SEFANIA 1
1
1 Idedo lya Mndumii lilechea Sefania, mana o Kushi, mana o Gedalia, mana o Amaria, mana o Isikia; mkonu ya Yosia, mana o Amonyi, mangi ya Yuda.
Mfiri fo Mndumii fo ianduo mondu
2Njechimamiṟa shindo shose, shilechiwono-se orukenyi, Mndumii ahamba. 3Njechimamiṟa mndu o wandu na orio kikiwike kyose. Mando ha ngeṟenyi ndehe tserunduka; makunga ha mṟingenyi, hamu na wawicho; njechirumatsa mndu o wandu elechikaa nawono - Mndumii ahamba. 4Njechihoṟwo owoko loko huya Yuda, na huya wandu wose wai Yerusalemu; na inyi njiarisye wandu mtsuhaṟo fo Baali, fulechiwonose iya, na rina lya Wakemari hamu na Wakohanyi; 5na walya weindia kulya ruwehu wai kai ka mba na iwo weterewa, na ilya nyamu ya Mndumii na ilya nyamu ko Malkamu; 6na iwo wawewuuye numa walakioshe Mndumii, na iwo walakeshiha Mndumii, manya iwesa kyake.
7Tsia sau oshangunyi lo Mndumii-Ruwa;
kipfa mkonu fo Ruwa fui hafui;
Mndumii nyi ateseheṟie kidaso,
Nyi ailyishiye wahenu wake.
8Na kechiwa, mkonu fulya fo kidaso kya Mndumii, njechihoṟwo wanene wana wa Wamangi, na wandu wose waṟee nguwo njihenu. 9Na kiidi kya mkonu fulya njechihoṟuwo iwo wose weitola mongo waichuṟie mba ya Mndumiii owo wukika na wulembi. 10Na kiidi kya mkonu fulya, Mndumii ahamba, kochiwada kifihiṟo mongonyi fo makunga na ifuha ling'anyi kihongo kya kawi, na mtiṟi fung'anyi fuwukie fumvuhu. 11Wulalu fuhenyi nyo mose mokekaa Makteshi, kipfa walya wekapa mbucha wasaramaya; iwo wawode mkunja ya fesa wapfie. 12Numa ya maheri ho njechiweṟuwetsa Yerusalemu na kimui keaka; njechihoṟwo iwo wai makusaṟonyi hawo wehamba ipfo mhionyi yawo, Mndumii echiwuta mecha ang'u mawicho - pfo. 13Na wusuṟi wowo wochidao wusingenyi, mba tsawo tsechiwa njisame, wechiwika mba indi walechikaapfo; wechiwaaya ndunda tsa msabibu indi wechinyo mvinyopfo.
14Mkonu fo Mndumii fung'anyi fui hafui
Nyi hafui, fuikambiṟa icha
Ee, ṟu lya mkonu fo Mndumii,
Mbahanyi nafihiṟa kewawio mnu,
15Mkonu fulya nyi mkonu fo nyashi,
mkonu fo kiwi,
mkonu fo inyamaṟo na iliso wukiwa,
mkonu fo meema rambatanyi,
mkonu fo mapuchi na mema fushinge,
16mkonu fo taṟumbeta na singiri
Mṟi injiiṟihiye omombo,
Iwode shitanga shileshe mnu.
17Inyi njechiendie wandu wukiwa, wahende cha shipfupfuṟe, kipfa waletana wunyamaṟi;samu yawo yechipusuyo cha kiluli, na mnying'a yawo cha mbuṟo. 18Fesa ma sahabu yawo yechiidima iwakiṟa mkonu fulyapfo, mkonu fo nyashi ya Mndumii, kipfa oruka lose lochikoṟo na modo fo nyashi yake; kipfa nechiwika mtsitsionyi fo wandu wose wai kiidi kya oruka, ee mtsitsionyi foṟihisha.
Currently Selected:
SEFANIA 1: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
