Ejai 23
23
Takel Bɨraɓe dɔ Tirt kɨ Sidõ
1Takel Bɨraɓe dɔ ɓebo Tirt laten:
Udɨn wi too kɨbog kɨ Tarsis,
kɨta ɓebo losɨ tuj,
kuj goto.
Hoita 'nten ɗe rodt ko dɔning Siprɨt.
2I ndɨn tasɨ mbo,
in ngéndɨ kad bahbot.
Ngégatg kɨ ɓebo Sidõ,
ngégang bahbo'n nyag losɨ ɗoosɨ ɓebo,
3Ɔin nyako kad bahbo Nilt,
ad i nyako kɨ dubɨn kad bahbo Nilt,
deg kɨ Sidõ la tetɨn ye.
I lo ɗagat lo girrdeg kɨ dang dang.
4Ɓebo Sidõ,
ad roi sɔli
titbe la bahbo elɨn ta an:
m'ge kɨ tokooj ɗam al,
m'ndig kooj ngon al,
m'to ngan kɨbasag al,
m'to ngan kɨdẽg al tɔ.
5Lon Ejiptiag a oon
hoita 'nten a ne,
kamd a gang man
dɔ sot lo ɓebo Tir.
6Awɨn ɓebo Tarsis
Udɨn wi ngéndɨ kad bahbot,
7Ɓe 'nten la i ɓe ronel losɨ yo?
I ngɨra ɓe kɨ maɗi nu?
Na jaa aw sia,
ad hɔlondɨ dɔɓet kɨsãi al a?
8Tir i ɓebo kɨ ngekeg jog kõɓe,
Ngéɗagatg ĩn mbaiɓeg loa
in deg ngéɗagat kɨbo
ad in deg kɨ deg ngãibe ɔsɨgond
Nõ ɔj ta 'nten kamɨnt
kad'n tuj ɓebo'n non a?
9I Bɨraɓe Ngetɔg kɨ tɔitɔi
ɔj ta 'nten kamɨnt kete,
kad'n tuj burokɨga
dɔ tɔkot loa tube,
kad la rosɔl dɔ kɨbogt kɨ dɔningt.
10I ndɔɔ dɔning loi kɨ kad bahbo
Nilt, ngon kɨdẽ kɨ Tarsɨ,
Nya mad kɨ ɔgi dɔ goto.
11Bɨraɓe la jin kɨdɔ bahbot,
ad kõɓeg yeen yɨkɨtyɨkɨt.
Bɨraɓe ndamber kad nujɨn
ndogbɔrr kɨngang
kɨ gug dɔ Kanat.
12El an: A i ɗa ronel gog al ta
ɓebo Sidõ kɨtuj.
I ɓai i ndah dɔning Sipɨr i gang,
ke nu kaa a i ngah lotaakò al.
13I gah dɔ dɔningt lo Kaldeag,
girrdeg'n non goton,
Asiriag telɨn ɓe'n non
lo lo dãg kɨ mut,
Asiriag ɗan kujɗɔɔg kɨta ɗɔɔ
Tetɨn ndogbɔrr kuj kõɓe kɨ ber
Na telɨna gootlot.
14Udɨn wi, in too kɨbog
Ɔsɨn pa nõ kɨta ɓebo Tarsis,
kɨta ndogbɔrr losɨ kɨngang tuj.
15Ndɔt'n non kam deg a oi dɔ ɓebo Tir ɓal dɔtanãimɨta. Ad i kaglo ndɨ kɨ dɔ dõ ngar a ndɨn. Go ɓalt kɨdɔtanãimɨta nya a ɗa nya Tirt tit'n elɨn ne taa kam pa kɔsɨ kaya dekɨdẽt.
16Un kɨndeh jiit,
i ndia kam ɓebot,
ĩ kaya dekɨdẽ
kɨ kam deg oi dɔit.
Ug kɨndeh maj,
ɔsɨ pa ngãi, na ɔsɨ tɔ,
kad kamd gah dɔit.
17Go ɓalt kɨdɔtanãimɨta Bɨraɓe a ɗe nda ɔj ɓebo Tir. Tir a tel ɗa kɨla ngah nya lon gog, a ɗa kaya kɨ kõɓeg tube kɨ dɔningt. 18Na nyaɗa gat loa kɨ nyangah loa a ndan kɔtko kɨɗa kɨta Bɨraɓe. A kawɨn kɨnat al, a ɔin kɨdɔnat al tɔ, kɨta nyaɗa gat loa a i kɨta ngéndɨ nõ Bɨraɓet kad i nyasad kɨ to mbuj, kɨ kubg lod kɨmajmaj.
Currently Selected:
Ejai 23: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
