HAGAI 1

Ruwa awawasa hekalu liwiko ko uhya

1 Maka fo kawi fo Mangi Dario meri fo kaṟandaṟu, meri limu, idedo lya Mudumii lilechea Zerubabeli, mana o Shealitieli, mchili o Yuda, na Yosua mana o Yehosadaki, mkohanyi ang'anyi kui dumbu lya miikimbi Hagai kehamba, 2Mndumii menyi Matorito nyi ahamba adi, ke wandu wa wekehamba, “Iha chi maheri hawaṟi icha pfo, iki chi kiheri kewika mba ya Mndumii pfo. 3Idedo lya Mndumii likacha kui dumbu lya muikimbi Hagai kehamba, 4Ngesa kiheri ki nkii kicha konu ikaa mbenyi tsanu njicha na mba yako ikae inyamaṟikye? 5Mndumii menyi matorito nyi ahamba, achikienyi mahio hanu na muweteseheṟa ohendo lonu. 6Ambuyenyi mulewaaya mbeu tsifoi mukasambuo kitutu; mkowelya manya mulaihude; mukanyo mulawute wuangari; mkaṟaa nguwo indi kuwode moicho mrikepfo; na icho moambia wueri kawika mfukonyi futochikyetochikye. 7Mndumii menyi matorito nyi ahamba kusaṟenyi kya ohendo lonu. 8Donyi na mtsudu, muhende imanya mashidi muwike mba, na inyi njichihiṟo nyiyo, njiichiko, Mndumii ahamba. 9Muwelangye shifoi, ate mkawona shyangu; lilya muleende na kanyi ngashiwiwita. Nkipfa kya iki? Mndumii menyi matorito ahamba. Nyi kipfa kya mba yako ii ikeri inyamaṟika, nanyo mukadichya orio mndu kanyi koke. 10Kipfa kyanu ngina ikaimo ilalekye ṟauṟa, na madema hakaimo halaṟae ndunda. 11Njechiende kuari na mbaṟi fung'anyi fucheye madema hose, na mafumvu, na mvinyo mhya, na mafuda, na orio kindo kii kunu shi, na huya wandu na shii na moo, na maṟunda hanu ha mawoko.”

Wandu waindia iwawaso lya Mndumii-Ruwa

12Nahong'u Zerubabeli, mana o Shealitieli, na Yosua, mana o Yehosadaki, mkohanyi ang'anyi hamu na iwo wawetsuhee, wakaindiya ṟu lya Mndumi Ruwa owo na madedo ha muikimbi Hagai, chando Mndumii-Ruwa owo awemdumye, wandu wakaowuo oshangunyi lo Mndumii. 13Nahong'u Hagai mdume o Ruwa kiidi kya Mndumii kawia wandu, “Inyi njii nanyo,” Mndumii ahamba. 14Nalyo Mndumii kaira mrima fo Zerubabeli, mana o Shealitieli, mchili o Yuda, na mrima fo Yosua, mana o Yehosadaki, mkohanyi ang'anyi, na mrima fo iwo wawetsuhee; wakahenda, wakaṟundya mba ya Mndumii menyi matorito, Ruwa owo; 15meri makumi hawi na kaana, meri fo kaṟandaṟu maka fo kawi fo mangi Dario.

Currently Selected:

HAGAI 1: KIM2

Highlight

Compare

Copy