Ejai 22
22
Takel Bɨraɓe dɔ Jerusalemt
1Takel Bɨraɓe dɔ hollo nyakookamndilt laten: Ɗi ɗai tajigla ad ĩ kɨ deg loi tube, i ndɨ alɨn dɔ kujgt a? 2Ɓebo kɨ ɗoosɨ kɨ ngégakɔl. Ɓebo kɨ kɨse ngãi, ɓebo ronel. Kɨtɔlg loi tɔin kɨ kiyaɗɔɔ al, oin ta ɗɔɔt al tɔ. 3Ngékõɓeg loi ãin nat,
na hɔnd kanj kad
ndan kɨrãg lod dɔ gãt,
hɔnd ta kɨɗabe,
lon ndɨ ãin ne na kɨsãi.
4Kɨtɔ 'nten, m'elɨn m'an:
I turɨn takumsɨ kɔ romt,
i nyàmɨn ad m'nõ kɨtɨngabil.
Ɔsmɨm kɨ dɔtdɔt
kad kamm sɔl al,
dɔ nujkɔt lo ɓebo lo deg lom.
5Kɨtɔ ɓone i ndɔ kamkɔl
kɨ ndɔ tuj, kɨ ndɔ ɓool,
i ndɔ kɨ ɗe ko ro Bɨraɓe Luwaht Ngetɔg tube,
kam hollo nyakookamndilt.
Tetɨn ndogbɔrrg,
kookumtondo aw kɨ dɔ mbalbogt.
6Deg kɨ dɔning Elam unɨn ɓɔl kɨrãg
dɔ pusɨ sɨnda ɗɔɔgt kɨ ngékald.
Deg kɨ ɓebo Kir teen kɨ derdɔg lod.
7Hollog lod kɨmaj dum
ɗoosɨ kɨ pusɨ sɨnda ɗɔɔg,
na ngékald ɗan rod woi,
ɗan tabit't losɨ kɨta ɗɔɔ.
8Ngĩn nyakutdɔ lo Juda kɔ.
Ndɔt'n non ur kumi kɨdɔ kuj
ngom nyaɗɔɔt'n a kunɨna kút.
9Oon ndogbɔrr lo ɓebo lo Dabid,
tɔsɨ tetɨn kɨ log dang dang.
I kawɨn man kɨ kam lo ngon mant kɨber.
10I tɨdan kujg kɨ Jerusalem,
i tetɨnd kɨber kad deg alɨn dɔ
ndogbɔrrt udɨn kɨ kamt al.
11Urɨn bulo man
mbɨna ndogbɔrrgt
kɨjoo kɨta man
kɨ kam bulo ngom mant kɨmaɗi.
Na urɨn kumsɨ kɨdɔ ngéɗaat al,
i nɔlɨn lo kɨ ro ngekɔjta
ɗaat maɗi nõ al tɔ.
12Ndɔt'n non
Bɨraɓe Luwah Ngetɔg tube
kunsɨ kad i nõn kɨ gu kɨ nda,
kad i ngɨsen dɔsɨ,
kad i dɔn ɓoosɨ kɨ kub kɨllagum.
13Na i ronel kɨ tɔi dɔ.
Tɔlɨn mangg, jan kɔ batg,
san dã na ãin kasɨnduu,
na ndɨ elɨn anan:
Ad kɨ san na j'ãin
kɨta loti j'a j'oi.
14Bɨraɓe Ngetɔg kɨtɔitɔi kɨdɔn tee kɨ dɔn romt,
elta mbimt an:
Rota, a nyan go ɗagootal 'nten kɔ al mbã kɔisɨ,
kel Bɨraɓe Luwah Ngetɔ kɨtɔitɔi.
Eliakim a ɗa kɨla goot Sebnat
15Titbe kel Bɨraɓe Luwah Ngetɔg kɨtɔitɔi: Aw ro bɨradɔ kujt lo ngar, ro Sebnat'n ndahna dɔ kujt, na ela an:
16I ɗi awɨn nẽbe a?
De loi i nẽbe
kad ur bulo ɓad loi.
Ur bulo kam lot kɨ dõ,
kad tɔsɨ kama ad asɨna kam mbalt a?
17Oo maj, Bɨraɓe a lai kɔ sãi kɨ tɔgɨn,
tit hɔi kɨ band.
18A ɓiri nja kɨɗa, ke nja joo,
kamla a lai tit bal be, kɨ dɨlalot.
Nu la a oit,
nu la pusɨɗɔɔg
kɨmaj tɔi loi a int.
A ĩ nya kɨrosɔl kuju lo ngei.
19M'a m'tuɓai kɔ londɨt loi,
m'a m'ɔrri kɔ kam kɨlat loi.
20Ndɔt'n non m'a m'kun
ɓer lom Eliakim ngon Hilkija.
21M'a m'la kub kɨlaɓer loi roat,
m'a m'dɔ ɓoa kɨ nyadɔɓo loi.
M'a m'la tɔg kõɓe loi jiat,
a i bɔw ngéndɨ Jerusalemt
kɨ ngékɨɓe lo Juda.
22M'a m'ada lakle
lo ngékɨɓe lo Dabid jiat,
a tee tabit a ne,
de a ut al,
lon a ut tabit a ne,
de kɨ asɨ tee goto.
23M'a m'ɓera titbel sɨnda
kam lot kɨngang,
a tel pong kɔsɨgon ku ngékɨɓet lo bɔwa.
24Kɔsɨgon lo ngékɨɓe lo bɔwa tube a goto, koa kɨ ngakaa, kɨ jo ɗa kɨlag tube, tasag kɨ jo ningg. 25Ndɔt'n non, kel Bɨraɓe Ngetɔg tube, bel sɨnda kɨ nda kɨber kam lot kɨngang kaa ne, a gana kɔ ad so kɨ nyag tube kɨdɔat, a nuj kɨta Bɨraɓe elta.
Currently Selected:
Ejai 22: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
