Ejai 53
53
1Nõ ad kamɨn ta'n oon dɔ rojt a?
Ji Bɨraɓe i kɨ tee dɔ ro nõt a?
2Kɨtɔ tɔg nõat
tit nyahɔ kɨ to ngoor ɓaitɔ,
tit ngɨra kag kɨ tee
dɔningt kɨ tut kurum;
majkooa ke nelkoa goto,
kad kɨ tel kumj kɨ nɔlan.
J'oo nya mad roat
kad kɨ ndinga goto.
3I nya kɨkid,
i nya kɨ la kɔ ro degt,
i ngekamkɔl,
ger daiyog ɓet tɔ.
Kidna tit de'n deg unɨn kumd kɔ dɔat,
jĩ tɔ j'ooa nya madt al.
4Rota, to daiyog loj,
ɔi kamkɔlg loj,
na j'ooa tit de'n Luwah ɔja kuma,
ndaa, na sɔl dɔa.
5Na kɨta tɔidɔtag loj la
adɨna ne dɔg ye,
ndana mbukɨmbukɨ kɨta ɗagootalg loj.
Ndakɔj kɨ adj lapia i dɔat,
kɨtakul ndɨna doog loa la kɨ yootɨn ye.
6Jĩ tube kɨ ndɔm tit batg be,
dekɨɗen kuujt tɔ ɗob lon kɨ kɔsɨ dɔn.
Bɨraɓe nda ɗagootalg loj tube dɔat.
7Ɗan sia nya kɨ to,
na sɔl dɔn, tee tan al.
Ɔrrɨna tit bat be kɨ lo jakɔt.
Tit'n kõ bat a ɗan gon mbo
nõ ngéja bĩnt ye,
titbe tɔ la teen tan al.
8Nyaɗa deg kɨ lo ngetɔgt
kɨ takɨgang kɨgoɗobat al, ɔrrɨna kɔ,
na ku degt kɨ kaglot loa,
nõ ga kamɨn dɔat an:
Goto dɔningt kɨ deg ndɨnt kɨ dɔd dõ,
i kɨ nda kɨta tɔidɔta lo deg lom.
9Ɗan ɓada nat kɨ ngéɗamajalg,
na go koiat i nat kɨ ngemaj,
kɨta ɗa nya kɨ to kɨ de al,
ta kɨngom goto taat tɔ.
10I ndig lo Bɨraɓe kad ndana mbukɨmbukɨ,
ada dai yon tɔ.
Ad ron koi, ad i kadkari kɨtɔ majal,
a oo kohn, a la ndɔag kɨdɔt.
Maj a ur ndig lo Bɨraɓe jiat.
11A oo kand kɨla kɔr rɔkɨ lo ron,
kama a so kɨber.
Kɨtakul gerɨn deg a gerɨna la
ɓer lom kɨdenesew
a tel deg ngãibe denesewt,
na a ɔi ɗagootalg lod kɨdɔnt.
12Kɨtɔ 'nten m'a m'adan gajnya loa
nat kɨ kɨbog,
ĩ tɔ a keg nyatetɗɔɔ
nat kɨ ngétɔgg
kɨta ad ron mbã koi,
na tɨdana nat kɨ ngétɔidɔtag.
Ɔi majalg lo deg ngãibe dɔnt,
kɔ kɨta ngetɔidɔtag.
Currently Selected:
Ejai 53: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
