Ejai 54
54
Tar kɨ tokɨnõt lo Bɨraɓe kɨta Israelag
1I ɗa ronel, ĩ kuj kɨ ngekooj al.
Ɔsɨ pa, un ndii kɨ dõ,
ĩ ngetõ kooj al.
Kɨtɔ m'a mad dekɨdẽ kɨ nya kɔ,
ngang ngãibe tɔi dekɨdẽ kɨ ngengaw,
kel Bɨraɓe.
2Ad kam kujkub loi tat.
I tee pal kub kutdɔ londɨ ad tat tɔ.
Ot kɔrr roi, ad kɨla kujkub loi ngal,
i mbusɨ go kagag ad ngang.
3Kɨtɔ a i ta lo jikõt kɨ jigel.
Ngakai a taan girrdeg kɨ dang dang
nyakagɓet,
na a ndɨn gootɓegt kɨ tujɨn maɗi.
4Ot ɓool kɨta rosɔl a ɗai al.
Ot la dɔi ber kɨta a lan rosɔl dɔit al.
Kami a oi dɔ rosɔl kɨ kaglo mandit nu,
kami a gah dɔ kidt lon i telɨn
ngengaw koi gog al ta.
5Kɨtɔ Ngeɗai la i ngawi,
tɔa i Bɨraɓe Ngetɔg tube.
Ngekunjɗang kɨnge Israel la i Ngebadɔi,
tɔa i Luwah Ngedɔning kɨtaagbe.
6Kɨtɔ Bɨraɓe kuni
tit dekɨdẽ kɨ nya kɔ kɨ ngekamkil,
tit dekɨdẽ kɨ taa kɨ manda,
na tuɓaa,
kel Luwah loi.
7Kaglo tẽbe la m'nyain,
na kɨ kõkam kɨbobe la
m'a m'hɔin kɨromt ye.
8Lon wong tɔlɨm sɔkɨr ye,
m'yai takum'm kaglo tẽ,
na kɨgo kamkẽt kɨ tokɨnõt la
m'a m'oon kumtondo loi
kel Bɨraɓe Ngebadɔi.
9Kɨtɔ nya 'nten i romt
tit man kɨ kaglot lo Noe be.
Tit'n m'ndan yo
kad man kɨ kaglot lo Noe
a tel ut dɔning gog al,
titbe la m'ndan yo
kad m'a m'ɓawong sei gog al,
kad m'ndangi al tɔ.
10Kɨtɔ mbalbog a goton loɗadt,
doorlog tɔ a in kɨ kɔrr kɔ,
na kamkẽ lom a goto roit al.
Kunkɔ lom kɨ kad kamsɔllom
a i kɨ kɔrr kɔ al tɔ.
Kel Bɨraɓe ngekõkam.
Jerusalem kɨkij
11Ĩ ngekamkɔl,
in nélbarwãi ndɨ ɔs kɨ log
kɨkanj kad i ngah kamsɔl.
Oo, m'a m'nda medkɔsɨg loi kam
nyahɔdt,
na m'a m'nda girr ɓe loi dɔ
medkɔsɨ sapirgt.
12M'a m'ɗa dɔ kujg kɨta ngom dɔɓe loi
kɨ medkɔsɨ rubisg,
na taɗɔbg loi in kɨ ɗa
kɨ medkɔsɨ kɨ ndulo ngẽingẽi.
M'a m'ɗa ndog loi tube
kɨ mbalg kɨ gatd i ngãi.
13Nganig tube a in ngéndoonya lo Bɨraɓet,
na lapia kɨdɔ nganit a i kɨbobe.
14A ĩ kɨ ɗà bijir kam nyaɗat kɨdenesew.
A ĩ sãi kad nyaɗat kɨ lo ngetɔgt,
kɨta ɓool a ɗai al.
A ĩ sãi kad nyat kɨkootɓool
kɨta a ɗe roit nderbe al tɔ.
15Ĩla deg ɗe lain ɗɔɔ, a ne ɓai koromt al,
na ĩgɨn ndoorɨn, a son girr tɔgit.
16Oo, m'nda kɔd ko nya,
ngekɔsɨ ndub girr horr muĩt,
na oo nyakat mad kɨta kɨla loa.
Mĩ tɔ, m'ɗa ngenuj mad kɨta nuj nya.
17Nyakat kɨ ɗi'n kɔd wo kɨta ɗɔɔn sei,
a ɗa sei nya mad al.
Dekɨɗen'n a ɓai ndoori lo gangtat a ne,
a i hɔa kɨ ta.
'Nten la i nyabelɓe lo ɓerg lo Bɨraɓe
na kɔrrtadɔt lod a ɗe koromt, kel Bɨraɓe.
Currently Selected:
Ejai 54: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
