Ejai 24
24
Bɨraɓe gangta dɔ dɔningt
1Oon. Bɨraɓe a tuj dɔning,
a tela gootɓet.
A teltakum dɔning,
a tɨnda ngéndɨ kamt tĩ kɔ.
2Ngejanyamosɨ ke de kɨ kari,
ngeɓer kɨ ɓer lon,
dekɨdẽ kɨ ɓer lon.
A ɗa nya kɨ ngeɗaw nya,
a ɗa nya kɨ ngendugo nya.
A ɗa nya kɨ ngetɨnanya de,
a ɗa nya kɨ ngekad nya tɨna
kɨ mana dɔt ho.
A ɗa nya kɨ de'n girra i dɔat,
a ɗa kɨ de'n girra goto dɔat.
3Dɔning kɨtaagbe nujkɔ,
lan horr ɓeg kɨ ndɔɔg,
Bɨraɓe elta 'nten.
4Dɔning hɔ ndo, tɔg deg goto,
ngéndɨ dɔningt tube
rod oi siw ad nyemɨn,
na ro deg oi yelel.
5Deg telɨn dɔning kɨyerrt,
tɔin dɔ tag kɨ kam tat lo Luwah,
mbelɨn mberkɨndag,
gangɨn kunkɔ'n lad nat kɨ Luwah.
6Kɨtɔ 'nten ndɔl ndɨ tujɨn dɔning,
ngéndɨ kamt ndɨ dain ne
yod kɨtɔ majal lod.
Kɨtɔ 'nten horr õ ngéndɨ dɔningt
oin ad kɔrd nãi tẽbe.
7Bɨra nduu tut,
dĩndu kaa ndulo,
deg tube'n
kamd i kɨ ronel ye,
tajigla tõn ɗusɨɗusɨ.
8Ronel lo ngénda kɔd ngo tɨga,
ronel lo ngéndom goto,
ronel lo ngékug kɨndeh tɨga tɔ.
9A ãin kasɨnduu
kɨ pa kɨ kɔsɨ gog al,
kasɨ kɨngang a atbang
ta ngékãiat.
10Ɓebo'n de gotot tel gootɓe,
kujg tube tad i kɨ kut
De asɨ kand kamt al.
11Deg kon kɨdɔ ɗobgt paa
kɨta ngah kasɨ nduu,
na ronel goto par kɨnõt,
ronel goto kamɓet.
12Nujkɔ koon la nãi ɓebot ye.
Tɔsɨn tabitg kɨ kand kam ɓet
tetɨn kɨber, ɓebo tel du mbal.
13Kɨtɔ a i titbe dɔningt
kɨ girrdegt kɨ dang dang:
Nya a nãi ngãi al
tit kag ɓirg lon jan ne ɓirg,
tit'n a ɓurɨn ne goot
kand nduu lon jan ne woi.
14Na ĩgɨn nãin kɨ dɔd dõ
a unɨn ndid kɨ dõ
kon ne kɨ ronel.
Ko kad bahbot ndubɨn
maj kɨtɔitɔi lo Bɨraɓe.
15Ɔsɨgon Bɨraɓe,
in ngé kɨ loɓakàdt.
Adɨn tɔ Bɨraɓe Luwah lo Israel
ko kɨ logt kɨkad bahbokatgt.
16Ko dɔngoi dɔningt
j'oo dɔ ndi pa ndub 'nten:
Kɔsɨgon kɨ dɔ Luwaht kɨ denesew.
Na mĩ m'el m'an:
M'tuj, mĩ de kɨ m'tuj
Ngékundɔdeg ndɨ unɨn dɔ deg
Kun dɔ deg ndɨ aw kɨkete kete.
17Nya kɨkootɓool, mbẽ kɨ gum
ton nõsɨt in ngéndɨ dɔningt.
18De'n ãi kah nya
kɨkootɓool a ne, a so mbẽt,
na de'n tee kam mbẽt
kɨtɨga a ne, gum a hɔa.
Kɨtɔ burrolog kɨ dɔrãt teen,
na girr dɔning yee yɨkɨtyɨkɨt.
19Dɔning kaai, dɔning tet so,
dɔning yee yɨkɨtyɨkɨt.
20Dɔning yee tit de kɨ kasɨ ɗaa be,
dɔning yee tit kujkam be.
Tɔidɔta loa ɔi ngãi dɔat,
a so, na a ɓai gog al.
21Ndɔt'n non Bɨraɓe a nda ɔj koosɨg
kɨ dɔrãt, kam dɔrãt dõ,
kɨ ngarg kɨ dɔningt ne.
22A kawɨnd kɨnat lo kɨɗabe,
tit'n a kawɨn ne de dangaig
kam holɓet. A utɨnd dangait,
na go ndɔgt kɨ ngãi a nda ɔjɨnd.
23Ndɔt'n non nah a hɔndo,
na ro kàd a sɔla,
kɨta Bɨraɓe Ngetɔg kɨ tɔitɔi a õɓe
dɔ mbalbo Siõt kam Jerusalem,
kunja a ɗa ngereng nõ kɨbogt loa.
Currently Selected:
Ejai 24: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
