Daniel 8
8
Nyakookamndilt'n Daniel oo dɔ tat lo bal bat kɨ bal bĩã
1Kam ɓalt kɨkõmɨta lo kõɓe lo ngar Beltasar ye, mĩ Daniel m'oo nya kam ndilɨmt, go nyakookamndilt'n m'oo kete.
2Nya'n m'oo kam ndilɨmt la ten: Mĩ kamɓet kɨ Sust, ɓebo lo ngar kɨ kam nusɨ dɔningt kɨ Elam. Kam niit ye, m'oo tit mĩ nderbe kad baht kɨ tɔa i Ulai.
3M'un kumm kɨ dõ m'oo bal bat kɨ gaja i joo ɗa ta baht. Gaj bat kɨjoo'n non ngal asɨn nõ al, na kɨkɨɗa ngal tɔi kɨmad; gaj bat mad ɓa gog ngal tɔi kɨ mad. 4M'oo bal bat'n non tit ɗa ɔsɨ nya ko loɓakàdt kɨ ko lokɨdɔɔ kɨ ko lokɨɓodo. Dã mad kɨ asɨ gua goto. De kɨ kug de mad kɔrr jiat goto tɔ. Ɗà nya'n kama ndig, na tɔga ɓai kɨ dɔ madt kɨdɔtdɔt.
5Lon m'ɗa m'ga ta dɔ nyagt m'oo ɓaitɔ ye, m'oo bal bĩã mad ɓai ko lokudkàdt, aw kɨngɔd kam dɔningt kɨtaagbe kɨkanj kad nja ɔd ning. Bal bĩã'n non, aw kɨ gaj mad kɨbo ngãi, gajɨn non ɗa mbɨna kumagt. 6Ɗe kɨdɔ bal bat'tn gaja i joo'n m'ooa ɗa kad baht nõ, na ãi kɨdɔat kɨ tɔgɨn tube. 7M'ooa ɗe nderbe kɨro bal bat'n non, kuma il kirir kɨ wong kɨ tɨngabil, ɔsɨ bal bat kɨ tɔg kɨ ngãi, tet gaja kɨjoo, na tɔg bal bat asɨ kad ɗɔɔn sia goto. Bal bĩã laa bal bat ber ningt, ɓaa mbujmbuj kɨber kɨ njant. De kɨ asɨ kad ɗe ug ɔrra jiat goto. 8Kamla bal bĩã tel kɨbo kɨdɔtdɔt, na lon ngah tɔg ngãi ye, gaja kɨbo'n non tet kɔ; kamla koot't gaj madg kɨbobo sɔɔ ɓant, na ɓan tad kɨ dɔkum duniat kɨsɔɔ.
9Goot gog gaj kɨdu mad ɓa ko kam kɨkɨɗa kudt, na bo kɨdɔtdɔt ko lokɨ ɓodot, ko ɓakàdt kɨ ko dɔning kɨmaj ngãi ad i dɔning Israel. 10Tel kɨbo kɨdɔtdɔt ngãi kɨ tɔi mbã kɨ koosɨg kɨ dɔrãt dõ, tɔsɨ kɨmadg ku koosɨgt kɨ dɔrãt tɨlad ningt nat kɨ kɨmẽ madg, na ɓad mbujmbuj kɨ njant kɨ ber.
11Gajɨn non tel kɨbo kɨdɔt kɨ tɔi mbã ndoor Ngar Ngekoosɨg in i Luwah, ɔg dɔ la kadkari kɨlahorrt kɨndɔgndɔg kad Luwah, na yerr kɨ lo kɨjaɓat lo Luwah tɔ.
12Na kɨlaɗag kɨ majal ɗa ad kadkari kɨlahorrt kɨ la kɨndɔgndɔg tel girr tɔg loa. Gajɨn non tuj kadkam Luwah kɨ jeje lo deg. Na nyag tube'n ɗa ye, maj urra kamt.
13Kamla m'oo dɔ ndɨ malaika el an: Nyag'n oo kam kamndilt'n non dɔ tat lo kadkari kɨlahorrt kɨndɔgndɔg kɨ ɔgɨn dɔ la, kɨ tɔidɔta lo Luwah, kɨ yerr kɨ lo kɨjaɓat lo Luwah, nat kɨ koosɨ ngéɗɔɔg kɨ tetɗɔɔ ho ɓad mbuj mbuj kɨber kɨ njan ye, nyag 'nten ɗɨngãt a goton a?
14Na malaika kɨdasa turɨm an: A to mbã lokɨsɔleg kɨ lokɨsĩg ad i ndɔ dub joo kɨ ɓumɨta asɨ, kamla a arɨn lo kɨjaɓat'n non ye.
Kɔrr girr nyakookamndilt kɨkõjoo
15Lon mĩ Daniel m'oo nyag'n non kam ndilɨmt ye, m'sah ger girra, na malaika mad ɗa nomt, i ɓakumta de. 16M'oo dɔ ndi de mad mbɨna kongɨr bah Ulait, ko an: Gabriel, ad de'n non ger girr nyakookamndilt'n non. 17Titbe la Gabriel ndɔt nderbe lot kɨ m'ɗat, na lon m'oo ɗe ye, ɓool ɗam adɨm m'so kɨber kɨ takum'm. Na elɨm an: Ngon de, maj kad i ger, nyakookamndilt'n non i kɨta kaglo kɨdɔboit. 18Lon ɗa elta sem ɓaitɔ ye, ɓi tɔlɨm sɔkɨr, na takum'm i ningt; na la jin ɔdmɨn, unɨn ndam dõ lot'n m'ɗat kete. 19Kamla elɨm an: Oo. M'a m'adi i ger nyag kɨ a ɗan nya kaglo dɔboit'n Luwah ɔj woi, lon Luwah ndan ngong wong lon kɨtɔlsɔkɨr. 20Bal bat'n ooa gaja i joo ye, ɔj go kõɓe lo Medeg kɨ Perseg. 21Bal bĩã'n oo ye, ɔj go kõɓe lo Grekg. Gaj kɨbo kɨ ɗa mbɨna kumat ye, i ngar kɨdasa. 22Na ta lo gaj kɨtet'n non in gaj kɨsɔɔ ɓan gootat ye i titbe: Kõɓeg sɔɔ a ɓain ko kam girrdegt'n non, na tɔgd a asɨ kɨ kɨdasa nõ al. 23Na dɔboi kaglo kõɓe lod, lon ngétɔidɔtag ɗan majal ngãi kɨ tɔi dɔ ye, ngar mad kɨ ngeger girr terrtag kɨ takuma ot ɓool ngãi a ɓai. 24A aw kɨ tɔg ngãi, na a i tɔg loa kɨ kɔsɨdɔa al; a tuj lo ngãi kɨ tɔi; a ɗa nya ngãi, na maj a ura dɔt; a nuj deg kɨngangg kɨ deg kɨjaɓat kɔ. 25Kɨtakul kumtɔg loa, a ad maj urr nyaɗaa kɨgo lo gool degt, dɔa a sɨr ad a tɔi ron kɨ dõ. Ngar'n non a tɔl deg ngãibe'n oon anan i kaglo ndɨ lomt. A ɓai ndoor Ngar lo ngarg'n i Luwah. Kaglot'n non la Ngar lo ngarg a nuja kɔ kɨkanj de mad ɗasia. 26Nyakookamndilt dɔ lokɨsɔlegt kɨ lokɨsĩg'n tit'n oo ye, i ta kɨ jeje. Na ĩ, i ngom nyakokam ndilt'n oo nõ kɨta i ta dɔ ndɔgt kɨsãi ɓaitɔ.
27Na mĩ Daniel, kaglot'n non, kumm ilɨm, kamla mõi ɗam ndɔ asɨ tat kamla m'ɓai dõ ye, na lon m'yoot taa ne, m'oo go kɨlag lo ngar gog. Na nyakokamndilt'n m'oo nõ otɨm ɓool ngãi, na de mad kɨ ger girra goto.
Currently Selected:
Daniel 8: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
