I TIMOTE 5
5
Sangtute Vumai Ṭuanvo
1Upate heh hau mah; na pa bangin ruat tulai nemniu in forh tu. Mino deuh heh na unau ah ruat tu. 2Kum upa nupang heh na nu bangin ruat tulai, kum nauta nupang deuh pawl tu thinlung thiangniu in na farnu bangin ruat tu.
3Mahniu lek ai khuasatu hmaitongte heh upat tu. 4Ikhalselai hmaitong nu in fate ihlahle tute nai lekhaw a hmasaber ah ciami tute le fate in amahte nu le pate, ihlahle amahte pi le pute heh amahte dan ai ruaihnak bangin kilkhawl tu selai cawm tu ve seh. Zaimantifangin ciami tu Pathian lungawiruaitu i. 5Mahniu lek ai khuasatu hmaitong nu heh, kilkhawltu aisu khai nai lo manin, Pathian lek rinsan ai sun le zan in sawngen ai bawmhnak ngen i. 6Ikhalselai taksa hiamhnak hrangah a taksa a hmangtu hmaitong heh nung napui lai ai thi zo i. 7Hmaitongte tu aisu inkhai mawhhluk lohnak cang thil tuhin he thuzirhhnakte heh rel tu. 8khalselai mi pakhat tu a songkhat, amah ai innsang rin kilkhawl loin zaikhai siar hlah lekhaw a sanghnak zangtak i ai sang lotu tahin rin sual sawn i.
9Zaibang hmaitong khai kum sawmruk vum ihlah lekhaw hmaitong laibu songah telh mah. Ciahlaiah ciami hmaitong nu tu vel khat lek pasal naimi ituseh. #5:9 vel khat lek pasal naimi tihnak heh a pasal sangtlak ai a nungmi tikhai i thai i. 10Naper phathnak ah hming a naimi ituseh. Naper pha tihnak tu: a fate a kilkhawl thiamtu, mikhual sikthiamtu, naper nauta ber kesom khai Khristian unaute vumah a per zuamtu, harsa mangbang tawk can ah mi a bawmtu, le thilpha bawn ah a can le a thazang a petu, tihnak mite heh i tuh i.
11Ikhalselai hmaitong kum dawn deuh pawl tu hmaitong laibu songah telh mah. Zaimantifangin pasal nai nuam leh fangin Khrih heh zangtak de i. 12Ciatihin Khrih hnenai amahte thukhamhnak bal ai mawhhlukhnak tawk tlang i. 13Cialek zolo in inn khat hnua inn khat vak ai a lovang in a can boruai i. Ciahnak tahin a sia amam tu: pong tam i, mi relsiat i, mi cangcang thinrawtiar ai pong tuh lo khai pong zel i. 14Ciamanin kum dawn deuh hmaitongte tu pasal nai selai fate khai nai in amahte inn kilkhawl tu selai ti i daih i. Ciatih ilekhaw kin ralte in kinmah thangsiathnak can ngah tuh lo i. 15Zaimantifangin hmaitong hrekkhat tu Satan hlun hiam in kin hlum zo i. 16Ikhalselai Khristian nupang in a innsang ah hmaitong nai lekhaw pawlpui phur ritruai tuh loin amah in cawm tuseh. Ciatihin cawmtu nai loin a nungmi hmaitong ngaingai pawl heh pawlpui in sik thil tuh i.
17Pawlpui konghoitu, naper pha a pertu cenin perman a let hnih in ngah tlak i. Ciami konghoitu lakah thurelhnak le thuzirhhnak ai a zuam ngai mite in ngah tlak cuang i. 18Zaimantifangin Lai Thianghlim in, “Fang a cil hnelhnotu kawlpawcang kahmur pen mah ih,” ti ai, “Napertu in a perman ngah tuhhnak i,” #Danp 25:4; Mat 10:10; Luk 10:7 ti i. 19Thulingtu a tlawm ber pahnih tal um hlah lekhaw pawlpui konghoitu mawh a hlukhnak heh ngai nuam mah.#Danp 17:6; 19:15 20Sualhnak a bawntute tu mizapui hmaiah hau tulai midang in lau tuh deuh i.
21Pathian le Khrih Jesuh le a thianghlim vancungmi hmaiah na ruai ing: zai na bawn inkhai aisu khai hlaihdanhnak um loniu in he zirhhnakte heh hlun tu. 22Bawipa ai na ruaihtu tuhin aisu vum ahkhai ngaihhlah ze in kutsuanhnak bawn mah. Midang bawnhnak sualhnak ah tel ve mah; cianghlim niu in um tu.
23Ti lek ding loin na songur le na ur dang nuam deuh tuhin cabitti tlawm niuniu ding tu.
24Mi hrekkhat amahte sualhnak tu fiang ngai in lar ai thukhanhnak ah amahte sualhnak tu amahte ai hlanah hleng hmasa i; ikhalselai midang sualhnak tu lehhnua pui fangin lar i. 25Ciatih bangin naper pha heh fiang ngai in lar ai a lar lai lohnak khai thup hlen thil lo i.
Currently Selected:
I TIMOTE 5: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
