli an: I ndugo ndɔɔ lom kɨ i Anatot kɨta ĩla aw kɨtɔg kɨta badɔa ye. 8Na Hanameel ngon bɔwm ɗe romt go tat lo Bɨraɓe kam natlot kɨ ta kuj dangait, elɨm an: I ndugo ndɔɔ lom kɨ i Anatot kam dɔningt lo Benjami kɨta ĩla aw kɨ tɔg kon ndubaa kɨ badɔa tɔ ye. I ndugo. Titbe m'ger kad i ta lo Bɨraɓe, 9na m'ndugo ndɔɔ kɨ Anatot ji Hanameel ngon bɔwm na m'mbɔj nar arjã kɨlah gidaitanaimɨta m'ada. 10M'ndang maktub ndugo dɔning, m'ɔsɨ dɔa kɨ kase kɔsɨdɔ nya, m'ɔi ngémanajg na m'ɔi nar arjã kam nyakɔjnyat. 11M'ta maktub ndugo dɔning kɨkɨɗa in i kɨkɔsɨ dɔ kɨ kase kɨgo mberkɨndat kɨ kɨ go nyabelɓet kɨ maktub kɨmad kɨ tet'nat al. 12Mad maktub ndugo dɔning ji Barukt, ngon Nerija, ngon Maaseja, nõ ngon bɔwm Hanameelt kɨ kɨnõ ngemanajgt ĩgɨn ndangɨn tɔd kam maktub ndugo dɔningt, kɨ kɨnõ degt kɨ Juda tube kɨ deg'n ndɨn natlot kɨ ta kuj dangait'n non. 13Kamla m'nda mber Baruk nõdt m'an: 14Titbe takel Bɨraɓe Ngekoosɨg, Luwah lo Israel; I taa nyag kɨ ndang 'nten, maktub ndugo dɔning, maktub kɨkɔsɨdɔ kɨ kase kɨ maktub kɨ tet nat al, i ndad kam johanjt kɨta kad ngomɨnd kaglo ngãi, 15kɨta titbe kel Bɨraɓe Luwah lo Israel: Deg a ndugon kujg kɨ ndɔɔg kɨ ndɔɔ nduug kam dɔningt'n ɗan ɓaitɔ.
Jeremi elta kɨ Luwah
16Lon mad maktub ndugo dɔning ji Barukt, ngon Nerija, woi ye m'ko Bɨraɓe m'an: 17Ah Bɨraɓe Luwah, in la i ɗa dɔrã kɨ dɔning kɨtakul tɔgi kɨ bobe kɨ tɔg jii kɨkun kɨ dõ, nya mad kɨ tɔi tɔgi goto. 18I ɔj kamkẽ mbã nganka kɨ kõdub, na i ad kɔjkum kɨtɔ nyaɗa kɨgoot al lo bɔwg so dɔ ngandg kɨgodt. Ĩ Luwah kɨbobe, in ngetɔg, ĩla toi i Bɨraɓe Ngekoosɨg ye. 19In kɨbo kam kɔjtat, in kɨtag kam nyaɗat. Kumi i kɨtee dɔ ɗobgt lo ngan deg tube kad i ba'n dekɨɗen kɨ go kɨlaɗaat kɨ kɨgo kand kɨlaɗaat ho. 20I ɗa nyakɔjg kɨ nyag kɨyaya kam dɔning Ejipt't mbã ɓola kɨ kam dɔning Israelt kɨ ku degt ad toi ko tit'n ɓola. 21I tee kɨ deg loi kam dɔning Ejipt't kɨtɨga kɨ nyakɔj kɨ nyag kɨyaya kɨ ji kɨngang kɨ ji kɨla kɨ dõ, kɨ ɓool kɨbobe. 22I ad'd dɔning'n ɗan kɨ i ndan yo ad bɔwdg kɨ ad'd, dɔning'n mbà kɨ tej nũt. 23Andɨn, taan dɔning nyakagɓet, na telɨn rod go tat loi al, ngomɨn go mberkɨnda loi al, nyag tube kɨ i ndad mbera kad ɗan ye, ɗan al. Kɨtɔ 'nten la majal'n non tube son dɔdt ye. 24Oo, urɨn ning kɨdɔnat mbã teen ne kɨ dõ asɨ ta ndogbɔrr ɓebo'n ɗan. Lan ɓebo ji Kaldeagt ĩgɨn a ron sia, a tetɨna ɗɔɔ kɨ nyakat kɨbo kɨ yokoosɨ. Nya'n i eltaa ɗe woi na i ooa. 25Na in Bɨraɓe Luwah, i elɨm an: I ndugo ndɔɔ kɨ nar, i kun ngemanajg. Na oo, lan ɓebo ji Kaldeagt woi.
Bɨraɓe tur Jeremi ta
26Ta lo Bɨraɓe ɗe ro Jeremit an: 27Oo, mĩ Bɨraɓe Luwah lo ngekumkajɨr kɨɗen, nya mad kɨ tɔi tɔgɨm i nõ a? 28Kɨtɔ 'nten, titbe takel Bɨraɓe: Oo, m'ndɨ m'la ɓebo'n ɗan ji Kaldeagt kɨ ji Nebukadnesar, ngar kɨ Babilon, kad taan. 29Kaldeag ĩgɨn ndɨ ɗɔɔn kɨ ɓebo'n ɗan ye, a andɨn na a lan horr kujg ĩgɨn lan horr nyag kɨ kootmbĩ dɔdt adɨn Baal na adɨn kadkari nyakãi yog tit kad kɨ'n sɔkmɨn ne. 30Kɨtɔ Israelag kɨ Judag ɗan nya mad kɨɗang al takum'mt na majal koon lon ĩn ne kɨ basad nu. Sɔk la Israelag sɔkɨmɨn kɨ kɨlaɗa jid ye. Takel Bɨraɓe. 31Ɓebo'n ɗan sɔkɨm ad m'ɓa wong kɨtɨngabil ndɔ in ndan ne be mbã ɓola. Titbe tɔ la m'ndig kɔrran takum'mt, 32kɨtɔ majal tube'n Israelag kɨ Judag ɗan kad kɨ'n sɔkɨmɨn ne, ĩn kɨ ngarg lod kɨ mbaiɓeg lod kɨ ngejanyamosɨ lod kɨ ngekelta kɨ ta Luwaht lod, deg kɨ Juda kɨ ngéndɨ Jerusalem. 33Turɨn gid'd admɨn na oomɨn kɨ kumd al. Ndoond, ndoond kɨkanj nya ta na oon dɔ nyandoo lom al. 34Ndan nyag lod kɨyerr kam kujt in kunɨn tɔm dɔt kɨtakad kuj'n non tel kɨyerr ho. 35Ɗan log kɨ dõ adɨn yo Baal kam hollot lo ngon Hinom kad kɨ'n lan ngandg kɨdɨngã kɨ kɨdẽ horro n'adɨn yo Molok, nya'n m'ndad mbera al, m'ga kamm dɔt al tɔ. Ɗan nya kɨyerr kɨ tit'n non ad Judag ɗan ne majal ho. 36Tajigla, titbe takel Bɨraɓe Luwah lo Israel kɨdɔ ɓebot kɨ i elɨn taa anan: A lana ji ngart kɨ Babilon, a tetɨna ro kɨtakul nyakat kɨ ɓo kɨ yokoosɨ. 37Oo, m'a m'kawd kɨnat ko kam dɔningt kɨɗen in m'tuɓadt kɨ wong lom kɨtɔlsɔkɨr kɨ kɨtɨngabil kɨ kumm kɨkil kirir. M'a m'tel sed kam lot'n ɗan gog, m'a m'ad'd ndɨn lom kamt. 38A ĩn deg lom, m'a mĩ Luwah lod ho. 39M'a m'ad'd ngar kam kɨkɨɗa kɨ ɗob kɨkɨɗa kad ɓoolmɨn ne kɨndɔgndɔg kɨtɔ maj lod kɨ kɨlo ngandg kɨgodt. 40M'a m'un sed kunkɔ kɨtokɨnõt, m'a m'ɔrr rom kɔ rodt gog al, m'a m'ɗa maj sed m'a mad ɓoolm i ngarkamdt kɨta kad nyàmɨn kɔ al. 41M'a m'ɗa ronel do ɗamajt sed, rota m'a m'hɔ njad ber kam dɔningt 'nten kɨ ngarkam tube kɨ rom tube. 42Kɨtɔ titbe takel Bɨraɓe: Tit'n mad kamkɔl kɨ bobe ɗen dɔ degt'n ɗan ye, titbe tɔ la m'a mad maj in m'unɨn kɔm sed kɨdɔdt tube. 43Deg a ndugon ndɔɔ kam dɔningt'n ɗan in i ndɨ elɨn ta dɔt anan: I dɨlalo kɨkanj de kɨ kɨkanj dã, i kɨla ji Kaldeagt. 44Deg a ndugon ndɔɔ kɨ nar, a ndangɨn maktub ndugo dɔning, a ɔsɨn dɔa kɨ kase kɔsɨdɔnya, a kunɨn ngémanajg. Kam dɔning Benjamit kɨ ɓeg kɨ gugɨn dɔ Jerusalem kɨ ɓebog kɨ Juda kɨ ɓebog kɨ dɔning mbalt kɨ ɓebog kɨ dɨlalot kɨ ɓebog kɨko jikõ, kɨta m'a m'ɔrrd kam ɓeɓert, m'ɗe sed.
Titbe la i takel Bɨraɓe ye.
Currently Selected:
Jeremi 32: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
