ISAIAH 56
56
Mi Zongzong Bawipa Ai Minung I Tuh
1 Bawipa in a minungte hnenah, “A rai hlanah ning o tuh ing. Ciamanin a dikcang le a hman bawn tu ih. 2Nizarh nia ul ngio ai a hmangsual lotu heh hmuifu pe tuh ing,” ti i.
3 Bawipa ai minungte hnenah a ṭangtu ramdang mi in, “Bawipa in a minungte thawn Pathian bia tlang tuh kin siang tuh lo i,” tiin ti maseh.
Tilretmi in, “Fate nai thil lo a imanin Pathian ai minungte hnenah tel thil tuh lo ing,” ti maseh. 4Hebang mi hnenah Bawipa in, “Nizarh nia ul in kaimah i upat ai i daihhnak a bawntu le i thukhamhnak a hlun ngiotu heh, 5i biakinn songah le i minung lakah ning hming hihhlenhnak i tuhai, fanu le fapa nai ai hming ning thanghnak tuhin ning hming tu rai deuh hih tuh i. Zaikom inkhai haihnak i tuh lo i si,” ti i.
6 Bawipa ai minung lakah a teltu ramdang mite, Bawipa it ai a naruaihtu le nizarh nia ul ai a thukham kho ngai ai a hluntute hnenah Bawipa in, 7“I mual cianghlim Zion ahcen ning hlenpui tuh ing; i sawngenhnak inn ah anghnak ning pe tuhai i puleng vumah hibawl ning selhnak tu ning sang sah tuh ing. I Biakinn khiah miphuncang caah sawngenhnak inn ti tuh i,” tiin ti i.#Mat 21:13; Mar 11:17; Luk 19:46
8Saltanghnak in a minungte a suahtu Bawipa Pathian in amah ai minungte thawn fingkhawm tuh miphundang hoi tuhin thukham i.
Israel Hotute Mawhhnak Tawk I
9 Bawipa in a dang miphunte tu sahrang bangin kawi ai a minungte hlikhlai tuh dek in ruai i. 10Bawipa in, “Israel hotute, i minung ralringhnak a reltu tuh mite heh mitcaw tlang sio i. Zaikhai linghnak nai lo i. Kin kilkhawltu inapui uico a ca lo thawn bang dun i; mitmu ai mang man tliatlo menma i. Mitmu a hiamdan hlaihlawr heh! 11Pamhap ze ai zaikom inkhai rong kham ti nai lo uico bang i. Lingthiamhnak zaikhai nai lo hotute i. A veksen in amahte ai daihhnak lek bawn tlang ai amahte miathnak ian si tlang i. 12“Kawi tu ih, Cabitti ding tuh ising. A dut thil song dut tlang tuh ising! Thangha tu tunnia tahin rin ni songlawi sawn tuh i,’ tiin a ritute in ti i,” tiin ti i.
Currently Selected:
ISAIAH 56: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
