THUPHUAN 20
20
Kum Thawng Khat
1Cen vancung in vancungmi pakhat zuktolh ai a kut in tawpnailo khur honghnak tawhfung le thir cikcin rit ngai awh vung hmu ing. 2Ciami vancungmi in khua hlanlai ai rulpui tihnak rulhreng heh pom ai thir cikcin in khit ai tawpnailo khur songah kum thawng khat song hla i. Ciami rulhreng tu Khuasia ihlahle Satan tihnak i.#Sem 3:1 3Kum thawng khat a khim hlanah aisu khai zawl nawn maseh tiin ciami khur songah tawh in kalh ai hnikhnaihhnak tacik khen cih i. Cia hnuaah can comniu song hlat leh tuh i.
4Cen bawi tohkham le a vumai a totu, thukhanthilhnak a hnenah pehnak mite hmu ing. Jesuh ai a phuanghnak thutak le Pathian thu phuang tlang manin rek a tuartute ai rauhlate hmu ing. Anite tu sahrang bia tlang lo i, a lim khai bia tlang lo i; sahrang ai hnikhnaihhnak tu amahte cal ah ituseh amahte ban ah ituseh nai tlang lo i. Anite tu nunglehsal ai Pathian tohkham vumah to in Khrih thawn kum thawng khat song uk tlang i. 5A dang mithite tu kum thawng khat a bo hlan ahcen tho tlang lai lo i. Hemi tu mithi tholehhnak a hmasa i. 6Hemi bangin mithi tholehhnak a hmasa ai a teltu heh mi lungawi le mihmuifu i. Vel hnih thihhnak in amahte vumah thu nai nawn lo i. Pathian le Khrih caah suangbawi per tlang tuhai amah thawn kum thawng khat song uk tlang tuh i.
Satan Sung I
7Kum thawng khat hnuaah Satan tu a thawng hlakhnak in suah tuhai, 8Laivum khuahacang ah a piaktu miphunte zawl tuhin feh tuh i; ciami miphunte tu Gog Le Magog#20:8 Gog le Magog tihnak heh miphun tam ngai ai hming ti ca i. tihnak i. Raltawng tuhin Satan in hmunkhat ah fingkhawm tuh i; anite tu tifingriat kam ai siatnawi zah tuh i.#Ezk 7:2; 38:2, 9, 15 9Lailung vum khuahacang ah feh tlang ai Pathian ai minungte umhnak hmun le a daih zehnak khuapui tu kulh tlang sio i. Ikhalselai van in mai tla ai kang sek i. 10Cen amah bawmtu Satan heh sahrang le prophet khel lonhnak, kat mailipui songah lon i. Ciata ah sun le zan in cawhhnak tuar tuh ngio ihang.
Hnuataber Thukhanhnak
11Cen a thawmlian mi bawi tohkham ngo le a vumai a totu hmu ing. Bawi tohkham vumai a totu mithmuh in van le lai tu tlan kawm ai hmu thil nawn lo i. 12A thi cia mite a ham a sen ti loin bawi tohkham hmaiah a ding tlang hmu ing; cia hnuaah nunhnak laibu tihnak laibu dang pakhat parh tlang lala i. Mithite tu ciami laibu songai khumciahnak amahte naper bangin thukhan i.#Dan 7:9-10 13Cen tifingriat in a songai a ummi mithite suahpui i. Thihhnak le mithi khua inkhai amahte henhnak mithite suah kawm ve i. Amahte veksen in amahte naper ciahnak bangin thukhan i. 14Cen thihhnak le mithi khuate tu tilipui bang mailipui songah lon i. Hemi mailipui tu vel hnih thihnak i. 15Aisu khai nunhnak laibu songai hming ngan lomi tu mailipui songah lon i.
Currently Selected:
THUPHUAN 20: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
