Daniel 9
9
Daniel elta kɨ Luwah kɨta girrdeg lon
1Kam ɓalt kɨdasa bang lo Darius ngon Asuerus kɨ girrkooj Medeg, lon ndana ngart dɔ kõɓet lo Kaldeag ye, 2kam ɓalt kɨdasa bang lo kõɓe loa, mĩ Daniel m'nder girr maktubg kɨkunjɗang, taa ne, m'ger girr ta'n Bɨraɓe elta ngekelta kɨ tant Jeremi dɔ kɔr ɓalgt'n Jerusalem a in kɨ tuj nõ, ad i ɓal dɔtanãimɨta. 3Kamla m'sah ɗob kelta kɨ Bɨraɓe Luwaht kɨ rotĩm, nat kɨ kɔgro nyasa kɨ la kub hɔndo kɨ ndɨ kam buhoort kɨ ɔj dɔ tɔrrndi.
4Mĩ Daniel m'elta kɨ Bɨraɓe Luwah lom, m'tɔ tam dɔ majalg lo girrdeg lom m'an: A. Bɨraɓe Luwah kɨbo kɨ kɨkootɓool, i ngengom go kunkɔ loi kɨ ngekɔj kamkẽ deg'n ndɨ tarɨn, na ngomɨn go mberkɨndag loi.
5Jĩ kɨ ɗa majal, kɨ ɗagootal, kɨlaɗaj majal, kɨ tai ɗɔɔ tɔ. Jĩ kɨ tɔ roj kɔ go mberkɨndagt loi kɨ tag kɨgang loi. 6Jĩ kɨ nel mbij kɨdɔ tat lo ɓerg loi al ad i ngékelta kɨ tait, ĩgɨn elɨn ta ngarg loj kɨ mbaiɓeg loj kɨ bɔwjg kɨ deg tube kɨ dɔningt loj kam tɔit. 7Ĩ Bɨraɓe, denesew i loi, na jĩ taa ne, takum kɨ rosɔl i loj ɓone, kɨ lo deg kɨ dɔning Juda kɨ ngéndɨ Jerusalem, kɨ Israelag tube kɨ ngendɨ logt kɨ nderbe kɨ ngéndɨ logt kɨsãisãi kam dɔninggt tube, ĩn i tuɓad kɔ tit kɨta nyaɗad kɨro al ĩn ɗan ndoorɨn ne. 8Bɨraɓe, rosɔl i loj, rosɔl i lo ngarg loj kɨ mbaiɓeg loj, kɨ bɔwjg kɨta jĩ kɨ ɗa majal kɨ ndoorɨn. 9Na kõkam kɨ nyàgo majal kɔ i lo Bɨraɓe Luwah loj ke neni, jĩ ngétaai ɗɔɔ. 10Kɨ tel roj go mberkɨndat'n i ndaj mbera kɨtakul ɓerg loi ngékelta kɨ tait. 11Israelag tube tɔin dɔ ta loi, na tɔn rod sãi kɨ ta loi, na mbet koo dɔ nyandoo loi. Kamla ndɔl kɨ yokɨnda'n i kɨndang kam tat lo Moij, ɓer loi ye, son dɔjt, kɨta jĩ kɨ ɗa majal kɨ ndoorɨn. 12Luwah i tɔlkon tag'n el dɔjt kɨ dɔ ngekõɓegt loj ĩgɨn õnɓe dɔjt. I ad tuj kɨbobe tee dɔjt Jerusalem, nya kɨ titbe ɗa nya nja kɨɗa ad de oo al ɓaitɔ. 13Tujg'n non tee dɔjt tit'n ndangɨn ne kam tat lo Moij, na jĩ kɨ kɔ Bɨraɓe Luwah loj kɨ rotĩj al, kɨ nyàgo tɔidɔtag loj al, kɨ j'oo dɔ rota loi kɨ tĩjt al tɔ. 14Kɨtɔ 'nten la Bɨraɓe i ɗan go tujg'n non kete woi, kamla ada teen dɔjt, kɨta Bɨraɓe Luwah loj i ngeɗa nya kɨdenesew kam kɨlaɗangt tube, na jĩ kɨ tel roj go tat loi al.
15Na tajigla Bɨraɓe Luwah loj, ĩn i tee kɨ girrdeg loi kam dɔning Ejipt't kɨtɨga kɨ jii kɨtag, in i ad tɔi ko tit'n kon ɓone; jĩ kɨ ɗa majal, jĩ kɨ ɗagootal. 16Bɨraɓe, i ɔj'j ɗa denesew loi kɨ ndɔg ndɔg. I nya ta wong loi kɨ tɔl sɔkɨr dɔ Jerusalemt, kɨ ɓebo loi dɔ mbalbot loi kɨjaɓat. Kɨtɔ majalg loj, kɨ kɨ lo bɔwjg kɨ tel nyataj kɨro degt tube'n gugɨn dɔj. 17Kɨtɔ 'nten tajigla Luwah loj, oo dɔ ta'n ɓer loi ndɨ el sei, kɨ kɔg'n ndɨ kɔi kɨ rotĩn. Kɨtatɔi Bɨraɓe, kɨ ad takumi ɔsɨ unj dɔ lot loi kɨjaɓat'n deg tujɨna.
18Luwah lom, i nel mbii oon dɔ ta lom. I tee kumi i nɔlɨn ɓebo loj'n tuj, ɓebo'n kunɨn tɔi dɔt. I kɨta nyaɗaj kɨdenesew hã ndɨ kɨ j'elɨn sei ta kɨ rotĩj al, na kɨta tar loi kɨ kõkam loi kɨbobe. 19Bɨraɓe, oo dɔ kɔ loj. Bɨraɓe, i nyàgo majalg loj kɔ. Bɨraɓe, i nel mbii, kɨtatɔi Luwah lom, i ɗa nya mad kɨtaj, ot ndɨ kɔk. Kɨtɔ ɓebo loi, kɨ deg loi ĩn kunɨn tɔi dɔdt.
Ta dɔ kaglogt kɨdɔtanãimɨta
20Lon m'ndɨ m'elta kɨ Luwah ɓaitɔ ye, m'ndɨ m'tɔ tam dɔ majalt lom, kɨdɔ majalt lo girrdeg lom Israel, m'ndɨ mad kɔ lom kɨ rotĩ aw nõ Bɨraɓe Luwaht kɨta mbalbo kɨjaɓat lo Luwah lom. 21Lon m'ndɨ m'elta kɨ Luwah ɓaitɔ ye, malaika Gabriel, in m'ooa kam nyakookamndilt kete nõ, ɓai kanangbe ɗe romt, i dɔkàd la kadkarit kɨ lokɨsɔle.
22Adɨm m'ger girr nyag'n m'ger al, elɨm an: Ĩn Daniel, m'ɗe tajigla kɨtakad kɨ m'adi nyager kɨmaj kɨ goosɨ ger girrnya. 23Lon i mba girr kɔ kɨ rotĩi ye, ta mad tee ko ro Bɨraɓet, kad m'ɗe m'eli kɨta Luwah tari ngãi. Kɨtɔ 'nten maj kad i nel mbii oon dɔ ta kɨ ɔj dɔ nya'n oon dɔ nyakookamndilt non. 24Ɔjɨn kaglog tanãimɨta nja dɔtanãimɨta dɔ girrdegt loi, kɨ dɔ ɓebot loi kɨjaɓat kɨtakad tɔidɔtag tɨgan, kɨtakad girr majal gang, kɨta la kadkari kɨjakɔ kutɨn dɔ ɗagootal kɨtakad and kɨdenesew kɨ to kɨnõt, kɨtakad tɔlɨn kon nyakookamndilt kɨ tag lo ngékelta kɨ ta Luwaht, kɨtakad lo kɨjaɓat kɨtɔitɔi ĩ kɨ wur kɨ yib gog. 25Kɨtɔ 'nten maj kad i ger nya 'nten, na i ger girra tɔ. Ndɔt'n ta tee tait ɔj dɔ tel ɓeɓert kɨ ɗa ɓebo Jerusalem gog, kam ndɔt'n non, mbã kad kɨ wur, ad i mbaiɓe'n Luwah kɔta a ɗe ye. Kaglog tanãimɨta, kaglo kɨɗen asɨ ɓal tanãimɨta. Kamla kaglog mad asɨ ɓalg kɨtanãimɨta nja dɔkɨbojidet gidaijoo a tɔin: Deg'n awɨn ɓert ye a telɨn, a ɗan natlog kɨ ndogbɔrrag gog na a i kaglot kɨngang ngãi. 26Na go ɓalgt kɨtanãimɨta nja dɔkɨbojidet gidaijoo'n non ye, a tɔlɨn kɨ wur kɔ, nya loa a goto. Deg lo mbaiɓe kɨ a ɗe a nujɨn ɓebo kɨ lo kɨjaɓat kɔ. Dɔboia a ɗe tit kɨ man kɨ tɔi dɔ kongɨr, ɗɔɔ a to mbã kɨdɔboit, na ta tee kad nujɨna telɨna gootɓe. 27Na mbaiɓe'n non a la kɔn nat kɨ koosɨdeg kɨ yokɨnda kaglog tanãimɨta nja kɨɗa, na ngawdan kaglog kɨtanãimɨta'n non a ne, a ɔg dɔ kadkari kɨjakɔ kɨ kadkari kɨla, na ngenujɓe a ɗe dɔ bɔg kujt kɨjaɓat mbã dɔboia in gangɨn dɔ ngenujɓet'n non so dɔat.
Currently Selected:
Daniel 9: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
