MIPUM SIARHNAK 27
27
Zelophehad Ai Fanute
1Joseph ai fapa Manasseh, Manasseh ai fapa Machir, Machir ai fapa Gilead, Gilead ai fapa Hepher, Hepher ai fapa Zelophehad i. Zalophehad in fanu lek nai ai anite tu Mahlah, Noah, Hoglah, Milcah le Tirzah i. 2Ciami a fanute tu, Moses le suangbawi Eleazar, konghoitute le mizapui hmai Ponhlam dawngkham ah kawi tlang ai, 3“Kin pa in hampalak ah kin thi san zo i; fapa pakhat khai nai lo i. Bawipa a tawngcaitu Korah ai hnuahluntu lakah ani tu tel lo i. Amah ai sualhnak manin thi i. 4Fapa a nai lo manin zaimanin kin pa hming heh a songkhat lakin pairal tuh i? Kin pa unau lakah kin khai covo kin pe tu ve ih,” tiin ngen tlang i.
5Ciafangin amahte thu heh Moses in Bawipa zawt i. 6Bawipa in a hnenah, 7“Zelophehad ai fanute ngenhnak heh a dik i. A pa ai unau lakah anite khai covo pe tu ve. A pa ro heh anite in co tlang tuseh.#Mip 36:2 8Cen Israel mite hnenah rel tulai, mi pakhatkhat fapa nai loin thi lekhaw a rothil heh a fanu in co tuseh. 9Fanu nai hlah lekhaw a unau in co tuseh. 10Unau nai hlah lekhaw a pa ai unau in co tuseh. 11A pa khai unau nai hlah lekhaw a songkhat lakai a nong ber in co tu selai, amah ai cang tuseh. Hemi tu Bawipa kaimah ai thupeciahnak i ai Israel mite in a hlun tuhhnak dan i,” tiin ti i.
Moses Aiawhtu Joshua Ril I
(Danp 31:1-8)
12 Bawipa in Moses hnenah, “Abarim Mual ah kai tulai Israel mite hnenah i pe tuhhnak ram heh hlir ta tu.#Danp 3:23-27; 32:48-52 13Na hlir ben fangin na u Aaron a nunhnak a bo bangin nang khai na bo tuh ve i. 14Zaimantifangin Zin ramkhing ah i thupeciahnak ning pahnih in i el kawm manin i si. Meribah ah Israel mizapui in i ralcai fangin kaimah ai thianghlimhnak huham dinpui nuam lo i si, Meribah tu Zin ramkhing Kadesh ai cirhti i,” tiin ti i.
15Ciafangin Moses in, 16“Aw Bawipa nunhnak hmuahhmuah ai hampantu Pathian, #1Kum 22:17; Ezk 34:5; Mat 9:36; Mar 6:34 17na minungte heh tuukhaltu nai lo tuurual bangin um tuh loin mi konghoithaitu le raltawng fangin mi hobentu mi pakhat ril tu hram law,” tiin ngen i.
18Ciafangin Bawipa in Moses hnenah, “Thil tithaihnak a naimi Nun ai fapa Joshua ko tulai a lu vumah na kutsuan tu.#Luat 24:13 19Suangbawi Eleazar le mizapui hmaiah dingruai tulai a veksen hmaiah nangmah aiawhtu i, tiin thuthan tu. 20Israel mizapui in a thu ngai thai tuhin na thunaihnak a hrekkhat amah pe tu. 21Joshua in suangbawi Eleazar heh rinsan ngai tuhai Eleazar in kaimah ai daihhnak a ling tuhin Urim le Thummim hmang tuseh. Ciatihin Joshua le Israel mizapui tu Eleazar in ho tuhai amah ai thu in zai nahmuah ah um tlang tuseh,” tiin ti i.#Luat 28:30; 1Sam 14:41; 28:6 22Bawipa ai thupeciahnak bangin Moses in bawn i. Suangbawi Eleazar le mizapui hmaiah Joshua heh dingruai ai, 23Joshua lu vumah a kut suan ai amah aiawhtu tuhin nemhngethnak bawn i.#Danp 31:23
Currently Selected:
MIPUM SIARHNAK 27: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
