WAROMA 7
7
1Ang'u mulaichi, wanawawama, kyamba njiideda nanyo sa muichi mawawaso. Mawawaso haitoṟye mndu ili mandi ai-ho na moo? 2Kyamba mndu mka amwalikyo mii nyi apfungyo mii nyi wuwawaso ili mandi mii aiho na moo hose; kya indi mii chu kamekupfia, mka-cho amuitoki ye-se nyi wuwawaso womfungya miicho-pfo. 3Kiwukie-ho nyi kii-le; ke kiheri mii ai-ho na moo mka cho kadao nyi mii ungi nyi echiwio ke nyi ai mokiṟuhuyo; kya indi kombona mii amekupfia nyi alekio nyi wuwawaso wompfungya mii cho, kakudayo nyi mii ungi echiwio-se ke nyi ai mokiṟuhuyopfo. 4Nanyo wanawawama wako, na wudong'u, mulewohyo kyemletsa na wuwawaso wu kui mweeke fo mbihu fo Kristo; mui wake ichu aleṟutsa awuka wapfunyi luwe lochipfuṟukanya Ruwa mapfuṟukanyo. 5Kyamba lyandi luwei wandu wa kimbihu nyi olakilakilo lo maumbuyo hewutyo tewe ipfo wuwawasonyi, nyilo luweiṟunda ipfo shiwungonyi sho shadu shechiuendye opfu. 6Indi wulalu luwode mkuachie lulawaitoṟie nyi wuwawaso-wo lukapfa opfu loluletsa kilya kilupfungye kundu lukae-ho lochipfuṟukanya Ruwa lulawukye mumuyo, lulakuwode-se na mṟeho fo kacha.
Iwawaso na wunyamaṟi
7 Ili kii kido luhambe luda ngesa? Wuwawaso nyiwo wunyamaṟi? Ote-ko. Kya indi shile wuwawaso inyi njiwe manya wunyamaṟi-pfo. Ma njiwechimanya lango chando tsikeripfo chila wuwawaso wuhamhe. “Ma kulalange.” 8Indi wunyamaṟi wulekuihetsa na iwawaso wukaamtsa lango tsa mbaṟi tsose tsiwei na inyi. Kyamba chila wuwawaso wuiho wunyamaṟi wupfiye. 9Na inyi njiwewekukerye-ho na moo kacha kulaweiho wuwawaso; indi wuwawaso woikicha na wunyamaṟi wukaaluka. 10Na inyi ngaendyo opfu kukanjihoya ke wuwawaso-wo wuwenjiwia okiiyo wowuuya injiendie opfu. 11 Kyamba wunyamaṟi wulekuihetsa na iwawaso wukanjilemba wukanjiendie opfu kui mweeke folyo.
12Kyasiang'u wuwawaso nyi wui wulele na isho wushiwawasye shii shiele shirie wuhoṟotsu na wucha. 13Alae kilya kya wucha nyi kiwenjiwiia kya opfu? Ote-ko; kya indi kundu wunyamaṟi-wu, ipfo kundo wuwenjiendie opfu mfondo wumanyikeho na pata ke nyi wunyamaṟi, na iwawaso liwe lyechiitika wunyamaṟi wuhende inyamaṟa wofeeṟa njowingo.
Ngapano kiidi kya mndu
14Kyamba luichi ke wuwawaso wurio nyi mumuyo. Indi inyi njii o kiwuyana njiimbikye isinga lya wunyamaṟi. 15 Njiichi kindo njiwuta-pfo; kyamba kilya njikundi njiikiwutapfo kya indi kilya njisuo nkyo njekekiwuta. 16Kyasia komkoya ndakundi ikyo njekewuta na ngaidikya ke wuwawaso nyi wuwucha. 17Indi wulalu chi o inyi njiiwuta-se njidipfo kya indi nyi wunyamaṟi-wu wukuwode na inyi. 18Kyamba njiichi ke kunu koko nafo nyi mbihu fu foko tsako kuwode-ho kii kichapfo. Kyamba ikunda kilya kisumhanyi ee njikundi indi ikiwuta ote, kyalema. 19Kyamba iki kisumhanyi njikikundi chiikyo njekewutapfo, kya indi ikyo kiwicho njisuo nyikyo sa njekewuta. 20Indi komkoya ikyo njilakundi nyikyo sa njekewuta, chio inyi njii-ho-se mokiwutapfo, chila nyi wunyamaṟi-wo wuikiwuta, iwu wui kiidi kyako.
21Ili kii kido nyi ngatamuo imanya ke ili njii-ho mokunda iwuta kii kicha nyi kwiho monjichilia, nyikyo kiwicho kilya kiwodanyi na inyi. 22Kyamba njichihianyi na wuwawaso wo Ruwa kui wumndu woko wo kyamba. 23Indi njiwonyi kwipfo wungi wuiwawaso ipfo shiwungonyi shako wochiwahana na wulya wowawasa mhie foko. Wo wukanjitana mpfunge o ipfo wuwawasonyi wo wunyamaṟi wuiwawasa ipfo shiwungonyi shako. 24Apa, inyi nyi kisaya! Ichu ekaa nanletse mbihu-fu funjiduo opfunyi nyi wu? 25Mwano fuwe fochiwikyo Ruwa chu echiidima lukuwawie na Yesu Kristo Mndumii odu.
Ili kii kido na inyi njiwekaa na shilya shi shako njimonyi, njiwe mopfuki ukanya wuwawaso wo Ruwa kunu wuṟangonyi indi kimbihu njikae njepfuṟukanya wuwawaso wo wunyamaṟi.
Ikaa na moo kui pfinya ya Mumuyo Mwele
Currently Selected:
WAROMA 7: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
