SEFANIA 3

Mwanduye fo Yerusalemu

1Ochia lo makideko na ifanyitso, mṟi fo wukika. 2Fuleindia Ṟuwa-pfo; fuleidikia iwawaso-pfo, ma fuleidikia Mndumii-pfo; fulekaa hafui na Mndumii-pfo. 3Wachili wafo nyi miso tsipoṟohoṟa; walya wehoṟokia wengi nyi shisii sha kiukanyi; tsilekelaṟa kindo itane ili lya ngama. 4Waikimbi wake nyi wandu wafafa, walembi; wakohanyi wake walefanyitsa ngafu handu haele, wakahaluo wuwawaso wunyamaṟi. 5Mndumii nyi awode wusumhanyi; echiwuta wunyamaṟipfo, orio ngamenyi nekeloṟa wucha woke alatsitsa; indi mndu mnyamaṟi nechisonu. 6Njilerumatsa wandu wa mkambo, shilya wawekusihie njileshinyamaṟa kuwode moida njienyi kowo manya mṟinyipfo kipfa ilerumara; kuwode mndu-pfo manya mokaa pfo kuwodenyi. 7Njilehamba kofia nonjiowuo kundu njilanyamaṟe handu hapfo chando ndekulosha, indi kowuta sha wukika koweosha njotende tsawo. 8Kyasia njiwedenyi Mndumii ahamba, mṟasa mkonu fulya njekure njiduo wandu wapfungo kipfa njikuteseheṟie isanya wandu wa mkambo, kundu njikoyanyishe mangi tsose, njiwaloshe kui nyashi yako yee, wulang'a wo nyashi yako, kipfa wuyana wose wochirumatso kui modo fo wunyenyi woko.

9Kipfa o nhondo njechiwihiṟia wandu kishomo kicha, waidime ilaha rina lya Mndumii wamṟundie na mhio fumu. 10Kipfa wokia oruka lui kuleshe na meda ya Kushi, wekenjiterewa washiki wa wandu wako wawepaṟakanyi, wechiende shiinengo shako. 11Mkonu fulya ochiowesho nyi mawuto halya hapfo uwedekio naho pfo; kipfa njechiwutaho wandu walya walanjiidikie na ikushela, walakae kiidi kyapfo, wuidiki wopfo, wochikaa kiidi kya fumvu-pfo. 12Indi njechitsuhaṟa wandu waangu walya waiwawonyie na wakiwa, nawo wechiidikia na ikusiria rina lyako inyi Mndumii. 13 Mtsuhaṟo fo Waisraeli wechiwuta wunyamaṟipfo, manya ihamba wongo; ma olimi lo piṟa lulechiwono dumbunyi; kipfa wechilya na ilaa, kulawode mowaowesha.

Kiimbo kya sia

14Imba, iyo mana o Sioni, Kapa ngululu iyo Israeli;

Chihio na ifuda na Mrima fopfo fose Iyo Yerusalemu;

15Mndumii nawutaho mwanduye fopfo,

Nakumba nja wakituwa wapfo;

Mangi ya Israeli, ee, Mndumii nai kiidi kyapfo;

Ochiowuo-se wuwichopfo.

16Mkonu fulya Yerusalemu nechiwio,

Ulaowuo iyo Sioni, owoko lopfo lulalolome.

17Mndumii-Ruwa opfo, nai kiidi kya mbahanyi

echiidima ikiṟa.

Nechikukesekia na sia ing'anyi,

Nekutsia ikundenyi lyake,

nechikuchihiṟo na shiimbo.

18Njechisanyia walya wasokio fowa na ikuinadia kipfa kya wuindi, iwa wawei wapfo, walya mhanda fuwei mpiṟe. 19Ambuya mandi ho njechiwuwuya walya waikulisa wukiwa; njechichiṟa ulya ai ireteka, inyi njechisanyia ulya amfune; inyi njechiwahaluo wawe kiṟumi na rina, iwo wawei wapiṟe wuyanenyi kose. 20Mandi ho njechimusanyia na imuitsa na mba - kipfa njechimhaluo kiṟumi na rina kiidi kya wandu wose wa wuyana ilyi njechiwihiṟa wapfungo wanu oshangunyi lo meso hanu, Mndumii ahamba.

Currently Selected:

SEFANIA 3: KIM2

Highlight

Compare

Copy