Jeremi 30
30
Kaglo Kamkɔl lo Jakob
1Ta'n tee kokɨro Bɨraɓet, ɗe ro Jeremit an:
2Titbe takel Bɨraɓe Luwah lo Israel: I ndang tag tube'n m'eli nõ kam maktubt. 3Bɨraɓe el an: Oo, ndɔg ndɨ ɗen nõ lon m'a m'tel kɨ deg lom Israel kɨ Juda ko kam ɓeɓert.
Titbe kel Bɨraɓe.
M'a m'tel sed kɨ dɔningt'n mad bɔwdg kad taan nyakagɓet.
4Tag 'nten la ĩn tag'n Bɨraɓe el dɔ Israelt kɨ Juda. 5Titbe takel Bɨraɓe:
J'oo dɔ kɨ rondad
kɨ ɓool na lapia goto.
6I ndɨjen ta deg tajigla, na i nɔlɨn oon,
ke dekɨdɨngã a ooj ngon a?
Kɨtɔɗi m'oo dekɨdɨngã kɨɗen nda jin ɓont
tit dekɨdẽ'n tokooj ndɨ toa be a?
Kɨtɔɗi takum dekɨdɨngã kɨɗen
ɓa kɨ malɨmnda a?
7Beto kɨta ndɔ'n non i ndɔ kɨbobe,
ndɔ kɨ tit sia goto.
I kaglo kamkɔl lo Jakob
na a ajɨna kamt.
8Ndɔt'n non a ɗa nya titbe,
Titbe i takel Bɨraɓe Ngekoosɨg.
M'a m'tet jug loa koit,
m'a m'gang jinjirg loi.
A i ɗa kɨlaɓer ad mbahg gog al ta.
9A ɗan kɨlaɓer adɨn Bɨraɓe Luwah lod kɨ Dabid ngar lod in m'a m'ɓai sia kad'd. 10Na ĩ ɓer lom Jakob, ot ɓool.
Titbe la i takel Bɨraɓe ye.
Israel, ot ndad
kɨta m'a m'ug m'ɔrri dɔningt kɨsãi
m'a m'ɔrri nat kɨ ngakai kam ɓeɓert
Jakob a ndɨ lom, a ngah taakò,
de mad kɨkad ndaa ɓoolt goto.
11Kɨtɔ mĩ nat sei kad m'aji.
Titbe la i takel Bɨraɓe ye. Rota,
m'a m'nuj girrdeg kɨ dang dang tube
ĩgɨn m'tɨnda m'tĩsɨ kudt,
na ĩ, m'a m'nuji al.
M'a m'nda m'ɔji
kɨ takɨgang kɨ goɗobat,
m'a m'nyasɨ kɨkanj ndakɔj al.
12Titbe takel Bɨraɓe:
Dò loi a yoot al kɨta i dó kɨ to ngãi.
13De kɨ ngeɗasei dɔ tat loi goto,
de kɨta dɔ do loi goto,
kĩ kɨta yooti goto.
14Ngetarg loi tube, kamd oi dɔit kɨkɨɗa kudt kɨ gah dɔit goto kɨta m'ndai kɨ dó tit madngétai ndai, m'nda m'ɔji kɨ tɔg ngãi kɨta ɗagootal loi kɨngãibe kɨtɔ majal loi bɨla kɨdɔtdɔt ngãibe. 15Kɨtɔɗi i nõ kɨta dó loi a? Dò loi'n ndɨ toi a yoot al, m'ɗa sei titbe kɨta ɗagootal loi kɨ ngãi, kɨ majalg loi ĩn bɨlan kɨdɔtdɔt. 16Na deg tube'n ĩn sãi, a sand ho, madngétaig tube a awɨn ɓert, deg'n tirrɨn pur ye, a tirrɨnd pur ho, deg'n ɗan sei kɨlo ndokumt nõ, m'a mad ɗan sed kɨlo ndokumt tɔ ho. 17M'a m'yooti, m'a mad dog loi ed.
Titbe la i takel Bɨraɓe ye.
Kɨtɔ kunɨn nya kɨtuɓa kɔ,
ɓebo Siõ in de mad kɨ gah dɔat goto.
Kamkẽ kɨta Jakob kaglo kɨdɔboit
18Titbe takel Bɨraɓe:
Oo, m'a m'ɔrr deg kɨ kujkubgt lo Jakob kɔ kam ɓeɓert,
m'a m'ɔj kamkẽ kɨta londɨd,
a tel ndan ɓebo gog dɔ gotlot kɨ nuj,
a ɗan kuj kõɓe gootat kɨmaɗi.
19Oiyo kɨ ɗa kɨ ndɨ ko ronel
la a ɓain kudt,
m'a m'ad'd bɨlan kɨdɔtdɔt,
a telɨn kɨ tẽbe al ta,
m'a m'ɔsɨgond,
a ĩn nyakid al.
20Ngandg a ĩn tit'n ĩn ne maɗi,
kawna lod a to lotont kɨnomt,
m'a m'gangta dɔ degt tube
ngédakumd ndo.
21Mbaiɓe lod a i de kɨkudt,
ngekõɓe lod a ɓai dandt,
m'a m'ndɔt sia nderbe na a ɗe romt,
kɨta nõ in kɨɓe kɨ dõn asɨ
ndɔt nderbe kɨromt a? Takel Bɨraɓe.
22A ĩn deg lom
na m'a mĩ Luwah losɨ.
23Oon nél barwãi lo Bɨraɓe,
wong loa ndu,
nél mal kɨbobe
a so dɔ degt ngeɗamajal.
24Wong lo Bɨraɓe kɨtɨngabil a sɔl al
mbã kɨ ad tɔlkon kɔjtaɗa kɨ kamat.
A i gerɨn girr ta 'nten dɔboi kaglogt.
Currently Selected:
Jeremi 30: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
