Ejai 14
14
Israelag a telɨn kɨ dɔningt lod gog
1Ta a õ kam Bɨraɓe kɨta Jakob, a tel mbed deg kɨ Israel gog, kad ndad kam dɔningt lod. Mbahg a tĩnyan na sed, a ɓon na kɨɗa kɨ ngékɨɓe lo Jakob. 2Girrdeg madg a hɔnd kɨ rodt dɔningt lod, deg'n non a telɨn nyakagɓe lo ngékɨɓe lo Israel, kam dɔningt lo Bɨraɓe, tit ɓerg kɨdɨngã kɨ kɨdẽ. Deg'n hɔn Israelag ɓert maɗi ye, a in ɓerg lo Israelag ho. Israelag a õnɓe dɔ degt kɨ ngéɗa sed nya kɨ lo ngetɔgt. 3Israel, ndɔ mad Bɨraɓe a adi taakò dɔ kɔr rɔkɨt loi, kɨ daiyog, kɨ kɨlaɓer kɨngang'n ndan dɔit, 4A ɔsɨ pa kɨ terr,
kɨdɔ ngar kɨ Babilont an:
Ɗi kɨbe, Ngetɔ koh nya goto.
Ngeɗa nya kɨ lo ngetɔgt goto.
5Bɨraɓe hɔ gɔlkɔp
lo ngéɗamajalg tet,
kɨ kag kõɓe lo ngarg,
6in ndan ne girrdeg kɨ dang dang
kɨ wong lod kɨtɔlsɔkɨr,
kɨ nda kɨkanj nya ta,
in õn ne ɓe dɔ
girrdegt kɨ dang dang kɨ wong,
na dan rod ndo
kɨkanj kookumtondo.
7Dɔning kɨtaagbe taakò,
ndɨ lom,
ngéndɨt mban girr ko kɨ ronel.
8Kag sipresg ɗan ronel kɨta toi,
lon i so maɗi nu,
kag Sedɨrg kɨ Libã anan:
ngega kag mad aw rojt al.
9Lo kɨ koo ɓai ɓirɓir kɨtatɔi,
lon elɨn ne ta ɗei.
A ndɔl ndil ngékoig kɨtatɔi,
kɨbog tube kɨ
dɔningt,
ad ngarg tube ngékõɓe
dɔ girrdegt kɨ dang dang
ɓain dɔ pong kõɓegt lod.
10In tube a elɨn anan:
Ĩ tɔ tɔgi goto titj be e?
I tel titj ho.
11Maj loi kɨtɔitɔi,
ɗisɨ kɨ koo
nat kɨ kah kɨndehg loi;
tɨratoi ɗoosɨ kɨ kɨdeg,
na kɨdeg in nyakutdɔi tɔ.
12Titbãi i so ko dɔrãt.
Kɨmẽ dɔg ɗa mboo,
Ngon bijalo kɨ ɓai wɔ.
Titbãi ɔsɨ lain kɨ dɔningt.
Ĩ ngekɨre dɔ girrdeg kɨber. 13El an:
a al kɨ dõ dɔrãt,
a i nda pong kõɓe loi dõ
dɔ kɨmẽgt lo Luwah,
a i ndɨ dɔ mbal
Kawnat lo koosɨg kɨ dõ
dɔngoi lo kɨ dɔɔt,
14a al kɨ dõ dɔ kilndiit,
a ĩ tit Ngetɔitɔi.
15Na i ɗisɨ
kɨ kam lot kɨ Koo,
kam holɓet kɨwo kɨɓing.
16Ĩgɨn ooin ye, urɨn kumd kɨ dɔit,
a gaan ta dɔit, anan:
i de'n a ad
ngéndɨ dɔningt ndadɨn,
na ad kõɓeg yeen ale?
17De'n tel dɔning
dɨlalot,
nuj ɓebog,
na nya deg'n hɔnd ɗɔɔt
kad telɨn ɓe lod al.
18Ngarg tube lo girrdeg kɨ dang dang,
ĩgɨn oin to taan ko kam dɔɓadgt lod kɨ kɔsɨgon,
19na ĩ kɨ la kɔ sãi
kɨ dɔɓad loi,
tit ngon kɨ kɔrr kɨ deg kidɨna.
Utɨn dɔi kɨ nin deg
kɨ tɔlɨnd kɨ kiyaɗɔɔ,
Tɔsɨ tɨland dɔ mbalg
kɨ kam holɓe koit,
tit nin de kɨ deg ɓan kɨ njad be.
20Na a duwɨn nat sed dɔɓadt al,
kɨta i tuj dɔning loi,
i tɔl deg loi tɔ.
A elɨn ta lo ngaka deg
kɨmajal gog al mbãkɨnõt.
21M'elsɨ kad i ɗan lo tɔl nganag kɨdɨngã
kɨta tɔlnag lo bɔwdg,
na ɓeta bãi taan dɔning ɓaitɔ,
na ɗan ɓebog ɗoosɨn ne dɔning ɓaitɔ.
22M'a m'ɓai m'ndoord,
kel Bɨraɓe Ngetɔg tube,
m'a m'nuj Babilon kɔ
kɨ deg loa kɨ nãin kɨ dɔd dõ,
kɨ ngakaa kɨ koah, kel Bɨraɓe.
23M'a m'tela lo to ndurg kɨ man bɔrr.
M'a m'ta ko kɨ ndɨsa nujkɔ,
kel Bɨraɓe Ngetɔg tube.
Bɨraɓe a nuj ngar kɨ Asiri
24Bɨraɓe Ngetɔg tube nda yo, an:
Nya'n m'nda kamt kete a ɗa nya.
Tit'n m'ɔj a ɗa nya.
25M'a m'tet ngar
kɨ Asiri dɔningt lom,
na m'a m'ɓaa
girr njamt mbujmbuj
dɔ mbalbogt lom.
M'a m'un jug loa
kɔ degt lom kɔ.
M'a m'un nyato loa kɨkoi
dɔ bɔgdt kɔ tɔ,
26'Nten la i kɔjtaɗa kɨ m'ɔj
dɔ dɔningt kɨtaagbe.
'Nten la i ji kɨ la kɨ dõ
dɔ girrdegt kɨ dang dang tube ye.
27Lon Bɨraɓe Ngetɔg tube un ndin
kad n'ɗa nya.
Nõ a teta a?
Nõ asɨ hɔ jia kɨ la kɨ dõ,
telɨn kɨgog a?
Takel Bɨraɓe dɔ Pilistiagt
28Ɓal koi ngar Akaj takel
Bɨraɓe 'nten tee:
29Ĩn Pilistiag tube,
ot ɗan ronel,
kɨta gɔlkɔp kɨ ngendasɨ tet.
Kɨtɔ ngɨra lit ngandam a teet,
a tee kɨ li mad kɨ ngeɓai kɨ bɔgɨn.
Takel Bɨraɓe dɔ deg kɨ Moabt
30Na ngéndog a ngahn lo sanya,
de kɨdangtg a ton ber kɨ lapia,
na m'a mad ɓo tɔl ngɨrai,
m'a m'tɔl ndeg deg loi kɨ nãin.
31Ĩ ɓebo kɨ ngang
ɔsɨ pa nõ
ĩ ɓebo, ud wi.
Pilistiag tube,
adɨn rosɨ oi yelel.
Kɨtɔ kilndii mad
ndɨ ɗe ko dɔɔ,
na de mad kɨɗa kudt
kɨ nãi gog goto.
32Ta ɗi a i tur
ngékɨlag lo Pilistiag a?
Kɨ Bɨraɓe nda girr ɓebo Siõ
na ngéndog ku degt loa ngahn
loyarod kamat.
Currently Selected:
Ejai 14: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
