ISAIAH 58
58
A Dikmi Rong Ulhnak
1 Bawipa in, “Cawm ngai in au tu ih! Israel i minungte heh a sualdan rel tu ih! 2Nisiar in i bia tlang ai i dan hlun ah le a dikmi bawn ah ruat dun i. Anite hmuifu pe tuhin le dan pha pe tuhin i ngen tlang i,” ti i.
3Mizapui in, “Bawipa in kin hmu lo ilekhaw zaimanin rong ul hnelhno ising. Ziang inkhai siar lo ilekhaw zaimanin rong loin tuar kin nuam hnelhno i?” tiin zawt i.
Bawipa in anite hnenah, “A hmanniu in kin ti fangin, rong ulhnak tu ningmah ai daihhnak sihnak tuhin le ning napertute naunehhnak tuhin hmang tlang i si. 4Mi thihnai suakruai ning kih lo i; tawng dun ai hau tlang i si. Hemi bang ning rong ulhnak manin ning sawngenhnak ngai tuh i vuah i sim? 5Rong ning ul fangin rimsu pe dun i si; hampa kung bangin ning lu ut tlang i si; ning ihphah ah buri pon le vutkuang phah tlang i si. Ciami maw rong ul i ing ti i si? Ciami vumah lungawi tuhin i ruat i sim?
6“Kaimah in i daihhnak rong ulhnak tu hetihin i. Thir cikcin bang ai ning mi naunehhnak le hak bangin mi a orhtu a hman loin mi ning bawnhnak heh lon tusek ilai ning nauneh mite heh luat tuhang seh. 7Ning ti le rong khiah rikam mite thawn kawm tlang tu ilai ning inn khai inn nai lo mifarah caah hong tu ih. Hnikpon sil tuh a nai lotu hnenah hnikpon pe tu ilai ning songkhat bawm tuh khai el mah ih! 8“Ciafangin i tleuhnak tu ning vumah zing lam nisuak bangin tlang tuhai ning hmaihma khai a rang ngai in pot tuh i. Ning hnenah um tuh ngio ai ning o tuh ing. 9Saw ning ngen fangin ning sawn tuh ing; i ko fangin ning awi tuh ing.
“Mi ning naunehhnak heh lon tuh sio ai mi ning zohsuamhnak le ning ponkam pha lote ning boruai lek zolo in, 10Rikam mite rongkham in pe ai mitlasamte a kulhnak pe le i sikhaw na kulhtu khuathimhnak heh sun nitleu ah cang tuh i. 11Cen kong na hoi tuh ngio ai laivum ai thilpha in na khimruai tuh ing. Na cakruai tuhai na hatruai tuh ing. Ti a tampui vuan bang i tuh i si. A kang awng lo cirhti bang i tuh i si. 12A hnawm cia sio le hnawmborh pup ai a cang zohnak tu ning minungte in a ham hlun vumah sa tlang leh tuh i. A ekciahnak remmlehtu le a hnawm cia sio innte a salehtu tiin hihhlenhnak minung ning cang tuh i,” tiin ti i.
Nizarh Nia Ul Man
13 Bawipa in, “Sabbath nia tu nizarh tuhin ningmah in bawn ai ningmah ai daihhnak si nia ah khualtlawng lo, naper loin le zohsuam in pong loin um ai hemi kaimah nia heh cianghlimruai ai songlawiruai le i sikhaw, 14Kaimah ning i ruaihhnak songin a suakmi anghnak tu co tlang tuh i si. Laivum pumpuhluk ah upathnak minung cang tuhin ning bawn tuh ing. Ning pu Jacob hnenai i pehnak ram heh lungawi aipuang in khur tuh i si. Bawipa kaimah in rel zo ing,” tiin ti i.
Currently Selected:
ISAIAH 58: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
