Ejai 55
55
Ɗob ɗamaj lo Luwah kɨta deg tube
1Dekɨɗen kɨ kɨnda õa a ne,
kɨ ɗe ta mant.
Ke de kɨ nar loa goto kaa,
ada ɗe.
I ndɨjen kum nya, i san
i ɗen, i ta ãin.
2Kɨtɔɗi a i tĩn ne nar losɨ kɔ
kɨta nyasa kɨ ad de tɔg al a?
Kɨtɔɗi i ɗan ne kɨla
kɨta nyasa kɨ a ndan de al a?
Oon dɔ ndim. Na a i san nya kɨmaj,
rosɨ a nelsɨ kɨ nyasa kɨ mboola i ngãi.
3I nelɨn mbisɨ, i ɗen kɨromt.
Oon dɔ, na rosɨ a aj.
M'a m'un kɔm sesɨ
kɨ kunkɔ kɨ tokɨnõt,
m'a m'ɔjsɨ kamkẽ lom kɨjeje
tit'n m'ɔj Dabid nõ.
4Oon m'ndaa kad i ngemanaj
kɨ ro girrdegt kɨ dang dang,
ngekɔrrta ɗob kɨ ngekõɓe dɔ degt tɔ.
5Oo, a i kun girrdeg kɨ dang dang
kɨ i gerd al,
na girrdeg kɨ dang dang kɨ gerɨn al
a ãin kɨroit,
kɨta Bɨraɓe Luwah loi,
kɨta Ngekunjɗang kɨnge Israel,
kɨta la kɔsɨgon dɔit.
6I sahn Bɨraɓe
kaglot kɨ sumba kad i ngahna ne,
i kon kɨdɔat
lon i nderbe ɓaitɔ.
7Kɨ ngeɗamajal nyàgo ɗob lon kɔ.
Kɨ ngeɗagootal nya tagahng tɔ.
Kɨ tel kɨ ro Bɨraɓet,
a oo kumtondo loa;
kɨ tel kɨ ro Luwaht loj tɔ,
a nyàgo majal kɔ kɨnõbe.
8Kɨtɔ tagahmg in tit tagahsɨg al,
ɗobg lom in tit ɗobg losɨ al,
Titbe kel Bɨraɓe.
9Tit'n dɔrã in sãi kɨ dɔning ye,
titbe tɔ la ɗobg lom in dõ dɔ ɗobgt losɨ,
tagahmg in dɔ tagahsɨgt tɔ ho.
10Kɨtɔ tit'n ndii edɨn
na la neij tuso ko dõ,
tel gog al, na nyom dɔning,
ad kumnya ɓa tɔg,
ad kumnya ngeduba
kɨ nyasa kɨta ngesaa ye;
11titbe tɔ la ta lom kɨ tee tamt
a tel kɨromt kari al,
na a tɔlkon ndig lom;
maj a ura dɔ kɨlat kɨ m'laa tɔ.
12Kɨtɔ a i teen kɨ ronel,
a ɔrrsɨ ta ɗob kɨ lapia.
Mbalbog kɨ doorlog
a ɔsɨm pa nõsɨt.
Kagg tube kɨ kam mut
a ndan jid tɔ.
13Kag sipres a ɓa goot kõnt,
myrrt tɔ a ɓa goot ngart.
A i nyatɔko kɨta Bɨraɓe,
a i nyakɔj kɨ tokɨnõt kɨ a goto al.
Currently Selected:
Ejai 55: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
