Daniel 10
10
Nyakokamndilt in Daniel oo ta bah Tigɨrt
1Kam ɓalt kɨkõmɨta lo kõɓe lo Sirus ngar lo Perseg ye, takɨmund mad i kɨ tee dɔ kad Daniel'n tɔa i Beltasar. Ta'n non i ta kɨjeje, na i ta dɔ ɗɔɔt kɨbo. Daniel ger girr ta'n non, na aw kɨ goosɨ ger girr nyakookamndilt'n non tɔ ho.
2Kaglot'n non, mĩ Daniel m'hɔndo ndɔ dɔjoo gidaikɨɗa. 3M'sanya kɨmaj al, m'ɔd dã ke kasɨnduu tamt al, m'wur rom kɨ yib al tɔ, mbã ndɔ dɔjoo gidaikɨɗa'n non tɨgan tube. 4Kam ndɔt kɨ kõdɔjoo gidaisɔɔ lo nah kɨdasa ye, m'ɗa dɔ kongɨr baht kɨbo ad i bah kɨ tɔa i Tigɨr. 5M'un kumm kɨ dõ, na m'oo de mad kɨ la kub lẽ ront, dɔ ɓon kɨ nyadɔɓo lɔr kɨ dɔning Upaj. 6Roa i tit medkɔsɨ mbal krisolit be, takuma unj tit telndii kɨ tel yolong be, kuma i tit ndõhorr be, jia kɨ njaa ĩn tit ningakasɨ kɨ kusɨ kɨ ndulo ngẽingẽi be, na ndi takela i tit ndɨ bahkad koosɨ deg be tɔ. 7Mĩ Daniel kɨ kɨɗambe m'oo nya'n non kam ndilɨmt; deg kɨ i ĩn nat sem ye, oon nya'n non al. Kɨngasa gad ad ãin na yan rod. 8Titbe la m'nai kɨ kɨɗambe kad m'oo nya kɨkootɓool'n m'oo kam ndilɨmt. Tɔg tee romt tube al, na takum'm ɓa ndà ad rom oi yelel. 9Kamla m'oo dɔ ndi de mad elɨm an, na lon m'oo dɔ ndia ye, m'so ber kɨ takum'm ad ɓi tɔlɨm sɔkɨr, na m'nda jim ber. 10Taa ne, ji mad ɔdɨm, unɨm udɨm dõ, adɨm m'ɗa dɔ gojɨmt, na nda jim ber, na rom ndad ngãi.
11De'n non elɨm an: Ĩ Daniel, ĩ de kɨ Luwah tari ngãi, i hɔtɔgi ba i nelɨn mbii kad oon dɔ tagt ke ger girr tag'n m'a m'eli nõ. I ɓai i ɗa dõ kɨta Luwah lam kɨroit tajigla. Lon ɗa elɨm ta ɓaitɔ ye, m'ɓai m'ɗa dõ kɨ rondad. 12Elɨm tɔ an: Daniel, ot ɓool. Kɨtɔ dɔ ndɔt kɨdasa nu, lon i nda kamit kad i ger girr nya'n ɗa nya non. Kɨtɔ 'nten i sɔlɨn dɔi nõ Luwaht loi ye, Luwah oo dɔ tag lon el sia nõ, na mĩ m'ɗe kɨ ta kɨ tur kɨ m'adi oo ye. 13Na mbaiɓe kɨ ngékõɓe dɔ dɔningt kɨ Perst taam ɗɔɔ ndɔ dɔjoo gidaikɨɗa, kamla Mikael, kɨkɨɗa ku bɨra malaikagt, ɗe ɗa sem. Kɨtɔ 'nten la m'nain gog ro ngargt kɨ Perse.
14Na m'ɗe tajigla kɨtakad m'adi i ger girr nyag'n a teen dɔ girrdegt loi kam ndɔgt kɨdɔboit, kɨta nyakookamndilt'n non i ta dɔ ndɔgt kɨsãi ɓaitɔ.
15Lon ɗa elɨm tag 'nten ɓaitɔ ye, m'tur ta kumm kɨber, na m'asɨ kel ta mad al ad m'ndɨ tam mbo. 16Taa ne, kɨkɨɗa kɨ i tit kɨ ngan deg ɔd ndartam, kamla m'tee tam, m'elɨn ta ye. M'elta ngeɗa nomt m'an: A. Bɨraɓe lom, nyakookamndilt'n non ad kamm gang man, na rom oi yelel. 17Titbãi mĩ ɓer lo Bɨraɓe lom, m'a m'asɨ kelta sei al, i Bɨraɓe lom. Tajigla kaa ne, tɔgɨm kɨɗa kaa ne goto, ye titbãi m'a m'asɨ kel sei ta a? 18Kamla kɨ kɨɗa'n non kɨ i tit kɨ de, ɔdɨm gog ɓaitɔ, na adɨm tɔg kad m'ngang. 19Elɨm an: Ĩ de kɨ Luwah tari ngãi, ot ɓool. Kɨ i ndɨ kɨ lapia. Ire kami, ire kami. Lon ɗa elɨm ta ɓaitɔ ye, rom ngang kongkong, ad m'el m'an: Kɨ Bɨraɓe lom elɨm ta kɨta ĩ ad tɔg adɨm m'ngang woi.
20Kamla ndɨjem an: I ger kɨtɔɗi m'ɗen roit e? Tajigla m'a m'tel kɨgog kɨtakad m'ɗɔɔ kɨ mbaiɓe nge kõɓe dɔ Perst, na lon m'a m'tee m'aw ye, oo mbaiɓe ngekõɓe dɔ Grekgt a ɗe. 21Na m'a m'eli ta'n i kɨndang kam maktub kɨ rotat: De mad kɨɗa kɨ ngeɗasem kad ɗɔɔn kɨ mbaiɓeg'n non goto, na Mikael bɨrangekõɓe losɨ koon.
Currently Selected:
Daniel 10: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
