MIPUM SIARHNAK 29
29
Kum Thar Puai Hibawlhnak
(Sua 23:23-25)
1Hla sarihhnak ni hmasaber nia ah biakkhawmhnak bawn tu ilai naper tuh lo i si. Cia nia ah thirhlung tum tuh i si. 2Bawipa hnenah rimur maitai hibawlhnak sel tuh i si; a hnahpha kawlpawcang niu lu khat, tuucang lu khat, le kum khat khim tuucang niute lu sarih tuseh. 3Olive siti thawn roihhnak sangvut in rong hibawlhnak fel ngai in bawn tu ih. Kawlpawcang hrang sangvut rel khat le a tan, tuucang hrang rel khat, 4kum khat khim tuucang niu lu khat hrang rel tan tuseh. 5Ciahlaiah sualhlat hibawlhnak hrang mecang lu khat pe tu ilai ciatihin mizapui cianghlimhnak hrang sualhlat cianghlimhnak bawn tu ih. 6Hemi hibawlhnakte tu hla thar ni hmasaber ai maitai hibawlhnak, rong hibawlhnak le dinti hibawlhnak hlaiah sel tu ih. Hemi rongsel hibawlhnakte heh Bawipa ca rimur i.
Sualhlat Nia Ai Hibawlhnak
(Sua 23:26-32)
7Hla sarih hla, ni hra nia ah Pathian bia tuhin pumkhawm tu ih. Rong ai mah ih, naper khai per mah ih.#Sua 16:29-34 8Bawipa hnenah rimur maitai hibawlhnak sel tu ih: kawlpawcang niu lu khat, tuucang lu khat le kum khat khim tuucang niute lu sarih, a veksen in a hnahpha tuseh. 9Olive siti thawn roihhnak sangvut in rong hibawlhnak fel ngai in sel tu ih: kawlpawcang lu khat hrang sangvut rel khat le a tan, tuucang hrang rel khat, 10kum khat khim tuucang niu ca rel tan tuseh. 11Cen mizapui cianghlimhnak hrang sualhlat cianghlimhnak, nisiar maitai hibawlhnak, rong hibawlhnak le dinti hibawlhnakte hlaiah sualhlat hibawlhnak hrang mecang lu khat sel tu ih.
Rongkhawm Puai Hibawlhnak
(Sua 23:33-44)
12Hla sarih, ni hlainga nia ah biakkhawmhnak bawn tu ih. Bawipa songlawihnak hrang he puai heh ni sarih song bawn tu ilai naper zaikhai per tuh lo i si.#Luat 23:16; 34:22; Sua 23:34; Danp 16:13-15 13Hemi puai ni hmasaber nia ah Bawipa hnenah mai thawn rongsel hibawlhnak rimur sel tu ih: kawlpawcang niute lu hlaithum, tuucangte lu hnih, le kum khat khim tuucang niute lu hlaili, a veksen in a hnahpha tuseh. 14Olive siti roihhnak rong hibawlhnak fel ngai in bawn tu ih: kawlpawcang lu khat hrang sangvut rel khat le a tan, tuucang lu khat hrang rel khat, 15kum khat khim tuucang niu lu khat hrang rel tan le dinti hibawlhnak sel tu ih. 16Ciahlaiah sualhlat hibawlhnak hrang mecang lu khat sel tu ih. Hemi hibawlhnakte tu nisiar maitai hibawlhnak, rong hibawlhnak le dinti hibawlhnak hlaiah sel tuhhnak i.
17Ni hnihhnak nia ah kawlpawcang niute lu hlaihnih, tuucangte lu hnih le kum khat khim tuucang niute lu hlaili sel tu ih. A veksen in a hnahpha tuseh. 18Cen rong hibawlhnak le dinti hibawlhnak khai kawlpawcang hrang, tuucang hrang, le tuucang niu hrang zaizah tuh ticiahnak bangin sel cih tu ih. 19Ciahlaiah nisiar ning selhnak maitai hibawlhnak, rong hibawlhnak, le dinti hibawlhnakte tu sualhlat hibawlhnak hrang mecang lu khat ning selhnak thawn sel cih tu ih.
20Ni thumhnak nia ah kawlpawcang niu lu khat, tuucangte lu hnih, kum khat khim tuucang niute lu hlaili sel tu ih. A veksen in a hnahpha tuseh. 21Cen rong hibawlhnak le dinti hibawlhnak khai kawlpawcang, tuucang, le tuucang niu hrangah zaizah tuh ticiahnak bangin sel tu ih. 22Ciahlaiah nisiar ning selhnak maitai hibawlhnak, rong hibawlhnak, le dinti hibawlhnakte tu sualhlat hibawlhnak hrang ai mecang lu khat ning selhnak thawn sel cih tu ih.
23Ni lihnak nia ah kawlpawcang niute lu hra, tuucangte lu hnih le kum khat khim tuucang niute lu hlaili sel tu ih. A veksen in a hnahpha tuseh. 24Cen rong hibawlhnak le dinti hibawlhnak khai kawlpawcang, tuucang, le tuu niu hrangah zaizah tuh ticiahnak bangin sel cih tu ih. 25Ciahlaiah nisiar ning pehnak maitai hibawlhnak, rong hibawlhnak le dinti hibawlhnak tu sualhlat hibawlhnak hrang mecang lu khat ning selhnak thawn sel cih tu ih.
26Ni ngahnak nia ah kawlpawcang niute lu kua, tuucangte lu hnih, kum khat khim tuucang niute lu hlaili sel tu ih. A veksen in a hnahpha ituseh. 27-28Hemi thawn hmunkhat in ni khathnak nia ai ning hibawlhnak a dangte khai a veksen in sel cih tu ih.
29Ni rukhnak nia ah kawlpawcang niute lu riat, tuucangte lu hnih, kum khat khim tuucang niute lu hlaili sel tuh i si. A veksen in a hnahpha tuseh. 30-31Hemi thawn hmunkhat in ni khathnak nia ai ning hibawlhnak a dangte khai a veksen in sel cih tu ih.
32Ni sarihhnak nia ah kawlpawcang niute lu sarih, tuucangte lu hnih, kum khat khim tuucang niute lu hlaili sel tu ih. A veksen in a hnahpha ituseh. 33-34Hemi thawn hmunkhat in ni khathnak nia ai ning hibawlhnak a dangte khai a veksen in sel cih tu ih.
35Ni riathnak nia ah biakkhawmhnak bawn tu ilai zaikhai per mah ih. 36Bawipa hnenah maitai hibawlhnak ai selhnak rong hibawlhnak rimur sel tu ih: kawlpawcang niu lu khat, tuucang lu khat, kum khat khim tuucang niute lu sarih, a veksen in a hnahpha tuseh. 37-38Hemi thawn hmunkhat in ni khathnak nia ai ning hibawlhnak a dangte khai a veksen in sel cih tu ih.
39Hemi hibawlhnak hmuahhmuah a tikcu ṭen ah Bawipa hnenah sel tu ih. Maitai hibawlhnakte, rong hibawlhnakte, dinti hibawlhnakte, sualhlat hibawlhnakte tu sel tuh sio i si. Hemite tu ning thukham khimruaihnak pumpak ṭen in selhnak hibawlhnak, ihlahle mah lungtho ngai in hibawlhnakte hlaiah sel tu ih.
40Ciatihin Bawipa ai thupeciahnak hmuahhmuah khiah Moses in Israel mizapui hnenah rel i.
Currently Selected:
MIPUM SIARHNAK 29: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
