ISAIAH 57
57
Israel Mite Ai Milim Bia Mawhhluk I
1Miphate thi ai aisu inkhai lingthiam lo i, zaikhai siar lo i. Ikhalselai amahte thi fangin tu rimsu harsahnak tuar nawn lohnak hmunah hleng i. 2Ziaza pha a naitu in lungmuanghnak ngah ai a thi fangin cawlumhnak ngah i.
3Aw misualte, ning thukhan tuhin heta ah kawi tu ih. Polte le pasal kang songin midang daih le hlotlaute tahin ning pha deuh cuang lo i. 4Aisu heh i hnihsahnak menma in ning hmanghnak heh? Ning ka, ka in lai ning phanhnak tu aisu i? 5Laivum pharuaitu khuavang bia i ing ti ai a zarhmi ning thingkung hniaah nu le pa pawl dun i si. Runpui hiang lungkhu songah ning fate tu hibawlhnak in sel i si! 6Ciata ai a umhnak lungto nal pawl heh lang ai khuavang ah bia tlang i si! Ciami lungto hrang tuhin cabitti bung ai pe i si; sangvut hibawlhnak khai pe i si. Lung i awi tuhin ruat i sim? 7Tlang sang vumah hibawlhnak pe tuhin feh ai nupa pawldunhnak sawn in hmang i si. 8Kawngkolhniu ai a umtu ning milimte tu ning inn hmai dawngkham berah dah ziar i si! Kai tu i zam i si; ning hnikpon hawk ai ning itpui tuhin tangka ning thamhnak ning daihhnak mite thawn ning khuahluan kaupui vumah it i si. Ciata ah ning taksa diriamhnak bawn i si. 9Ning rimhmui mat i si, ning sathau mat ai Molech khuavang bia tuhin feh i si. Bia tuh khuavang situ tuhin laivum khuahacang ah palai hlat i si; mithi khua tian hlat i si. 10Khuavang dang ning sihnak ah ning thitha khai bo sio i, ikhalselai van ning sang awng lo i. Zakthi nai loin milimte in hathnak kin pe i, tiin ruat i si; ciamanin tha ning cawl awng lo i.
11“Bawipa in, “Ning thinlung songah kihhnak a umruaitu hemi khuavangte tu aisute i? Ciatihin ning lau manin i hnenah thudonrel ai kai tu i hai i si! Dapniu in um ngio manin maw kai tu i upat nawn lo i si? 12Kin bawnhnak hman i, tiin ruat i sim? Ruat mah ih! Ning bawnhnak heh phuang tuh sio ai ning milimte in ning o tuh lo i. 13Bawmhnak ngen in ning au hnelhno fangin ning milimte in ning bawm tuseh. Vaikhat hli zuang in hmut tuh sio i! Ikhalselai kaimah i rinsantute tu ram songah um tlang tuhai i Biakinn songin i bia tuh i,” ti i.
Pathian Bawmhnak Le Cakruaihnak
14 Bawipa in, “I minungte tu i hnenah let tuseh. Amahte lampui ai mikhamtu hmuahhmuah lon tu sio ih! Lampui bawn tu sio ilai a cialep in dah tu ih!
15Kai tu kumzangza ai a nung Pathian, a sang ngai le a Thianghlimmi Pathian ing. A sang le a thianghlim hmunah um ing; ikhalselai rinsanhnak le umlamhnak ning nai lehsal tuhin thinlung khoimi le thinlung nemmi hnen ahkhai um ing. 16I minungte hnenah nunhnak pe ing; mawhhluk tuh ngio lo ai anite vumah kumzangza in thinraw tuh lo ing. 17A sualhnak le pamhaphnak manin amahte vumah thin i raw i. I thinraw in cawh ai hnawl ing. Cia kong in thinlung ruh tlang ai amahte daihhnak lampui hlun thotho i.
18“Amahte thil bawndan hmu zo ing; ikhalselai cakruai tuh ing. Hoi tuhai bawm tuh ing; lungsia thinpem mite tu hnem tuh ing. 19Lamhla ai a umtute ituseh, a nong ai a umtute ituseh, a veksen hnenah daphnak pe ing. I minungte tu cakruai tuh ing.#Eph 2:17 20Ikhalselai hrokhrawl mite tu a com awng lo tilep in nawngbek le hnawmborh a suakpui thliahthlo tifingriat bang i. 21Misualte ca ahcen humhimhnak um lo i,” tiin ti i.#Isa 48:22
Currently Selected:
ISAIAH 57: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
