MIPUM SIARHNAK 32
32
Jordan Run Nisuah Lamai Umtute
(Danp 3:12-22)
1Reuben le Gad hinte tu sumhnam tampui nai i. Amahte sumhnam hrang Jazer le Gilead ramte tu rampha i, ti a hmu fangin, 2Moses le suangbawi Eleazar le Israel konghoitute hnenah kawi ai, 3“Hemi ram songah Ataroth, Dibon, Jazer, Nimrah, Heshbon, Elealeh, Sebam, Nebo le Beon khuate, 4Bawipa ai bawmhnak in Israel mite in kin ngahhnak khuate heh sumhnam hrang rampha i. Kin le sumhnam tam ze nai fawn i ing. 5Ciamanin ning kin hio tu ilai he ram heh kin pinvo tuhin kin zem tu hram ih. Jordan run ralkhat lamah um tuhin Jordan run heh a tan kin siang tu ih,” tiin ngen i.
6Ciafangin Moses in Gad le Reuben hinte hnenah, “Ning unau Israel mite raltawng a feh laiah ning in heta ah um tum i si? 7Bawipa ai pehnak ram songah lut loin le Jordan run tan tuh loin zaitin Israel mite thinnauruai ngam i sim? 8Tunai ning bawnhnak bangin ning pate in he ram cul tuhin Kadesh Barnea in i hlat laiah bawn awng zo i.#Mip 13:17-33 9Anite in Eshkol phairawn tian feh ai ram heh sik tlang i. Ikhalselai a let tlang leh fangin Bawipa ai pehnak ramah feh tum loin Israel mite thinlung heh hlinhliruai sio i. 10Ciamanin Bawipa tu cia nia ah a thinraw ai, #Mip 14:26-35 11‘I vumah rinsanhnak nai lo manin Egypt ram an a suaktute songin kum kul le a vum lam pasal hmuahhmuah heh Abraham, Isaac le Jacob hnenah i thukhamhnak Canaan ramah aisu khai hleng tuh hrimhrim lo i,’ tiin cukcam in thukham awng zo i. 12Bawipa hnenah rinsanhnak a naitu Kenizmi Jefunneh ai fapa Kaleb le Nun ai fapa Joshua siarlo, midang hmuahhmuah Bawipa ai cukcamhnak songah tel sio i. 13Israel mizapui vumah Bawipa tu a thinraw ai Bawipa a lungawiruai lotute a thi sek hlanlo kum sawmli song ram ro ram car ah vakvai tuhin bawn i. 14Cen tunin ning santhar misualralte, Israel mite vumah tuar tuh pha lo Pathian ai thinrawhnak hlengruai leh tuhin ning pupate ca aiawh ve i si! 15Ning, Reuben le Gad hinte, tunin Bawipa ai hnuahlun ning nuam lo rori lekhaw he Israel mizapui heh Bawipa in hampalak ah zam tuh lala ai siatsuah tuh sek ai ningmah heh mi siatsuahtu tuh i si,” tiin ti i.
16Ciafangin anite in Moses heh ngen ai, “Kin tuute hrang lungto in a khawk bawn tuhai kin fate ca ving ai kulhhnak khuapui sa hmasa tuh i ing. 17Cia hnuaah kin unau Israel mite thawn raltawng tuhin ralring tuhai amahte khur tuhhnak ram kin lang sek hlanlo kinmah in hmaihoi in kin ralte tawng tuh i ing. Ciatihin kin tawng lakfangin kin fate tu ciami ving kulhhnak khuapui songah um tu selai he ramai a ummi miphunte ai siatsuahhnak tuar tuh lo i. 18Israel hinte in a co tuhhnak ram a lut sek hlanlo kin ram le kin khua ah let tuh lo i ing. 19Hemi Jordan run in nisuah lamah kin covo ngah zo manin Jordan khat lam ralah kin in Israel hin dangdangte lakah covo zaikhai lang tuh lo i ing,” tiin ti tlang i.
20Cen Moses in anite hnenah, “Ning relhnak heh ning thinlung ngaingai lekhaw tunai panin Bawipa mithmuh ah raltawng tuhin ralring tu ih. 21Ning ralkapte a veksen in pakhat khai pelh loin Jordan run tan tu ilai Bawipa ai hohnak in raltawng tu ih. Bawipa in kin ralte a neh hlanlo le, 22ram a lang hlanlo tawng tu ih. Cia hnuaah Bawipa hnenah le ning unau Israel mite vumah ning ṭuanvo ning ben fang ian in let tu ih. Ciatihin Jordan run in nisuah lam he ram heh Bawipa in ning ram tuhin khoruai tuh i. 23Ikhalselai ning thukhamhnak hlun hlah le i sikhaw, tunin ling cia tu ih, Bawipa vumah misual i tuh i si. Ling lo i ing, tiin ti leh mah ih. Ning sualhnak in ning phorhsuak tuh thotho i. 24Ciamanin ning khuapuite sa tu ilai ning tuute hrang a khawk bawt tu ih. Cen ning thukhamhnak bangin bawn tu rori ih,” tiin ti i.
25Cen Gad le Reuben hinte in, “Bawipa, na thupeciahnak bangin bawn tuh i ing. 26Kin nupui le kin fate le kin kawlpaw le kin tuute heh heta Gilead peng khuapui hmuahhmuah ah um tuseh. 27A dang hmuahhmuah Bawipa ai ho in raltawng tuhin ralring ihang ing. Na tihnak bangin Jordan Run tan in raltawng tuh i ing,” tiin Moses hnenah ti tlang i.
28Ciamanin Moses in Eleazar, Joshua le Israel konghoitu dangte hnenah thupe ai, #Jos 1:12-15 29“Gad le Reuben hinte in Jordan Runpui tan ai Bawipa ho in raltawng tuh feh ai, amah bawmhnak in ram neh sek lekhaw amahte co tuhin Gilead ram pe tu ih. 30Ikhalselai anite in Jordan Runpui tan loin raltawng hlah lekhaw ningmah bang thotho in Canaan ram amahte covo ngah tu hlen seh,” tiin ti i.
31Ciafangin Gad le Reuben hinte in Moses hnenah, “Bawipa Pathian ai thupeciahnak bangin bawn tuh i ing. 32Amahte hmaiah hriamnam thawn Canaan ramah feh tuhai tawng tuh i ing; ikhalselai Jordan run nisuah lam he ram heh kinmah covo thotho in um tuh i,” ti tlang i.
33Ciamanin Moses in Amor kumpibawi Sihon le Bashan kumpibawi Og ai ram hmuahhmuah heh a hiang khua le ramte thawn, Gad le Reuben hinte le Manasseh hin a hrekte hnenah pe i. 34Gad hinte in ving kulhhnak, Dibon, Ataroth, Aroer, 35Atroth Shophan, Jazer, Jogbehah, 36Beth Nimrah le Beth Haran khuapui hmuahhmuah khiah saleh i. Amahte tuu hrang a khawk bawt i. 37Cen Reuben hinte in, Heshbon, Elealeh, Kiriathaim le, 38Nebo, Baal Meon (hming thleng zo), le Sibmah khuapuite heh sa tlang leh i. A sa thar lehhnak khuapuite tu hmingthar bawn sio i.
39Cen Manasseh ai fapa Machir hinte in Gilead ram tawng ai a lang hnuaah ciami ramai ummi Amor mite tu hnawt tlang sek i. 40Ciamanin Moses in Gilead ram heh Machir hinte hnenah pe ai ciata ah um tlang i. 41Manasseh hin Jair in khuatenau hmuah tawng ai a lang hnuaah Jair khuatenau tiin hming thar bawn i. 42Nobah inkhai Kenath khua tawng ai khua hiang khuatenaute thawn lang ai amah hming suangin Nobah tiin a hming bawn i.
Currently Selected:
MIPUM SIARHNAK 32: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
