Ejai 13
13
Takel Bɨraɓe dɔ Babilont
1Ta kɨ dɔ Babilont,
nya'n Bɨraɓe tee dɔ ad Ejai,
ngon Amots laten:
2Usɨn drapo dɔ mbalbot
kɨ to dɨla.
I kon, i welɨn jisɨ,
kad ɗen tabitgt
lo mbaiɓeg.
3M'nda mber deg lom'n
m'ndad kɔtko kɨɗa,
m'kun kɨrãɗɔɔg lom
ĩgɨn ndɨ ɗan ronel
dɔ tetɗɔɔt lom,
4Oon kah nya mad
ko dɔ mbalbogt,
tit kah deg koosɨg.
Oon kɨse lo kõɓeg
kɨ girrdeg kɨ dang dang
kɨ kawɨn na nõ.
Bɨraɓe kɨ Ngetɔg tube
nda kumɨn ndɨ oon
koosɨ ngéɗɔɔg kɨta ɗɔɔ.
5Ndɨ ɗen ko dɔningt kɨsãi,
ko tangoi dɔrãt,
i Bɨraɓe kɨ nyakatg lo
wong lon kɨtɔlsɔkɨr,
ndɨ ɗe kad'n nuj dɔning kɔ.
6Kon ko wa kɨta ndɔ lo Bɨraɓe
i nderbe.
A ɗe tit nujkɔ
kokɨro Ngetuj nyat.
7Kɨtɔ 'nten
ji deg tube a oi yelel,
na kam dekɨɗen
a gang man.
8Kɨngasa a gad,
tokooj kɨ kamkil a hɔd,
a turɨn rod tit dekɨdẽ
kɨ tokooj ɗaa be.
A nɔlɨn na kɨ ndil kɨtee saw,
kumd i tit horr
kɨ ndɨ õ be.
9Oon ndɔ lo Bɨraɓe ndɨ ɗe.
I ndɔ ɗa ta kõ kɨ wong,
ndɔ wong kɨtɨngabil,
kad dɔning tel gootlo,
kɨ n'nuj ngéɗamajalg kɔ tɔ.
10Kɨmẽg kɨ dɔrãt
kɨ ɓutdg, kunj lod a unj al.
Kàd a diw til loɓant,
nah a ɗa nda gog al tɔ.
11M'a m'nda m'ɔj ngéndɨ dɔningt
kɨta kam majal lod,
kɨ ngéɗamajalg
kɨta tɔlnag lod tɔ.
M'a mad dɔngang
lo ngégaburo a goto,
na ta kɨ ɓa kɨ dõ lo deg
kɨkanj kookumtondo,
12M'a mad lo ngah dekɨdɨngãg
ngang tɔi lɔr kɨjanjoi.
M'a mad lo ngah de
ngang tɔi lɔr kɨ dɔning Opirt.
13Kɨtɔ 'nten
m'a mad dɔrã yee,
na dɔning a yee
yɨkɨtyɨkɨt loɗant,
kɨta wong lo Bɨraɓe Ngetɔg tube,
ndɔ wongt loa kɨtɨngabil.
14Kamla dekɨɗen
a tel kɨ ɓe koojɨnt,
dekɨɗen a ãi kɨ dɔningt lon,
tit wal kɨ ndɨ tuɓana,
ke batg kɨ ngekuld goto.
15Dekɨɗen'n a so jidt,
a ɔsɨ tɔlɨna.
Dekɨɗen'n a hɔna,
a tɔlɨna kɨ kiyaɗɔɔt.
16A rigɨjɨn ngandg takumdt,
a tirɨn nyag kɨ kujgt lod pur,
a ton kɨ nẽdg kɨ lo ngetɔgt.
17M'a m'sɔk Medɨg kɨ dɔdt,
ĩgɨn a oon larjã nya madt al,
na a ɗan ronel dɔ lɔrt al tɔ,
kad ndoorɨnd.
18Kɨrãg lod a tɔl basag,
a oon kumtondo
lo ngan kɨɗoig al,
a oon kumtondo
lo ngang al.
19Babilon, nyatɔko lo kõɓeg,
nya kɔsɨgon,
nyagaburo lo Kaldeag.
A i tit Sodom
kɨ Gomor be,
ĩgɨn Luwah nujd kɔ.
20De a ndɨ Babilont al kɨnõt,
a hɔn londɨt al kɨnõt
ngakat kɨ ngaka.
Arab mad kɨɗa kaa
a ɗa kujkub lon kɨ dõ tit al.
Ngéngom bat a adɨn nyakulg
lod ton tit al tɔ.
21Mɨlag a ton kamt,
kɔig a ɗoosɨn kam kujg,
bulumg a hɔn londɨd tit,
bal bĩãg a ndamɨn na kamt.
22Ɓong a tĩn na
kam kuj kõɓegt lod,
bisɨkolog a ton
kam kuj ronelt lod.
Kaglo loa a ɗe nderbe,
a lan ndɔag dɔt al.
Currently Selected:
Ejai 13: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
