MIPUM SIARHNAK 31
31
Midian Tawnghnak Ral Thianghlim
1 Bawipa in Moses hnenah, 2“Israel mite vumah amahte bawnhnak manin Midian mite phuzul tu. Ciami na bawn ben fangin laivum in na nunhnak bo tuh i,” tiin ti i. 3Ciafangin Moses in Israel mite hnenah, “Bawipa vumah thil a bawnhnak manin Midian mite tawng tuh le cawh tuhin ralring tu ih. 4Israel hin khat in ralkap thawng khat ṭen suah tu ih,” tiin ti i.
5Ciamanin Israel hin khat in thawng khat ṭen suak ai raltawng tuhin ralkapte thawng hlaihnih ralring i. 6Cen Moses in suangbawi Eleazar ai fapa, a cianghlim thilrite kilkhawltu, Phinehas khiah amahte hotu tuhin le raltawng thupehnak thirhlungte kengtu tuhin bawn ai ralkapte thawng hlaihnih hlat i. 7Bawipa in Moses hnenah a thupeciahnak bangin Midian mite heh tawng ai pasal hmuahhmuah rek berh i. 8Midian kumpibawite panga Evi, Rekem, Zur, Har, le Reba khai thi i. Midang khai tampui rek ai Beor ai fapa Balaam khai vang in rek i.
9Ciahlaiah Israel mite in Midian nupang le naupangte khai pom ai kawlpaw le tuu le sumhnam dang hmuahhmuah le sumsaw hmuahhmuah khai long sek i. 10A khuapuite le riahbukte khai mai in tai sek i. 11Amahte suthnak thilri hmuahhmuah le sumhnamte le ralpom mite tu, 12Jericho khua an Jordan Run khat lam ral, Moab zawllai ai ummi Moses, Eleazar le Israel mizapui hnenah fehpui i.
Ralkapbur Let I
13Moses, Eleazar, le Israel hotu dangte hmuahhmuah ralkapbur hmuak tuhin feh tlang i. 14Ciafangin Moses tu raltawnghnak in a lettu ralkap thawng khat hotu le ralkap zakhat hotute vumah a thinraw ai, 15“Zaimanin nupang hmuahhmuah khai rek berh lo i si? 16Balaam thu ngai in Peor ah Israel mizapui Bawipa hmaiah misual hlotlau bangin a cangruaitu heh hemi nupangte i, ti ling lo i sim? Ciaman i Bawipa ai minungte vumah ursia a hleng khiah!#Mip 25:1-9 17Ciamanin pasal hmuahhmuah heh naupang tianin rek tu ilai pasal a pawl cia nupang hmuahhmuah khai rek tusek ih. 18Ikhalselai fenute le pasal pawl lai lo nupang hmuahhmuah heh ningmah ca zuah tu ih. 19Cen mi a rektu le mithi ruang a daitu hmuahhmuah ni sarih song riahbuk pualam ah um tu ih. Ni thumhnak nia le ni sarihhnak nia ah ningmah cianghlim dun tu ilai ning pommi nupangte khai cianghlimruai tu ih. 20Hnikpon ituseh, savun ai bawnhnak thilri ituseh, mehmul le zanthing ai bawnhnak thil ituseh, pakhat khai pelh loin cianghlimruai tu sio ih,” tiin ti i.
21Cen suangbawi Eleazar in raltawnghnak in a hlengtu ralkapte hnenah, “Bawipa in Moses hnenah thupeciahnak dante tu hemite i. 22Mai ai kangziam thai lo sui, ngun, dar, thir, thirkhang le suante hmuahhmuah, 23mai in hul tu ilai ciatihin cianghlimruai tu ih. A dang hmuahhmuah thiangfaihnak tidap in somciang tu sio ih. 24Ni sarihhnak nia ah ning hnikpon sawp tu sio ilai riahbuk songah ning lut siang tuh ing,” tiin ti i.
Thil Longhnak Zem I
25 Bawipa in Moses hnenah, 26“Nangmah le Eleazar le mizapui hotute thawn a longhnak thilri, sumhnam, le a pommi minungte siar tu ih. 27Cen a bangvek in hmun hnih in khan tu ih. A hrek tu ral tawngtute ca le a hrek tu Israel mizapui ca tuh i. 28Ralkapte co tuh songin ral pommi za nga ah pakhat tu Bawipa ca siahkhon ah lang tuh i si. Kawlpaw, laak, tuu le me khai cia bangpah in lang tuh i si. 29Bawipa ca tuhin Eleazar hnenah pe tu ih. 30Cen mizapui co tuh songin ral pommi sawmnga ah pakhat heh siahkhon in lang tulai kawlpaw, laak, tuu, le me khai ciatih bangpah in lang tu. Cen Bawipa ai Ponhlam kilkhawltu Levi mite hnenah pe tu,” tiin ti i. 31Bawipa ai tihnak bangin Moses le Eleazar in bawn kawm i.
32-35A hnia lam aite tu ralkapte in amahte ca ai a dahhnak hlaiah langhnak le a pommi i: tuu ting ruk thawng sawmsarih le thawng nga, kawlpaw thawng sawmsarih le thawng hnih, laak thawng sawmruk le thawng khat, le fenuhim thawng sawmthum le thawng hnih. 36-40Hemi songin a hrek ralkapte cohnak tu: tuu ting thum thawng sawmthum thawng sarih le za nga i ai, Bawipa hnenah pehnak siahkhon ah zaruk le sawmsarih le pa nga; kawlpaw thawng sawmthum le thawng ruk i ai Bawipa hnenah pehnak siahkhon ah sawmsarih le pahnih pe i; Laak thawng sawmthum le za nga i ai Bawipa hnenah pehnak siahkhon ah sawm ruk le pakhat pe i; fenuhim thawng hlairuk i ai Bawipa hnenah pehnak siahkhon ah sawmthum le pahnih pe i. 41Cen Bawipa thupeciahnak bangin Bawipa ai siahkhon khiah Moses in Eleazar hnenah pe i.
42-46Cen Israel mizapui ai covo tu: tuu ting thum thawng sawmthum le thawng sarih le za nga, kawlpaw thawng sawmthum le thawng ruk, kalauk thawng sawmthum le za nga, le fenuhim thawng hlairuk i. 47Hemi songin Bawipa thupeciahnak bangin minung ituseh, sumhnam ituseh, sawmnga ah pakhat heh Moses in lang ai Bawipa ai Ponhlam kilkhawltu Levi mite hnenah pe i.
48Cen ralkapte hotu ralbawite tu Moses hnenah feh tlang ai, 49Moses hnenah, “Bawipa, kin hohnak ralkapte heh siar ai khim tlang sio i. 50Ciamanin kin langciahnak sui hlawnthil, ngunvel, kutruk, bilvuh, le khite koih i ing. Kin tlanhnak tuhin hemi hlawnthilte tu Bawipa hnenah kin nunhnak ca in pe i ing,” tiin ti tlang i. 51Ciafangin Moses le Eleazar in amahte koihhnak sui hlawnthilte heh sang kawm i. 52Ralbawite ai pehnak sui hlawnthil tu amahte veksen in cuai za le cuai hra zolo rit i. 53Ralbawi lote in amahte langhnak hlawnthil tu amahte ca ṭen ah lang i. 54Moses le Eleazar in Bawipa ai Israel mite himhnak tuhin sui hlawnthilte tu Ponhlam songah dah i.
Currently Selected:
MIPUM SIARHNAK 31: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
