THUPHUAN 18

Babylon Hnawmhnak

1Cia hnuaah vancungmi pakhat vancung in a zuktolh hmu ing. Amah tu thunaihnak huham lian ngai nai ai a tleuhnak in laivum pumpuhluk varruai sio i. 2Cawm roh in au ai, “Nupang nu tlu zo i! Babylon thawmlianhnak bo zo i! khuasia le rauhla sia in khur ai a songah ningdulkul le hmuhhehkul vaniu a phuncang in dim i.#Isa 13:21; 21:9; Jer 50:39; 51:8; Thup 14:8 3Zaimantifangin miphun hmuahhmuah in amahte taksa hiam sualhnak zu ding ai ri tlang sek i. Kumpibawite thawn tisa sualhnak bawn tlang ai sumtuahtute khai suphnak nai lo amahte tisa hiamhnak thawmin milian ah can i,” tiin ti i.#Isa 23:17; Jer 51:7

4Cen aw dang pakhat vancung in za ai,

“Suak tu ih, i minungte,

khia nu hnenin suak tu ih.

A sualhnak songah tel mah ih,

cawh a tuarhnak songah

khai tel mah ih.#Isa 48:20; Jer 50:8; 51:6, 45

5Zaimantifangin a sualhnak tu

van ban ai, a phatlohnak tu

Pathian in hih ngio i.#Sem 18:20-21; Jer 51:9

6Ningmah ning bawn bangin

a vumah bawn thun tu ve ih.

A bawnhnak let hnih in phuzul tu ih.

Ning ding tuhai a roihhnak tahin

let hnih hat in ding tuhin

a khuat songah roih sah tu ih.#Saam 137:8; Jer 50:29

7Songlawihnak le nunnuamhnak

amahte veve a pe awng zah in,

urhnak le lungsiahnak pe tu ih.

Zaimantifangin a thinlung niu in,

‘Heta ah to ing, kumpibawinu ing,

hmaitong ilo ing, lungsiahnak

tawk tuh awng lo ing,’ ti i.#Isa 47:7-9

8Hetih imanin ni khat songah

mangrinlo in pul in hlun tuh i.

Urhnak, lungsiahnak le

rian tawk tuh i.

Mai in taihnak tawk tuh i.

Zaimantifangin a thukhantu

Bawipa Pathian tu Hmualnaiber i,”

tiin ti i.

9A tisa sualhnak le hiamhnak songai a dahtu laivum kumpibawite in Babylon khuapui mai in a kanghnak maikhu hmu fangin kap tlang tuh murhmo i.#Ezk 26:16-17 10Ciatihin a tuarhnak hmu fangin tuar pang tuh ve lau manin vanghla ah ding tlang ai, “Zaitluk laukul i! Zaitluk in tihikkul i! Khua maksak le a hatmi Babylon khuapui! Nazi pakhat songah cawhhnak na tawk heh!” tiin ti tlang tuh i.

11Laivum sumpaite khai ciami nu cawhhnak a tawk heh lungsiapui in kap tlang i, zaimantifangin aisu inkhai amahte thil lai tlang nawn lo i.#Ezk 27:31, 36 12Aisu inkhai amahte sui, ngun, lungmankhung, tikep lungmankhung le rizai in takhnak pon ngo, mepian sannum pon, pu pon, pon san le a ngah har ngai thing ai bawnhnak a phuncang, vuiha le thing mankhung ai bawnhnak a phuncang, dar, thir, lungngo le, #Ezk 27:12, 13, 22 13Thingkawng hmui, masala, rimhmui, mura rimhmui, frankincense rimhmui le cabitti le thau, nimden le sangvut, kawlpaw le tuu, siphuh le siphuhleng, sal le minungte aisu inkhai lai nawn lo i. 14Sumpaite in ciami nu hnenah, “Nai singlai tiin kin daihhiamhnak thil pha hmuahhmuah pairal sek zo i; na lianhnak le na songlawihnak tu bo zo sek ai zaikom inkhai ngah lehsal tuh nawn lo isi,” ti tlang i. 15Ciami khuapui songah sumpai in a lian mite in tuarhnak songah tel tuh ve pang lau tlang manin a hlapui ah ding tlang i. Anite lungsia in kap tlang tuhai, #Ezk 27:31, 36 16“A laukul i! Tihikkul i! Babylon khuapui heh! rizai ai takhnak pon ngo, pon sannum le pon san in thuam de ai sui hlawnthil le lungmankhung le tikep lungmankhung in par awng liang de i. 17Ikhalselai nazi pakhat songah a hlawnthil hmuahhmuah pai sek i,” ti tlang tuh i.

Lawng mawngtu bawite le lawng totute hmuahhmuah in, lawng naperte le ti vumai pumcawmhnak a situte hmuahhmuah a hlapui ah ding tlang ai, #Isa 23:14; Ezk 27:26-30 18khuapui a kanghnak maikhu hmu tlang fangin, “Hemi khuapui bang khuapui zaikom inkhai um awng lo i,” tiin au tlang i.#Ezk 27:32 19Amahte lu ah laivut phulh in kap tlang murhmo ai, “A kihkul le tihikkul lawmlam i, he khuapui hrangah! Lawng nai ai ti vumah sumtuahtu hmuahhmuah tu he nupang ai lianhnak thawmin milian ai a canghnak khuapui i. Ikhalselai nazi pakhat songah a naihnak hmuahhmuah borul i! ti tlang i.#Ezk 27:30-34

20Aw vancung, Babylon a hnawmral manin na lungawi tu! Aw Pathian ai minung a hlathnakte le prophette lungawi aipuang in um tu ih! Zaimantifangin na vumah a thil bawnhnak manin Pathian hnenin cawhkuan tawk zo i.#Danp 32:43; Jer 51:48

21Cen vancungmi thahat ngai pakhat in lungto pakhat, fangrialhnak lungtleppui tia heh khai ai tifingriat songah lon ai, “Hemi bangin Babylon khuapui tu lonhnak tuar tuhai aisu inkhai hmu leh tuh nawn lo i.#Jer 51:63-64; Ezk 26:21 22Babylon khuapui congcing tum thawm le minung awzai, titilu tum thiam pawl in titilu tum thawm le thirhlung tum thiam pawl ai thirhlung tum thawm tu na songah thang tuh nawn lo i. Zaibang naper ita inkhai pertu na songah um tuh nawn lo i. Fang rial awthawm za tuh nawn lo ihang.#Ezk 26:13; Isa 24:8 23Zaikom inkhai na songah maikhuat var tuh nawn lo i. Mohoitu tlangval aw ituseh mothar aw ituseh na songah leng tuh nawn lo i. Na songai sumpaitute tu laivum ai huham nai ber pawl i, ikhalselai na dawithiamhnak in laipua vum mi zongzong heh zawl sek zo isi,” tiin ti i.#Jer 7:34; 25:10

24Prophet le Pathian mithiangte ai thisan a songah luang manin Babylon tu cawhhnak tuar zo i. I, lailung vumai rek a tuartute ai thisan tu he khua songah luang i.#Jer 51:49

Currently Selected:

THUPHUAN 18: RZB

Highlight

Copy

Compare