MIPUM SIARHNAK 28
28
A Tikcu Kelah Hibawlhnakte
1-2Israel mite in rimhmui rong hibawlhnakte Bawipa hnenah a can khim fangin sel tuhhnak rel tuhin Bawipa in Moses hnenah thupe i.
3 Bawipa hnenah rong hibawlhnak ning sel tuhhnak tu hetihin i: nisiar maitai hibawlhnak hrang a hnahpha kum khat khim tuucang niute lu hnih; 4tuucang niu lu khat tu zing lamah, a dang lu khat tu zan lamah, sel tuh i si. 5Ciami hibawlhnak thawn hmunkhat in fangcang hibawlhnak khai sel tu ilai olive siti a pha ber khuat khat thawn roihhnak sangvut rel tan i tuh i. 6Bawipa hnenah rimur hibawlhnak imanin Sinai Mual vumah a hmasaber hibawlhnak bangin hemi hibawlhnak tu nisiar maitai hibawlhnak i. 7Ciami pakhathnak tuucang niu selhnak thawn dinti hibawlhnak khai sel tu ilai cabitti khuat khat khai puleng ah burh tu ih. 8Zing lam hibawlhnak ning sel bangin a pahnihhnak tuucang niu heh zalam ah sel tu ilai dinti hibawlhnak khai sel tu ih. Hemi tu rong hibawlhnak i ai Bawipa ca rimur i.
Sabbath Nia Hibawlhnak
9Sabbath nia ah kum khat khim tuucang niute lu hnih, rong hibawlhnak hrang olive siti thawn roihhnak sangvut rel khat heh dinti hibawlhnak thawn sel tuh i si.#Mat 12:5 10Hemi maitai hibawlhnak tu nisiar pe tuh fangcang hibawlhnak le dinti hibawlhnak hlaiah Sabbath nia ul fangin sel tuh hibawlhnak i.
Hlasiar Ni Hmasaber Ah Hibawlhnak
11Hlasiar ni hmasaber ah Bawipa hnenah a hnia lamai bangin tu pe tuh isi; kawlpawcang niute lu hnih, tuucang lu khat, kum khat khim tuucang niute lu sarih, a veksen in a hnahpha tuseh. 12Ciahlaiah olive siti thawn roihhnak rong hibawlhnak, kawlpawcang lu khat ah sangvut rel khat le a tan, tuucang lu khat ah sangvut rel tan thawn, 13kum khat khim tuucang niu lu khat ah sangvut rel tan thawn pe tuh i si. Hemi maitai hibawlhnak tu rongsel hibawlhnak i ai Bawipa ca rimur i. 14Fel ngai in dinti hibawlhnak lekhaw kawlpawcang lu khat ah cabitti khuat hnih, tuucang lu khat ah khuat khat le hrek, kum khat khim tuucang lu khat ah khuat khat pe tuh i si. Kum khat song hlasiar ni hmasaber ai maitai hibawlhnak sel fangin hlun tuh dan i. 15Cen nisiar maitai hibawlhnak ah cabitti ning telh ai hlaiah sualhlat hibawlhnak hrang mecang lu khat sel tuh i si.
Col Tello Puai Ai Hibawlhnak
(Sua 23:5-14)
16 Bawipa upat cawimawihnak ai bawnhnak Kansuak Puai tu Hla hmasaber ni hlaili nia ah bawn tuh i si.#Luat 12:1-13; Danp 16:1-2 17Ni hlainga nia in biahnak puai pan tuhai ni sarih song tuh i. Cia song hmuahhmuah col tello sang ai tuh i si.#Luat 12:14-20; 23:15; 34:18; Danp 16:3-8 18Puai hmasaber nia ah zaibang naper khai per mah ih. Pathian bia tuhin pumkhawm tu sawn ih. 19Maitai hibawlhnak sel tu ilai ciami tu Bawipa hnenah selhnak rongsel hibawlhnak i tuh i: kawlpawcang niute lu hnih, tuucang lu khat, kum khat khim tuucang niute lu sarih, a veksen in a hnahpha, sel tu ih. 20Fang hibawlhnak pha bik in bawn tu ilai olive siti thawn roih tu ih; kawlpawcang lu khat ah sangvut rel khat le a tan, tuucang lu khat ah rel khat, 21tuucang niu lu khat ah rel tan i tuh i. 22Ciahlaiah sualhlat hibawlhnak tuhin mecang lu khat pe tu ilai ciatihin mizapui cianghlimhnak hrang kuan leh hibawlhnak khiah bawn tuh i si. 23Hemi tu nisiar bawnhnak maitai hibawlhnak hlaiah pe tuh i si. 24Ciabang thotho in ni sarih song Bawipa hnenah rongsel hibawlhnak, amah ca ai rimhmui pe tuh i si. Hemi tu nisiar ning selhnak maitai hibawlhnak le dinti hibawlhnak hlaiah sel tu ih. 25Ni sarih nia ah biakkhawmhnak bawn tu ilai zaikhai per mah ih.
Rongkhawm Puai Ai Hibawlhnak
(Sua 23:15-22)
26Ning rongkhawm puai ni hmasaber, Bawipa hnenah fangthar ning sel fangin Pathian bia tuhin pumkhawm tu ilai zaikhai per mah ih.#Luat 23:16; 34:22; Danp 16:9-12 27Bawipa ca rimur, maitai hibawlhnak sel tu ilai, kawlpawcangte lu hnih, tuucang lu khat, le kum khat khim tuucang niute lu sarih, amahte veksen in a hnahpha ituseh. 28Ciami thawn olive siti roihhnak, fel ngai ai bawnhnak rong hibawlhnak sel tu ilai kawlpawcang lu khat ah sangvut rel khat le a tan, tuucang lu khat ah relkhat le, 29kum khat khim tuucang niu lu khat ah rel tan i tuh i. 30Ciahlaiah sualhlat hibawlhnak ah mecang lu khat pe tu ilai ciatihin mizapui ca sualhlat cianghlimhnak bawn tu ih. 31Hemi hibawlhnakte le dinti hibawlhnak tu nisiar ning bawnhnak maitai hibawlhnak le rong hibawlhnak hlaiah sel tuh i si.
Currently Selected:
MIPUM SIARHNAK 28: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
