ZEKARIA 4
4
Kiwonesio kya katanu: Kinaṟa kya mchumaa
1Malaika ulya alededa na inyi kacha se lya kawi, kanjiamtsa, cha mndu aamtso madonyi. 2Kanjiwesa, “Nkiki uwonyi?” Ngahamba, “Njiwonyi ipapang'ae lya taa lya sahabu lyose, nalyo liwode kitela huyalyo, na taa mfungade na kuwewode maṟi mfungade yeende mafuda kundu taa tso tsiidime iaka tsose; 3 na mashidi ha mafuda hawi, limu ora lo kulyo na limu ora lo kumoso lo kitela kilya. 4Inyi ngahaluo, ngawesa Malaika ulya alededa na inyi, Hoi Mndumii oko, shindo shi nshiki? 5Nalyo malaika ulya kanjiwesa uichi shindo shi nshiki? Ngahamba ote Mndumii oko.”
Kyasa kya Ruwa ko Zerubabeli
6Kanjihaluo kechihamba, Ilyi nlyo idedo lya Mndumii ko Zerubabeli, lyechihamba chi kui wuidimi ma chi kui pfinya pfo, indi nyi kui Mumuyo foko, nyi wudo Mndumii menyi matorito ahamba. 7Iyo nyui fumvu ling'anyi? Oshangunyi lo Zerubabeli nyi ochiwa oruka luramiri, nao nechiende iho lilya lyewika huye handu hamu na ngululu tsa osaṟio, osaṟio loke lukukae. 8Idedo lya Mndumii likanjicheya lyehamba, 9Mawoko ha Zerubabeli halesuma otende lo mba ii, mawoko hake naaho hechiimarisa; na iyo nyi ochimanya ke Mndumii menyi Matorito anjiduma konu. 10 Nyiu alemina mkonu fo shindo shitutu? Kipfa wechichihiyo, nawo wechiwona orusu lo hesha mba lokehoṟotsa omombo luwodo nyi Zerubabeli, ee da ka mfungade; ho meso ha Mndumii hai ipfo na ipfo wuyanenyi kose. 11 Ngawuya ngawesa se, a mashidi-ha ha mafuda hawi hai ora lo kulyo na ora lo kumoso lo ipapang'ae lya taa kyaho nyi uda? 12Ngawuya se ngawesa lya kawi a maṟamba ha hawi ha mashidi ha mafuda hekewuta mafuda hakadao nyi mfongo iya iwi ya sahabu ko? 13Kanjihaluo - iyo uichi nyi kiki? Ngahamba, Ote Mndumii oko 14Kahamba iwa wawi nyiwo Mndumii awasambuṟie wamṟundie maheri hose wai kunu orukenyi - nyiwo wawashimbuo na mafuda.
Currently Selected:
ZEKARIA 4: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
