I TIMOTE 4
4
Zirhtu Sual
1Can hnuata lamah mihrek in Khristian thupom heh zam tlang tuh i; zawltu rauhla sang tlang tuhai khuasia ai zirhhnak hlun tlang tuh i, tiin fiang ngai in Rauhla in rel i. 2Ciabang zirhhnak tu thudonrel mi zawl thiamte in zairuai i. A hnawm le pha thiathiamhnak thinlung tu thir ling ai hulhnak bangin a thimi i. 3Ciamite in nupa hoidunhnak le rong hrekkhat ai khai pha lo i tiin zirh tlang i. Ikhalselai Pathian in ciami rongte heh ai tuhin bawn ai Pathian a sangtu le thutak a lingtute ca ahcen anghnak sawngenhnak thawn ai tuhin pha i. 4Pathian ai bawnhnak hmuahhmuah ai pha sio i; zaikhai hnawl tuh um lo i. Ikhalselai zaizongza heh anghnak sawngenhnak thawn cosang tuhhnak i; 5zaimantifangin Pathian thu le sawngenhnak in a thiang ah cangruai zo i.
Khrih Jesuh Ruaihtu Pha
6Hemi zirhdunhnak heh Khristian kin unaute rel lesikhaw Khrih Jesuh ruaihtu pha i tuh i si. Ningmah khai a hlun hnelhno zomi a dikmi thuzirhhnak le sanghnak ponkam in rauhla lamah cawm dun i si. 7Ikhalselai Pathian thu thawn pehzomhnak zaikhai a nai lomi rel tlak lo tluanthu menma pawl heh sang mah. Pathian daihdan ai nung tuhin zirh dun tu ṭio law. 8Taksa nuncakhnak ai zirhhnak tu man nai ve napui rauhla nuncakhnak hrangah zirhhnakte tu zaizongza ah man nai i, Zaimantifangin tunah ituseh, hmai lam caah ituseh, a thukhamhnak tu nunhnak i. 9Hetih ai i relhnak heh a dikmi ponkam i ai sang tlak le co tlak i. 10Rimsu ze le harsa ze in naper ising; zaimantifangin kumzangza in a nungmi Pathian vumah umlam ising. Cia Pathian tu mi zongzong Nunotu i ai a hlaice in amah a sangtute caah i.
11Hemi hlun tuhhnak le zirhhnakte heh rel tulai zirh tu. 12Mino na imanin aisu inkhai nau na tat maseh. Ikhalselai na hmurka na pongdan le, na nuncan ziaza, ithnak, sanghnak le cianghlimhnak ahkhai a dang sangtute ai santeh tlak in nung tu. 13Na hnenah i hleng hlan song mizapui hnenah Lai Thianghlim siar tulai, thurelhnak le thuzirhhnak in na can le na thazang hmang tu. 14Prophette in thu phuang tlang ai upate in na lu vumah amahte kut suan sawng fangin na ngahhnak rauhla lehsawng heh zam zel menma mah. 15Na khangso zia heh mi zongzong ai hmu tuhin hemite heh na can le na thazang pe in hmang tu. 16Na umdan ralring tulai na zirhhnakte khai ralring tu. Hemite heh catloin bawn tu. Bawn ben ngio lesikhaw nangmah le na thurelhnak a zatute heh ohnak ngah tuh i si.
Currently Selected:
I TIMOTE 4: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
